Pɩ̀ʋ́ kasweri gwaran
45
1 Gwàgá yáá tíú gwaran, ba nuŋə də kwanan. Kore bɩ̀á bʋra. Kasweri gwaran.
2 À bɩcan súə́ də sʋzəŋə.
À swɩ̀n də à gwaran tə yɩ à nuŋə à ma bwɩ pɩ̀ʋ́ tə nə!
À pɩ̀à sə à nii sʋ̀ràn tə ya ndə yənu tíú pʋ́pʋ́ná nə!
3 N zəni dwə bara tə mama,
pʋbwanʋ sʋ̀ràn súə́ n nii,
kʋ mʋ̀ nə pɩn,
Yɩɩ fwa zəni n yɩra máŋá mama.
4 Kwatarʋ babɩʋ, vwa n kwatara sɩ̀ʋ́ tə n taŋa nə.
Kʋ mʋ̀ nə bɩrɩ n dɩ̀àn tə, də n dun tə.
5 Cɩ́gá, n yɩ dun tíú!
Fan n zʋ n səsen kòrù tə wa,
cɩ́gá, də ka mun tɩ̀àn, də cɩ́gá cwəŋə yɩrɩ.
N jɩzən vàn tə wá tʋn yofaran kʋ bɩrɩ mʋ́.
6 N cɩan tə níə́ yɩ sɩsɩŋɩ.
Dwíə́ nəkaran* wá tʋ n nɛɛ də̀ń.
Cɩan tə wá zʋ pɩ̀ʋ́ dʋŋa bɩcanɩ wa.
7 À tíú Yɩɩ, n padaʋ tə wulə
máŋá mama wuuu, kʋ nə ba zwɛ̀.
N də́ pàrɩ̀ n lɩ̀à tə yuu wa, kʋ twá cɩ́gá nə.
8 N swə cɩ́gá cwəŋə, n ga culi wʋlʋŋʋ.
Kʋ mʋ̀ nə pɩn Yɩɩ tə,
ʋ nə yɩ n tíú Yɩɩ twɛ́n pupwən nʋga n yuu wa,
ʋ ma kúrí mʋ́ n duən wa.
9 Təən mala tɩralɩ, də alʋwɛsə tɩralɩ,
də kasə tɩralɩ lwán súə́ n gànàn tə mama.
Gwaran zɩla, ba nə san də ŋoni, seni mʋ́,
tə zɩ̀n n yuu yɩɩ nə, n padii tə wa,
ba nə nàn də won,
kʋ nə yɩ ndə tuu yelə yɩra nə.
10 Pabwɩɩ wulə n kana tə wa, n nə swə.
Pakan tə wulə n jɩzən vàn nə,
ʋ nàn ʋ tɩ̀àn də sɩ́án tə nə ba durən jə.
11 À bʋ̀á, guni n zɩɩn n cʋgʋ,
ywàń, n ga cʋgʋ zəni.
Swɛ̀ɛ́ n lʋʋ lɩ̀à, də n nyɩna dìə̀ yoo.
12 Pɩ̀ʋ́ tə swə mʋ́, n nə yɩ kabwaŋʋ tə yɩrɩ.
Ʋ nə yɩ n yuu-tiu tə yɩrɩ,
tʋ n nadwana yuu, ʋ yáá con, n pa wá dun.
13 Tirə tɩ̀án bʋ̀á,
lalʋʋ tə wa jɩjə tɩ̀án tə wá ja zìlə́ wiən,
ba ma càrà mʋ́.
14 Pɩ̀ʋ́ bʋ̀á tə jə dun zənzən padiə tə wa.
Ʋ gànàn yɩ ba sʋa də sɩ́án gaŋoni.
15 Ʋ zʋa gànpʋ̀pʋ̀nʋ̀,
ba ga ja wá ba zʋ pɩ̀ʋ́ tə con.
Ba ja ʋ kwa kacɩan tə nə yɩ ʋ twaduən,
ba ja zʋ pɩ̀ʋ́ tə con.
16 Ba ja ba ba zʋ də pupwən nəfarʋ, də ba jwɛ.
Ba zʋa pɩ̀ʋ́ tə padiə tə wa.
17 N bɩ̀á tə wá jon n nyɩna-ba yuu nə, dɩɩn don nə.
N wá tún ba, sə ba ya pàbɩ̀á, lʋʋ nii tə mama wa.
18 À wá pa ba lìí n yoo,
máŋá də máŋá mama wuuu, ləzoni dwíí wa.
Kʋ nətʋ dàń wá pa lʋʋ dwíə́ tə bʋ n nə,
máŋá mama wuuu, kʋ nə ba zwɛ̀.