Lìù tə nə na tɩan ʋ yɩ́á yuu yɩjʋnɩ
28
1 Davidə gwaran.
Ba-Yígúrə́-Jə-Tiu, n mʋ̀ nə nə, à boŋə à keni.
N yɩ à pɩ̀ʋ̀!
Dàn ká swɩn n zɩan, à bubwiə tə yáá con.
N nə wà à con tan,
à wá jì ndə lɩ̀à tə nə, ba nə kəni libəri wa.
2 N dàń cʋgʋ à lòrí kori tə, à nə lòrì pwəpwə,
máŋá tə, à nə bubwi à kəni n nə,
à ga zɩ̀n à jɩ̀àn, à te n wúlú bwálɩ́ tə con.
3 Dàn ká cʋ̀gʋ̀ nə, n kə wʋlʋnyɩna,
də lɩ̀à tə wa, ba nə tʋŋa kʋ̀nkʋ̀n yìə̀n.
Ba yàá swɩ̀n sìə́ yoo ba jəndon con,
yá lwanɩ ga wulə ba bɩcan wa.
4 Ŋwɩ́n ba tʋtʋnɛɛ tə, də ba yolwana tə jɩŋɩ, ba yɩra.
Ŋwɩ́n kʋ tə ba jɩ̀àn nə tʋn tə jɩŋɩ, ba yɩra.
Ŋwɩ́n kʋ tə nə mɛ də ba jɩŋɩ, ba yɩra.
5 Cɩ́gá, ba ba Ba-Yígúrə́-Jə-Tiu tʋ̀tʋ̀nán tə jələ,
tə ga yɩ tʋ̀tʋ̀nán tə, ʋ jɩ̀àn nə tʋn.
Ba-Yígúrə́-Jə-Tiu wá dɩ ba tɩa,
yá ʋ bá pìí ʋ zɩ̀n ba yɩɩ nə!
6 À bwɩ Ba-Yígúrə́-Jə-Tiu nə!
Cɩ́gá, ʋ cʋga à lòrí kori tə, à nə lòrì pwəpwə.
7 Ba-Yígúrə́-Jə-Tiu nə yɩ à dɩ̀àn, də à natana.
Ʋ mʋ̀ nə nə à ken à waa, yá ʋ san nə.
À jwɛ də à waa mama,
à ga nuŋə, à ma bwɩ ʋ nə.
8 Ba-Yígúrə́-Jə-Tiu yɩ ʋ lɩ̀à tə dɩ̀àn.
Ʋ yɩ ndə dɩ̀àn dəkuu bwálɩ́ nə,
ʋ joŋə pɩ̀ʋ́ tə ʋ nə kúrí*.
9 Jon n lɩ̀à tə, n ga fwa zəni ba yɩra,
ba yɩ n mʋ̀ nə tɩ!
Ya ba cɩ̀rʋ́ də ba sáŋʋ́, máŋá mama wuuu!