Dàn ká vɩ nə n dʋgʋ à kʋ́kwɩ́nán máŋá wa
71
1 Ba-Yígúrə́-Jə-Tiu, n mʋ̀ con nə à kwálɩ́ à yuu:Dàn ká yá n pa cavɩra yí nə də mama!
2 Jon nə, n pa à tɩnɩ à tɩ̀àn,
n nə wulə cɩ́gá cwəŋə wa yɩrɩ!
Guni n zɩɩn n kə à con, n jon nə.
3 Ya ndə pɩ̀ʋ̀ nə, à nə kwálɩ́ á yuu kʋ wa!
N pɩn nə nii sə à bà lá, máŋá mama,
sə n jon nə.
Cɩ́gá, n mʋ̀ nə yɩ à pɩ̀ʋ̀,
n yɩ à dɩ̀àn dəkuu bwálɩ́.
4 À tíú Yɩɩ, jon nə wʋlʋnyɩna jɩɩn wa,
jon nə kʋ̀nkʋ̀na də ləzwənlwɩan jɩɩn wa.
5 Cɩ́gá, n mʋ̀ Yuu-Tiu Ba-Yígúrə́-Jə-Tiu yala nə à jə!
N mʋ̀ yuu wa nə à jələ, à zandʋan máŋá mama.
6 Kʋ nə zɩgɩ máŋá tə à nuu nə lɩrɩ nə,
n mʋ̀ nə nə à salɩ à tɩ̀àn.
N mʋ̀ nə pɩn à nan à nuu pùə́ wa.
À wá bʋ n nə máŋá mama wuuu.
7 À yoo gwárɩ́ lɩ̀à zənzən,
yá n mʋ̀ nə yɩ à yisəgə bwálɩ́ nəzəŋu.
8 À nii wá bʋ n nə, máŋá mama.
À wá swɩ̀n n zəni tə yoo, dɩɩn mama.
9 Dàn ká vɩ nə n dʋgʋ máŋá ka tə wa,
à nə jìgə̀ bazʋnʋ.
Dàn ká yá nə máŋá tə wa,
à dɩ̀àn nə zwɛ̀.
10 Cɩ́gá, à dʋŋa swɩ̀n à yoo,
lɩ̀à tə nə zɩga à nə, ken nii nədʋ.
11 Ba swɩ̀n, ba wʋ́:
«Yɩɩ vɩga wá ʋ dʋgʋ,
á pwie ʋ kwa, á dɩŋa wá á ja,
lìù tə̀lə́ ʋ nə wá jon wá.»
12 Ooo à tíú Yɩɩ,
dàn ká va yiŋʋnɩ, n yá nə.
À tíú Yɩɩ, bà lala, n san nə!
13 Pa lɩ̀à tə nə zɩga à nə də́ cavɩra,
pa ba cʋ̀gʋ̀ mɩ́ámɩ́án!
Pa lɩ̀à tə nə pɩ̀à sə yolwan yí nə,
də́ cavɩra, ba ga viviə!
14 Yá à mʋ̀ tə wá ja yala máŋá mama wuuu,
à tə wá bʋ n nə, à súrí lá.
15 Dɩɩn mama, à nii wá man n nə yɩ cɩ́gá tíú,
n ga joŋə lɩ̀à nətʋ.
Cɩ́gá, tə dáá, à yəri tə nii.
16 Yuu-Tiu Ba-Yígúrə́-Jə-Tiu,
n wá pa à tʋn yofaran,
yá à wá lìí n cɩcɩ cɩ́gá cwəŋə tə yoo!
17 Ooo à tíú Yɩɩ, n kàrɩ̀ nə à zandʋan mama,
yá də zə̀n mama, à tə swɩ̀n n yomɩlan tə yoo à bɩrɩ.
18 Sɩ́ʋ́n nə, à nə jìgə̀ bazʋnʋ, à yuu pɩ̀rɩ̀,
ooo à tíú Yɩɩ, n tə dàn ká vɩ nə n dʋgʋ.
Kʋ nətʋ wá pa à wànɩ́ à man n dɩ̀àn tə,
à bɩrɩ zə̀n lɩ̀à tə nə,
à ga man n dɩ̀àn tʋ̀tʋ̀nán tə,
à bɩrɩ ba tə nə, ba nə wá lɩra.
19 Ooo à tíú Yɩɩ,
n cɩ́gá cwəŋə tə dɩ̀gà ka yí bakwan.
Cɩ́gá, n tʋn yofaran!
À tíú Yɩɩ, wàà nə yɩ ndə n nə?
20 N mɩlɩ nə də jɩgwarʋ,
də yojanan yiri mama,
yá n tə wá pìí n pa nə mɩɩ.
N tə wá pa à pìí à nan bʋʋ nəfarʋ* tə wa.
21 N wá pa à na dun à súrí,
yá n kʋ́ʋ̀ wá kòrì nə!
22 Yá à mʋ̀ wá ja kwànʋ́, à ma bʋ n nə,
n nə yɩ pùə́ nədʋ tíú tə yɩrɩ.
À tíú Yɩɩ, à wá ja bànʋ́ à ma siən mʋ́,
n mʋ̀ Yɩzərayɛlə Yɩɩ tə, n nə yɩ parɩ.
23 À nii wá nun gwaran à ma siən mʋ́,
máŋá tə wa, à nə wulə à bwɩ n nə.
Cɩ́gá, n jon à mɩɩ tə.
24 Dɩɩn mama, à nəndəli wá swɩ̀n n cɩ́gá cwəŋə tə yoo,
də à bwɛ́.
Cɩ́gá, lɩ̀à tə yà nə pɩ̀à, sə yolwan yí nə,
dí cavɩra, ba kə ba yuu tɩa.