Yɩjʋnɩ tə kʋ nə pɩn Yɩɩ fwa zəni pɩ̀ʋ́ yɩra
72
1 Salʋmʋn gwaran.
Ooo à tíú Yɩɩ,
pa pɩ̀ʋ́ bʋ̀rɩ̀ bʋra, ndə n tətə nə,
pàbɩ̀á ga twá cɩ́gá cwəŋə nə!
2 Pa pɩ̀ʋ́ tə bʋ̀rɩ̀ n lalʋʋ tə bʋra,
kʋ twá cɩ́gá cwəŋə nə,
ʋ ga bʋ̀rɩ̀ n yinənyɩna tə bʋra,
sə ka ya mənəmənə.
3 Pa pɛɛn tə, də pankuli tə pa sìə́ lalʋʋ tə nə,
kʋ twá də n cɩ́gá cwəŋə tə.
4 Pa sə ʋ bʋ̀rɩ̀ lalʋʋ tə wa yinənyɩna tə bʋra,
sə ka ya mənəmənə.
Pa sə ʋ jon zʋra,
ʋ ga tɩtaga lɩ̀à tə nə kəni càn lɩ̀à nə.
5 Pa sə ba dəri n fən,
máŋá tə mama yɩcaʋ nə wá ya lá,
də máŋá tə mama cànà poni nə wá lá,
máŋá də máŋá mama wuuu.
6 Pa pɩ̀ʋ́ tə cú ndə dwà nə nɩ kárá wa,
ka sɩsɩdakurən nə pìí tə twè,
nə à yə̀ə́ ndə bakwan nə wòrì tɩa yuu wa.
7 Pa sə cɩ́gá cwəŋə kwɛn ka súrí,
ʋ pàrɩ̀ tə máŋá wa,
sə sìə́ ga ya lá máŋá mama,
cànà kori ka zʋ canyukunu.
8 Pa sə ʋ də́ pàrɩ̀,
kʋ nə zɩgɩ mʋʋ don nə,
kʋ va kʋ yí mʋʋ don.
Kʋ nə zɩgɩ Əfəratə mʋnaa tə nə,
kʋ va kʋ yí tɩa yígúrə́.
9 Kasɔɔ lanworu lɩ̀à tə wá tʋ
ba nadwana yuu, ʋ yáá con.
Ʋ dʋŋa nii wá buri pùrə́n.
10 Tarəsisə tɩ̀án pɛ̀gá tə,
də mʋʋ titəŋi lʋʋ níə́ pɛ̀gá tə wá pa
zìlə́ wiən* bà tə pa wá.
Saba də Seba tɩ̀án pɛ̀gá tə wá ŋwɩ́n lanpo ba pa wá.
11 Pɛ̀gá tə mama wá tʋ ba nadwana yuu,
ʋ yáá con, ba pa wá dun.
Dwíə́ nəkaran* tə mama wá zìlí ʋ nii.
12 Cɩ́gá, ʋ wá jon yinənyiən tə nə boŋə ʋ kəni ʋ nə,
də zʋrʋ tə ʋ nə ba lìù jə sə ʋ san wá.
13 Ʋ wá dəri labwana, də zʋra yinəgə,
ʋ ga wá jon zʋra mɩɩ ʋ kə lʋʋ wa.
14 Ʋ wá jon ba wʋwalʋ,
də lɩ̀à tə nə tʋŋa dɩ̀àn ba yɩra jɩɩn wa.
Cɩ́gá, ʋ mʋ̀ con nə, ba mɩɩ tə jə funə.
15 Pa sə pɩ̀ʋ́ tə ya lá!
Kʋ mɛ sə ba pa wá Saba tɩ̀án sɩ́án.
Kʋ mɛ sə ba jʋn Yɩɩ máŋá mama,
ba pa wá, sə ba lòrì
sə Yɩɩ fwa zəni ʋ yɩra, dɩɩn mama.
16 Yɩɩ wá pa mɩna bʋ́rɩ́ lʋʋ nii tə wa,
ʋ ga pa tə kə yun tə vin pɛɛn tə yuu wa,
ndə Liban paan tə nə fwa punə nətʋ.
Ʋ wá pa tə zɩgɩ tɩan tə wa,
tə pùlì ndə kárɩ́ tə wa gaʋ nə.
17 Pa sə pɩ̀ʋ́ tə yɩrɩ nan máŋá mama wuuu,
sə ba ga lìí ʋ yoo máŋá mama yɩcaʋ nə pɛ́n.
Kʋ wá twá də ʋ mʋ̀, lɩ̀à ma fwa zəni duən yɩra.
Dwíə́ nəkaran tə mama wá swɩ̀n də ʋ yɩ pupwən lìù.
18 À bwɩ Yɩɩ tə nə,
ʋ nə yɩ Ba-Yígúrə́-Jə-Tiu,
ʋ ga yɩ Yɩzərayɛlə lɩ̀à Yɩɩ,
ʋ mʋ̀ cɩcɩ nə tʋŋa yomɩlan!
19 À bwɩ dun Yɩɩ nə máŋá mama wuuu.
Ʋ dun mɛ sə tə sú tɩa yuu mama wa.
Amɩna, kʋ mɛ sə kʋ ya nətʋ!
20 Mə yəbə nə Yɩzayi bìú Davidə yɩjʋnɩ tə zwɛ̀.