Yɩɩ nə bʋ̀rɩ̀ bʋra
75
1 Gwàgá yáá tíú gwaran. «Dàn ká cʋ̀gʋ̀!» Asafə gwaran. Nuŋə.
2 Nə bwɩ n nə, ooo nə tíú Yɩɩ, nə bwɩ n nə!
Nə bwɩ n yɩrɩ tə nə, cɩ́gá, n bwə́lə́ də nəba.
Nə maŋa n yogwaran tə nə bɩrɩ.
3 Yɩɩ swɩ̀n, ʋ wʋ́:
«Máŋá tə à nə wá lɩ à tún,
à mʋ̀ Yɩɩ nə wá bʋ̀rɩ̀ bʋra
ka twá cɩ́gá cwəŋə nə.
4 Tɩa tə wá nyɩan də ka yuu ləzoni tə mama.
Yá à mʋ̀ nə pɩn ka dəkuu jə dɩ̀àn.» Zɩgɩ sìí bwálɩ́.
5 À swɩ̀n ba tə nə fwa fwìə́ con, à wʋ́:
«Dànà ká fwa fwiə!»
À swɩ̀n wʋlʋnyɩna con, à wʋ́:
«Dànà ká zɩ̀n á tɩ̀àn yɩɩ nə!
6 Dànà ká zɩ̀n á tɩ̀àn yɩɩ nə zənzən,
á ma swɩ̀n fwìə́ sʋ̀ràn!
7 Cɩ́gá, ka zɩ̀n tɩ̀àn yɩɩ nə
tà kʋ naŋa yɩɩ yipɩan con,
nə à yə̀ə́ yɩɩ yizwɩa con,
nə à yə̀ə́ kasɔɔ lanworu tə con.
8 Cɩ́gá, Yɩɩ nə yàá bʋ̀rɩ̀ bʋra,
ʋ mun lìù don,
ʋ ga zɩ̀n lìù don yɩɩ nə.»
9 Cɩ́gá, Ba-Yígúrə́-Jə-Tiu jə wùrú zʋŋa,
də ka wa divɛn tə nə pupwia ʋ jɩɩn wa.
Ʋ yàá lwá kʋ,
ʋ pa tɩa yuu wʋlʋnyɩna tə mama nə,
ba nyʋn kʋ ba zwɛ̀ mɩ́ámɩ́án.
10 Yá à mʋ̀ wá nun
à ma siən Zwakɔbə Yɩɩ tə, dɩɩn mama.
À wá swɩ̀n à bɩrɩ də ʋ mʋ̀ nə swɩ̀n, ʋ wʋ́:
11 «À wá kɛ́n wʋlʋnyɩna tə mama yun nyʋran tə,
à ga zɩ̀n cɩ́gá tɩ̀án mʋ̀ yuu yɩɩ nə.»