Batwa nii sagɩ
(Gwaran 73—106)
Máŋá tə wʋlʋnyɩna yìə̀n nə yɩ ndə tə ziən
73
1 Azafə gwaran.
Cɩ́gá mama, Yɩɩ jə wʋywaŋʋ də Yɩzərayɛlə lɩ̀à,
də ba tə ba bɩcanɩ nə yɩ parɩ.
2 Yá à mʋ̀ yà ga mancɩn sə à dwá cwəŋə,
kʋ yà ga mancɩn sə à nɛɛ sɩrɩ.
3 Cɩ́gá, wʋgwɩʋ yà jə nə ləyirən tə yɩrɩ,
də wʋlʋnyɩna tə yɩrɩ, ba nə vəli yáá wuuu.
4 Yoo mama ba ba wʋwalɩ, kʋ jə vələ ba tɩan.
Ba yɩ nəfaran ba ga jə yazurə.
5 Ba mʋ̀ ba càn də́ ndə ləzoni tə duən nə.
Càn yí lɩ̀à duən yá tə ba ba mʋ̀ yí.
6 Kʋ mʋ̀ nə pɩn, fwìə́ yɩ ndə ba bɩan zàŋʋ́ nə.
Ka tʋn dɩ̀àn lɩ̀à yɩra, yɩ ndə gànʋ̀ nə ba zʋa.
7 Ba nuwən ba yɛɛ pɩpɩlɩ,
pubʋŋɩ tə nə wulə ba bɩcanɩ wa dáá tə ja lɛ.
8 Ba də́ bɩyɩrɩ lɩ̀à yɩra,
ba swɩ̀n wʋlʋŋʋ sʋ̀ràn,
ba zɩ̀n ba tɩ̀àn yɩɩ nə, ba ma swɩ̀n.
9 Ba zɩ̀n ba níə́ yɩɩ nə,
ba ma twɩn lanworu tə tətə,
ba nəndəli ba won mama yá tɩa yuu wa.
10 Mə kʋ mʋ̀ nə pɩn, lalʋʋ tə viviri ba twá ba nə,
ba ga joŋə ba sʋ̀ràn tə ndə nɩ́á nə, ba nywɩn.
11 Yá ba dàń yàá swɩ̀n ba wʋ́:
“Kʋ wá twá nətə Yɩɩ ma yəni?
Yá Baan Yɩɩ yà jə yənu tətə?
12 Mə wʋlʋnyɩna yɩ nətʋ,
ba pɩn ba jɩjə súrí wuuu,
yá won mama ga ba ba wʋwalɩ.
13 Kʋ yɩ tʋtʋ nə, à mʋ̀ pɩn à bɩcan ya nəpwon,
à ga sɩ̀n à jɩ̀àn, sə kʋ bɩrɩ də, à wà yoo cʋ̀gʋ̀.
14 Ba mà nə dɩɩn mama,
jɩjʋ mama ba kəni nə càn wa.
15 Yá à yà nə kúrí à tì, sə à swɩ̀n ndə ba nə,
à yà wá gɩgarɩ n bɩ̀á tə à dʋgʋ.
16 À dàń bʋ́n sə à ma nì kʋ yoo tə də̀ń,
yá à nɩ də kʋ yɩ càn kʋ pa nə.
17 Kʋ vəli kʋ yí dɩɩn tə,
à nə zʋa n wúlú bwálɩ́ tə wa,
à dàń lwarɩ kʋ tə nə dànɩ̀ wʋlʋnyɩna tə.
18 Cɩ́gá mama, ba yɩ n ken ba sɩsɩrʋ cwəŋə wa,
yá n wá pa ba tʋ ba cʋ̀gʋ̀ lala.
19 Naa nədʋ də ba cʋ̀gʋ̀ ba nyʋn lá,
fən pɩn ba zwɛ̀ mɩ́ámɩ́án ba nyʋn lá!
20 Yuu-Tiu, máŋá tə n nə zàn,
ba wá nyʋn lá, ndə pandwɩa nə.
21 Máŋá tə à pùə́ yà nə cʋ̀gʋ̀ mɩ́ámɩ́án,
kʋ zʋ kʋ yí à bɩcan wa,
22 à yà yɩ ləyiru, à yəri yoo mama də̀ń
ndə vànɩ́ nə, n yáá con.
23 Yá à wulə də mʋ́ máŋá mama wuuu.
N jə à jɩɩn nə,
24 n ga kəni nə cwəŋə nə,
ndə n nə swə nətʋ.
Yá n wá sɛ̀ jon nə də dun.
25 Wàà nə wá san nə Yɩɩ sàń nə,
də kʋ nə tà n mʋ̀?
À ba won don pɩ̀à tɩa yuu wa,
də kʋ nə tà n mʋ̀.
26 À yɩra tə, də à bɩcan tə wàá tə cʋ̀gà,
yá Yɩɩ nə yɩ à bɩcan tə dɩ̀àn
də à yizie bwálɩ́ máŋá mama.
27 Cɩ́gá, lɩ̀à tə ba nə pìí ba yá mʋ́,
yàá kwɩn ba mɩɩ nə,
n yàá pa ba tə nə ba mʋ́ zìlí nyʋn lá.
28 Yá kʋ tə nə ziən kʋ pa à mʋ̀ nə,
yɩ sə à ya də mʋ́, à tíú Yɩɩ.
À ken à yala Yuu-Tiu Ba-Yígúrə́-Jə-Tiu nə, ʋ nə yɩ Yɩɩ,
sə à ma swɩ̀n kʋ tə mama ʋ nə tʋn à bɩrɩ.