Dàn ká vɩ nəba n dʋgʋ mɩ́ámɩ́án
44
1 Gwàgá yáá tíú gwaran. Kore bɩ̀á bʋra.
2 Ooo à tíú Yɩɩ, nə nì də nə zɩan,
nə nɩbara-ba man yìə̀n tə,
n nə tʋn ba máŋá wa,
fuən fuən nə, ba bɩrɩ nəba.
3 N dɩŋɩ dwíə́ nəkaran* tə,
n ga pa nə nɩbara-ba na bwálɩ́ ba jə̀ń.
N ken càn lʋʋ dwíə́ tə nə,
n ga pa n lɩ̀à tə lʋʋ nii wàlɩ̀.
4 Cɩ́gá, kʋ tà ba kwatara sɩ̀án nə pɩn ba ta lʋʋ nii tə ba də́,
kʋ tà ba vàn dɩ̀àn nə jon ba.
Kʋ yɩ n jɩzən vàn tə, də n yáá poni tə nə tʋn kʋ,
n nə swə ba yɩrɩ.
5 À tìù Yɩɩ, n mʋ̀ nə yɩ à pɩ̀ʋ́.
Pa nii, sə Zwakɔbə dwíí tə də́ dɩ̀àn.
6 N mʋ̀ nə pɩn nə dɩŋɩ nə jarɩduən tə.
Nə twá də n yɩrɩ tə, nə ma tɩtaga lɩ̀à tə,
ba nə zaŋa ba zɩga nə nə.
7 Cɩ́gá, kʋ tà à twan yuu wa à jələ,
kʋ ma tà à kwatara sɩ̀ʋ́ nə wá jon nə,
8 kʋ yɩ n mʋ̀ nə joŋə nəba, nə jarɩduən jɩɩn wa,
n ga pɩn cavɩra yí lɩ̀à tə, ba nə culi nəba.
9 Nə seni mʋ́ dɩɩn mama,
nə ga bwɩ n yɩrɩ tə nə, máŋá mama wuuu. Zɩgɩ sìí bwálɩ́
10 Yá də kʋ nətʋ mɛ, n vɩga nəba n dʋgʋ,
n pa nə də́ cavɩra.
N kʋ́ʋ̀ ba nə kwatara kwé, n ja naŋa.
11 N pɩn nə pìí nə kəni nə kwa, nə jarɩduən yáá con,
yá lɩ̀à tə nə culi nəba, dàń vɩrɩ nə wiən, ba joŋə.
12 N yá nəba, n pa nə dʋŋa nə,
ndə vanmɩnɩ nə, sə ba gʋ.
N pɩn nə laga duən yáá nə,
nə zʋ dwíə́ nəkaran tə wa.
13 N yoli n lɩ̀à tə bwàná yolu,
ba yolu tə ba nywarɩ jə kʋ pa mʋ́.
14 N yá n pa nə jənduən twɩn nəba,
lɩ̀à tə nə kɩkarɩ nəba mʋŋa nəba,
də ba fʋfʋlɩ nəba.
15 N pɩn nə jì yomaŋʋ, nə pa dwíə́ nəkaran nə,
lʋʋ dwíə́ tə zɛ ba vaparan nə yáá con.
16 À na də à wulə fʋfʋlʋ wa, máŋá mama,
cavɩra ga pɩn à kəni à yuu tɩa,
17 də à nə nì lìù tə kori,
ʋ nə twɩn nəba, də ʋ fʋfʋlɩ nəba,
nə à yə̀ə́ à nə nɩ dʋŋʋ tə,
də lìù tə nə fwi ʋ lɩŋa.
18 Yìə̀n təntə mama yí nəba,
yá nə wà n yoo swɛ̀ɛ́,
nə wà n nimarʋ tə cʋ̀gʋ̀.
19 Nə bɩcan wà viviri kʋ yá mʋ́,
nə nɛɛ wà yori tə dʋgʋ n cwəŋə tə.
20 Yá n tɩtaga nəba,
n pa nə wulə cirəkuri bʋran wa,
n ga pa tɩan ywarɩ pú nə yuu nə.
21 Nə yà nə swɛ̀ɛ́ n mʋ̀ nə Yɩɩ tə swɩa,
nə yà nə bon nə kə woŋwanan nə,
22 n mʋ̀ Yɩɩ tətə yà bá lwarɩ kʋ naaa?
Cɩ́gá, n yɩ Yɩɩ tə, n nə yə̀ə́ ləzwənə bɩcan yosəgu.
23 Yá kʋ yɩ n mʋ̀ yɩrɩ nə ba gwɩ nəba, dɩɩn mama,
ba ga jələ nəba ndə pee nə,
ba nə ja vələ nangʋra dìə̀ wa.
24 Zàn yɩɩ nə Yuu-Tiu!
Bɛ̀ɛ̀ nə pɩn n ma dwɛ̀?
Zàn dwiən nə!
Dàn ká vɩ nəba n dʋgʋ mɩ́ámɩ́án!
25 Bɛ̀ɛ̀ nə pɩn, n ma viviri n kwa, n ma sà nəba?
Bɛ̀ɛ̀ nə pɩn, n ma swɛ̀ɛ́ nə yinəgə tə, də nə càn tə yoo?
26 Cɩ́gá, nə tʋa tɩa pùrú wa,
nə tigə tɩa, nə bəbəli.
27 Zàn yɩɩ nə, n san nəba.
Jon nəba, n wʋywaŋʋ* tə yɩrɩ.