Jɩgwarʋ nə yí nə à yàá lìí n dɩ̀àn tʋ̀tʋ̀nán tə yoo
77
1 Gwàgá yáá tíú Yedutunəa gwaran. Asafə gwaran.
2 À zɩ̀n à kori à bubwi à kəni Yɩɩ nə,
à zɩ̀n à kori à kə Yɩɩ nə, yá ʋ cʋga à con.
3 Máŋá tə à nə wulə jɩgwarʋ wa, à yàá pɩ̀à Yuu-Tiu.
Tɩtɩn nə, à yàá zɩ̀n à jɩɩn à te ʋ con, à ba gwàrɩ̀,
à ba yá sə ba kòrì nə.
4 À nə lìí Yɩɩ yoo, à yàá nɩ́ à waa con.
À nə bʋ́n ʋ yoo, à vànà yàá gwàrɩ̀. Zɩgɩ sìí bwálɩ́.
5 N pɩn dwiən ba à yɩ́á zwɩ,
à pubʋŋa gugurə,
à yəri kʋ tə à nə wá swɩ̀n.
6 À yàá bʋ́n dɩan tə nə kɛ̀ń,
də bɩna tə nə kɛ̀ń yoo.
7 Tɩtɩn nə, à yàá lìí à nuŋə tə yoo,
à bʋŋa à bɩcan wa,
à ga bwe à tɩ̀àn bwie.
8 Yuu-Tiu yɩ ʋ vɩga nəba ʋ dʋgʋ mɩ́ámɩ́án naaa?
Ʋ kʋ́ʋ̀ bá pìí ʋ san nəba mɩ́ámɩ́án naaa?
9 Ʋ wʋywaŋʋ tə zwɛ̀ mɩ́ámɩ́án naaa?
Ʋ kʋ́ʋ̀ bá ja yoo ʋ swɩ̀n nə con,
máŋá də máŋá mama wuuu naaa? Zɩgɩ sìí bwálɩ́.
10 Yɩɩ yɩ ʋ swɛ̀ɛ́ sə ʋ fwa pubwanʋ nə yɩra naaa?
Ʋ lɩŋa tə pɩn ʋ kʋ́ʋ̀ ba yinəgə dəri naaa? Zɩgɩ sìí bwálɩ́.
11 À swɩ̀n à waa con, à wʋ́:
«Yoo tə nə yɩ̀ nə,
kʋ yɩ Baan Yɩɩ nə kʋ́ʋ̀ ba nəba saŋa tə.»
12 À lìí Ba-Yígúrə́-Jə-Tiu tʋ̀tʋ̀nán tə yoo.
Cɩ́gá, à lìí n yomɩlʋ tə yoo, n nə tʋn fuən nə.
13 À wá lìí n tʋtʋŋɩ tə mama yoo,
à ga bʋ́n n tʋtʋnfaran tə yoo.
14 Ooo à tíú Yɩɩ, n cwəŋə tə yɩ parɩ.
Yɩɩ don tə̀lə́ ʋ nə mɛ də mʋ́.
15 N mʋ̀ Yɩɩ cɩcɩ nə tʋŋa yomɩlʋ,
n ga bɩrɩ n dɩ̀àn tə lʋʋ dwíə́ tə nə.
16 Kʋ twá də n vàn dɩ̀àn, n ma jon n lalʋʋ tə,
kʋ nə yɩ Zwakɔbə də Zʋzɛfə bɩ̀á. Zɩgɩ sìí bwálɩ́.
17 Ooo à tíú Yɩɩ, nɩ́á tə nɩ mʋ́!
Tə nɩ mʋ́, yá tə pupwi,
bʋran nəfaran tə də̀ń nə lu sʋsʋgʋ.
18 Bakwan tə lwá dwafarʋ nɩ́á tɩa,
Dwà tə baa lanworu tə wa,
yá n cɩan tə vəli bwálɩ́ mama wa.
19 N dwà tə baa ka lulugu,
ka pɩpɩlʋ pɩ̀rɩ̀ lʋʋ tə,
tɩa tə ga vɩvaga də fən.
20 N tún n cwəŋə mʋʋ tə wa,
n tún bwálɩ́ naluŋə tə də̀ń n twá lá n lɛ,
yá lìù mama wà n nɛɛ nɩ.
21 N twá Moyizə də Aron nə,
n ma kə n lalʋʋ tə cwəŋə nə ndə pee nə.