Dànà ká swɛ̀ɛ́ kʋ tə yoo Yɩɩ nə tʋn Yɩzərayɛlə wa
78
1 Asafə bʋra.
À lɩ̀à-ba, á cʋga à kàrà tə zəni,
á súrə́ á zɩan á cʋgʋ à nii sʋ̀ràn tə!
2 À pɩ̀à sə à twá zwansɩsara nə à swɩ̀n yoo.
À wá bɩrɩ kàrà tə nə wulə fuən yìə̀n tə wa.
3 Kʋ tə nə nə nì, də kʋ tə nə nə yə̀ə́ kʋ yoo,
kʋ tə nə nyɩna-ba nə man ba bɩrɩ nəba,
4 nə bá səgə kʋ ba bɩ̀á tə yáá nə,
nə wá man kʋ nə bɩrɩ ba dwíí tə nə,
ba nə wá kə lʋʋ wa.
Nə wá bɩrɩ ba,
Ba-Yígúrə́-Jə-Tiu nə mɛ də dun nətʋ.
Nə wá bɩrɩ ba, ʋ dɩ̀àn tə,
də yomɩlan tə ʋ nə fwa.
5 Ʋ tún coŋi ʋ pa Zwakɔbə dwíí tə nə.
Ʋ pɩn nii Yɩzərayɛlə lɩ̀à tə nə sə ba twá kʋ nə.
Ʋ pɩn nii nə nɩbara-ba nə,
sə ba kàrɩ̀ ba bɩ̀á də kʋ yoo təntə.
6 Kʋ nətʋ wá pa bɩ̀á tə,
ba nə wá lɩrɩ zə̀n bɩ̀á tə kwa nə, yəni kʋ,
sə ba də wànɩ́ ba swɩ̀n kʋ ba bɩrɩ ba bɩ̀á nə.
7 Ba wá kə ba waa Yɩɩ nə.
Ba bá swɛ̀ɛ́ kʋ tə Yɩɩ nə tʋn,
yá ba wá twá ʋ yìə̀n tə nə,
ʋ nə pɩn nii tə yuu wa.
8 Ba kʋ́ʋ̀ bá ya ndə ba nɩbara-ba nə,
ba máŋá lɩ̀à tə nə vɩga sə ba sɛ̀ Yɩɩ nii,
ba bɩcanɩ nə tə̀lə́ yáá nədʋ,
ba pubʋŋa də ga wà Yɩɩ nə twá, ndə kʋ nə mɛ nətʋ.
9 Efərayimə dwíí tə catara tə pìí
ba dəri kʋ̀ʋ̀ tə dɩɩn nə də ba kwatarɩ zɩla.
10 Ba yà wà Yɩɩ nimarʋ* tə nii zìlí,
ba vɩga sə ba twá ʋ nii tə nə.
11 Ba swɛ̀ɛ́ ʋ dɩ̀àn tʋ̀tʋ̀nán tə,
də yomɩlan tə ʋ nə pɩn ba na.
12 Yɩɩ tʋn yomɩlʋ nəfarʋ Ezwipətə nə,
Sowan nagwanaa tə wa ba nɩbara-ba yáá con.
13 Ʋ pwɛ̀ mʋʋ tə, ʋ pa ba twá kʋ wa ba nan.
Ʋ pɩn nɩ́á tə zɩgɩ yɩɩ nə ndə biritaŋʋ nə.
14 Yɩcaʋ wa, ʋ yàá pa bakwan kəni ba cwəŋə nə.
Tɩtɩn nə, ʋ yàá pa mən poni kəni ba cwəŋə nə.
15 Ʋ pwɛ̀ pɩ̀ràn kasɔɔ lanworu tə wa,
ʋ pa ba nyʋn nɩ́á, tə nabuliyɩa tə nə dáá.
16 Ʋ pɩn nɩ́á pwin tə nan pɩ̀ʋ̀ wa,
tə dəri ndə nacorən nɩ́á nə.
17 Yá ba tə tʋn cʋna ba zɩgɩ ʋ nə.
Ba tə vɩga Baan Yɩɩ nii tɩkʋrʋ təntə wa,
18 ba dídə́n Yɩɩ ba bɩcanɩ wa,
ba lòrì sə ʋ pa ba ba fɩra wodirən.
19 Ba swɩ̀n ba zɩgɩ Yɩɩ nə ba wʋ́:
«Yɩɩ cɩ́gá wàá ʋ pɩn nə də́ wodiu kasɔɔ lanworu kʋ tə wa?
20 Ʋ mà pɩ̀ʋ̀ ʋ pa nɩ́á nan tə dəri nacorən wa.
Yá ʋ dàń wàá wodiu də ʋ pɩn nəba,
nə à yə̀ə́ ʋ wàá nàŋʋ́ ʋ pɩn ʋ lalʋʋ tə nə naaa?»
21 Ba-Yígúrə́-Jə-Tiu nì sʋ̀ràn təntə,
yá ʋ lɩŋa kwe ndə mən nə,
Zwakɔbə dwíí tə yuu wa.
Ʋ lɩŋa zàn Yɩzərayɛlə yuu wa zənzən.
22 Cɩ́gá, ba yà wà ba waa ken Yɩɩ nə.
Ba wà cɩ́gá pɩn də ʋ wàá ba ʋ joŋə.
23 Ʋ pɩn nii bakwan tə nə,
ʋ súrí lanworu tə nii,
24 ʋ pa manə* lwá ba yuu wa,
ndə dwà nə, sə ba də́.
Ʋ pɩn ba lanworu wodiu.
25 Ba lìù mama dí ladɩra wodiu.
Ʋ pɩn wodiu kʋ bʋ́rɩ́ ba.
26 Ʋ pɩn yɩɩ yipɩan con vʋʋ fuli lanworu tə wa.
Ʋ twá də ʋ dɩ̀àn tə,
ʋ pa vʋʋ nan jɩgwiə saparʋ con, kʋ bà.
27 Ʋ pɩn nàŋʋ́ lwá ba yuu wa ndə dwà nə:
Tə yɩ zuŋi tə nə dáá ndə mʋʋ nii kasɩlʋ nə.
28 Ʋ pɩn tə tʋ ba dəkuu bwálɩ́ tə tətə wa,
tə kɩkarɩ ba gansilə tə.
29 Ba dí tə ba sú zənzən.
Yuu-Tiu pɩn ba, kʋ tə ba nə pɩ̀à.
30 Yá ba tə nə wà ba fɩra wodiu tə dí ba zwɛ̀,
máŋá tə kʋ tə nə súə́ ba nii,
31 Yɩɩ lɩŋa tə nyɩ́n tə zàn ba yuu wa.
Ʋ gʋa ba babɩran tə,
ʋ ga pa Yɩzərayɛlə ləzwəndʋn tə tʋ ba tɩ.
32 Də kʋ nətʋ mɛ, ba tə tʋn cʋna duən,
ba wà ba waa ken Yɩɩ yomɩlan tə nə.
33 Ʋ pɩn ba mɩɩ zwɛ̀ ndə vʋʋ nə,
ʋ pɩn ba lʋʋ wúlú zwɛ̀ fən wa.
34 Máŋá tə Yɩɩ nə pɩ̀à ʋ gʋ ba,
ba yàá twá ʋ nə,
ba yàá pìí ba bà Yɩɩ con, ba pɩ̀à ʋ sáŋʋ́.
35 Ba yàá lìí də Yɩɩ yà nə yɩ ba dɩ̀àn ndə pɩ̀ʋ̀ nə.
Ʋ mʋ̀ Baan Yɩɩ yà nə cɩ̀ ba nə.
36 Yá ba yɩ ba pɩ̀à ba gɩgarɩ wá də ba nii,
ba nəndəli yɩ ba ma kʋ̀nɩ̀ kʋ̀nkʋ̀n ba bɩrɩ wá.
37 Ba bɩcan yà wà ʋ nə vwe zənzən,
ba yà ba ʋ nimarʋ tə nə twá də pùə́ nədʋ.
38 Yá ʋ mʋ̀ yà tʋŋa pubwanʋ ba yɩra,
ʋ kwɛn ba cʋna ʋ lɩ,
ʋ ba sɛ̀ ʋ cʋ̀gà ba.
Máŋá don wa, ʋ yàá cú ʋ bɩcan,
ʋ ba yá ʋ pɩn ʋ lɩŋa zaŋa.
39 Yɩɩ yà lìí ʋ tɩ̀àn də ba yɩ ləzoni,
ba yɩ ndə vʋʋ nə kʋ nə kɛ̀ń,
kʋ ga ba pìí kʋ bɩ̀àn.
40 Kʋ nɛɛ cé duən, ba nə vɩga ʋ nii kasɔɔ lanworu tə wa,
ba tʋn cʋna ba zɩgɩ ʋ nə, bwálɩ́ nəkʋrʋ təntə wa!
41 Ba kʋ́ʋ̀ sinti ba dídə́n Yɩɩ,
ba tʋŋa cʋna ba zɩga Yɩzərayɛlə Yɩɩ tə nə, ʋ nə yɩ parɩ.
42 Ba yàá swɛ̀ɛ́ kʋ tə ʋ nə tʋn ʋ pa ba,
dɩɩn tə nə ʋ nə jon ba, ba dʋŋa tə jɩɩn wa.
43 Ba swɛ̀ɛ́ dɩ̀àn mɩmɩnan tə ʋ nə tʋn Ezwipətə nə,
də ʋ yomɩlan tə ʋ nə tʋn Sowan nagwana tə wa.
44 Ʋ lwàń ba Nilə bunɛɛ tə nɩ́á ʋ pa tə jì jana,
yá ba kʋ́ʋ̀ wà wànɩ́ ba nyʋn tə.
45 Ʋ pɩn nanjwɩ tə nə jə cwan bà tə dɩŋa ba,
ʋ ga pa nyankasoru bà tə cʋ̀gʋ̀ ba.
46 Ʋ pɩn kayɩra də́ ba kárɩ́ wiən,
ʋ ga pa jə̀rə̀n də́ kʋ tə ba nə tʋn ba na.
47 Ʋ pɩn dwakafɩna cʋ̀gʋ̀ ba divɛn tɩ̀án,
ʋ ga pa waran cʋ̀gʋ̀ ba kapɩrɩtərən.
48 Ʋ pɩn dwakafɩna gʋ ba vàná,
ʋ ga pa dwà baa ba najɩra.
49 Yɩɩ pɩn ʋ lɩŋa tə fwi Ezwipətə tɩ̀án yuu wa ndə mən nə,
ʋ lɩŋa tə pupwin ba yuu wa zənzən,
ʋ ga tʋn càn malɩkɛ ba con.
50 Ʋ yá ʋ pa ʋ lɩŋa tə zàn ba yuu wa,
ʋ wà ba tɩan yáá nə cɩ̀,
ʋ pɩn tɩan yayɩpwarʋ lɩ ba mɩɩ.
51 Ʋ gʋa Ezwipətə tɩ̀án təntən bɩ̀á tə mama,
ba nə yɩ ba zandʋan bɩ̀á Swamə lʋʋ nii tə wa.
52 Ʋ pɩn ʋ lɩ̀à tə nan ba vìí,
ndə nɩan nə nan najɩrɩ wa.
Ʋ ja ba ʋ va kasɔɔ lanworu tə wa ndə pee nə.
53 Ʋ ken ba cwəŋə wa, ʋ ywàń ba yuu,
fən wà ba jɩn,
yá mʋʋ tə púə́ ba dʋŋa tə yuu nə.
54 Ʋ ja nə nɩbara-ba ʋ va ʋ lʋʋ nii tə wa, kʋ nə yɩ parɩ,
paan ka tə con, ʋ nə ta ʋ jon də ʋ vàn dɩ̀àn.
55 Ʋ dɩŋɩ dwíə́ nəkaran* tə ba yáá con,
ʋ ga pwɛ̀ ba lʋʋ nii tə ʋ ma tara ba.
Ʋ pɩn Yɩzərayɛlə dwíə́ tə jon ba gansilə tə,
ba wulə tə wa.
56 Yá ba dídə́n Baan Yɩɩ,
ba zàn ba zɩgɩ ʋ nə,
ba ga vɩ sə ba zìlí ʋ yìə̀n tə,
ʋ nə pɩn nii, sə ba twá tə nə.
57 Ba tì cwəŋə kʋkwɩʋn,
ba yɩn pwìí bələ tɩ̀án ndə ba nɩbara-ba nə,
ba pìí ba yá Yɩɩ,
ndə twamɩa nə fwèə́ ka nan.
58 Ba ja ba culu dədwələn tə ba ma zɩ̀n ʋ lɩŋa,
ba ga ja ba woŋwanan tə ba ma zɩ̀n ʋ sɩsabaan.
59 Yɩɩ nə nɩ kʋ nətʋ tə ʋ lɩŋa zàn,
ʋ ga vɩ Yɩzərayɛlə lɩ̀à ʋ dʋgʋ mɩ́ámɩ́án.
60 Ʋ dʋgʋ ʋ wúlú bwálɩ́ tə,
kʋ yà nə wulə Siloa nə,
kʋ yà nə yɩ gansili,
ʋ wulə kʋ wa ləzoni titəŋi wa.
61 Ʋ yá ʋ pa ʋ dɩ̀ànb tə tʋ dʋŋa jɩɩn wa,
ʋ dun tə ga tʋ ʋ jarɩduən jɩɩn wa.
62 Ʋ lɩŋa zàn ʋ lɩ̀à tə yuu wa,
ʋ ga pa ba gʋ lɩ̀à tə nə yɩ ʋ mʋ̀ nə tɩ də kwatara sɩ̀ʋ́.
63 Mən dí ba balandʋra tə,
yá ba kacɩan tə kʋ́ʋ̀ wà lìù nɩ,
sə ʋ nun ʋ ma bʋ ba nə.
64 Ba gʋa ba joŋwana tə də kwatara sɩ̀ʋ́,
yá ba kadənə tə wà kwi ba sisigə.
65 Yuu-Tiu nyɩ́n ʋ zàn ndə lìù yà nə dwɛ̀,
ndə kwatarʋ babɩʋ nə nyʋan sana ʋ ma də́ dɩ̀àn.
66 Ʋ púə́ ʋ jarɩduən tə kwa, ʋ mà ba,
ʋ pa ba də́ cavɩra tə nə ba zwɛ̀.
67 Yá də kʋ nətʋ mɛ,
ʋ vɩga Zʋzɛfə dwíí tə ʋ dʋgʋ,
ʋ wà Efərayimə dwíí tə kúrí ʋ tún.
68 Yá ʋ kúrí Zwida dwíí tə ʋ tún,
ʋ ga sóní Siyon paan tə.
69 Mə lá nə ʋ lwə̀ ʋ wúlú bwálɩ́ tə,
kʋ yuu tɩa zɩgʋ nə yɩ ndə lanworu tə nə,
ndə tɩa tə nə ʋ nə fwa,
ka nə wulə máŋá mama.
70 Ʋ kúrí ʋ tʋtʋnʋ Davidə ʋ tún,
ʋ lɩ wá pətun wa,
71 ʋ lɩ wá pakasʋna kwa,
sə ʋ pa ʋ yɩ̀rɩ̀ Zwakɔbə dwíí tə,
Yɩzərayɛlə lɩ̀à tə, ba nə yɩ ʋ mʋ̀ nə tɩ.
72 Yá Davidə ken ba cwəŋə nə, də bɩcan nədʋ,
ʋ ken ba cwəŋə nə də wʋbʋŋa.