Asafə boŋə Yɩɩ ba nə cʋ̀gʋ̀ Yɩɩ dìə̀ tə yɩrɩ
74
1 Asafə bʋra.
Ooo à tíú Yɩɩ,
bɛ̀ɛ̀ nə pɩn n ma vɩ nəba n dʋgʋ mɩ́ámɩ́án?
Bɛ̀ɛ̀ nə pɩn n lɩŋa ma fwi nə yuu wa,
nə mʋ̀ lɩ̀à tə nə yɩ n pee n yɩ̀rɩ̀?
2 Lìí n lalʋʋ tə yoo n nə kúrí,
kʋ máŋá nə ba yigə.
Lìí dwíə́ təntə yoo tə nə yɩ n mʋ̀ nə tɩ.
Lìí Siyon paan tə yoo, ka nə yɩ n wúlú bwálɩ́.
3 Bà ywàń bírí tə,
dʋŋa nə cʋ̀gʋ̀ mɩ́ámɩ́án.
Ba cʋ̀gʋ̀ wiən tə mama,
n wúlú bwálɩ́ tə wa, kʋ nə yɩ parɩ.
4 N jarɩduən tə mà babarɩ cə̀rí,
bwálɩ́ tə tətə wa, nə nə yàá jəri mʋ́.
Ba cwɛn ba dɩrapo kʋ bwálɩ́ tə wa.
5 Ba yà bɩrɩ ba tɩ̀àn,
ndə lɩ̀à nə goŋi tɩ̀án də dèrə́ pún wa.
6 Ba ja dèrə́ də hama,
ba ma lwa wiən tə mama ba nə sə̀.
7 Ba ken mən n wúlú bwálɩ́ tə nə,
ba mà n dìə̀ tə ba dɩ tɩa,
ba ga tʋn durən yìə̀n n wúlú bwálɩ́ tə wa.
8 Ba yà swɩ̀n ba waa con, ba wʋ́:
«Nə cʋ̀gà ba mama mɩ́ámɩ́án.»
Ba cʋ̀gʋ̀ Yɩɩ jə́rə́ bwálá tə mama, lʋʋ nii tə wa.
9 Nə kʋ́ʋ̀ ba n wúlú tə mɩmɩnʋ na,
Yɩɩ nii sʋ̀sʋ̀nʋ̀ kʋ́ʋ̀ tə̀lə́,
yá nə lìù mama ga yəri
kʋ nə wá dán kʋ mɛ nətʋ.
10 Ooo à Tiu Yɩɩ,
kʋ wá dán kʋ mɛ nətə,
n jarɩduən tə nə wá pɩ̀à n nii nə?
Dʋŋʋ tə wá mun n yɩrɩ tə máŋá mama naaa?
11 Bɛ̀ɛ̀ nə pɩn n ma ba yoo tʋŋa?
Bɛ̀ɛ̀ nə pɩn n vwa n jɩ̀àn duən nə,
n ba yoo tʋŋa?
12 Yɩɩ tə n nə yɩ à pɩ̀ʋ́, kʋ máŋá nə ba yigə,
n mʋ̀ nə joŋə nəba máŋá mama, tɩa yuu wa.
13 N mʋ̀ nə pwɛ̀ mʋʋ wa bələ də n dɩ̀àn tə,
n ga tɩtaga mʋʋ wojijirən tə yun.
14 N mʋ̀ nə tɩtaga mʋʋ wojijiru* tə yuu,
n pa filə nəfaran də́.
15 N mʋ̀ nə tún coŋi
n pa nabuliyɩa də nacoŋi nə.
N pɩn mʋnɛɛ tə nɩ́á nə dáá wɩ.
16 Tɩpʋrɩ yɩ n mʋ̀ nə tɩ,
tɩtɩn də yɩ n mʋ̀ nə tɩ.
N mʋ̀ nə fwa cànà tə də yɩcaʋ tə.
17 N mʋ̀ nə tún tɩa tə nii sɩswɩan,
n mʋ̀ ga nə fwa tɩpwən də yɩdɩɩn.
18 Ba-Yígúrə́-Jə-Tiu, lìí n tɩ̀àn,
də dʋŋʋ tə yɩ n mʋ̀ nii nə ʋ pɩ̀à.
Ləyirən dwíí kʋ tə yɩ n mʋ̀ nə ba fʋfʋlɩ.
19 Dàn ká pa ganaŋa lɩ n lɩ̀à tə n nə swə mɩɩ.
Dàn ká swɛ̀ɛ́ n yinənyɩna tə mɩɩ yoo máŋá mama.
20 Jələ n nimarʋ tə yoo.
Cɩ́gá, lʋʋ nii tə yikunu bwálá tə
súə́ də wʋlʋŋʋ tʋ̀tʋ̀nán.
21 Dàn ká pa lɩ̀à tə
ba nə fɩfɩn ba pìí ba vìí də cavɩra.
Yá sə zʋra də yinənyɩna bʋ n yɩrɩ nə.
22 Ooo à Tiu Yɩɩ,
zàn yɩɩ nə n ta n tətə yɩrɩ.
Lìí tʋran tə yoo,
ləyirən təntə nə ma twɩn mʋ́ dɩɩn mama.
23 Dàn ká swɛ̀ɛ́ n jarɩduən tə nə mà cə̀rí,
də ba tə nə zɩga n nə,
nə mà yoru n yuu nə máŋá mama.