Ba-Yígúrə́-Jə-Tiu con, fən ba nə jə
27
1 Davidə gwaran.
Ba-Yígúrə́-Jə-Tiu yɩ à poni, ʋ ga yɩ à jonu:
Wàà fən kʋ́ʋ̀ nə wá ja nə?
Ba-Yígúrə́-Jə-Tiu yɩ à mɩɩ tə yisəgə bwálɩ́:
Wàà fən nə, à kʋ́ʋ̀ wá dəri?
2 Yolwafwana nə yí à yɩra,
sə ba van nə ba vuri,
ba mʋ̀ lɩ̀à tə nə yɩ à jarɩduən, də à dʋŋa,
nə yàá mà ba nɛɛ, ba nan ba tʋ.
3 Kwatara púlí nə twí, ba pú nə ba kə sə ba ta,
à bɩcan bá vuvugə mancɩn tətə.
Yá ba nə swə ba zɩ̀n kʋ̀ʋ̀ də nə,
à jɩɩn tə wá ja dɩ̀àn, də kʋ nətʋ mɛ.
4 À lòrì won nədʋ Ba-Yígúrə́-Jə-Tiu con,
yá à pɩ̀à kʋ də à waa mama:
Kʋ mʋ̀ nə yɩ, sə à ya ʋ dìə̀ tə wa, à lʋʋ wúlú mama wa,
à ma balɩ Ba-Yígúrə́-Jə-Tiu dun tə,
yá à ga ywàŋá ʋ dìə̀ tə yuua.
5 Cɩ́gá, yobɩbɩlʋ dɩɩn nə, ʋ wá pú à yuu nə ʋ wúlú bwálɩ́ tə wa.
Ʋ wá səgə nə ʋ gansili tə də̀ń.
Ʋ wá zɩ̀n nə ʋ zɩgɩ pɩ̀ʋ̀ yupara wa.
6 Yá sɩ́ʋ́n nə, à dàń zɩga baan,
à ga ywàŋá à dʋŋa tə nə kɩkarɩ nə tɩa.
À wá fwa jwəŋə Ba-Yígúrə́-Jə-Tiu gansili tə wa,
à ma cèrí ʋ yuu nə,
à ga dɩ gwaran à ma siən wá.
7 Ba-Yígúrə́-Jə-Tiu, à lòrì sə n cʋgʋ à kori,
à boŋə à kəni n nə!
Fwa pubwanʋ à yɩra, n ga le nə!
8 À bʋŋa n sʋgʋ tə yoo, n nə swɩ̀n, n wʋ́:
«Á pɩ̀á à mʋ̀ Ba-Yígúrə́-Jə-Tiu yáá!»
Ooo, Ba-Yígúrə́-Jə-Tiu, à pɩ̀à n yáá tə!
9 Dàn ká səgə nə, n yáá tə!
Dàn ka ja lɩŋa, n yigu à mʋ̀ n tʋtʋnʋ tə, n kə kwa!
N mʋ̀ nə yɩ à sáŋʋ́,
dàn ká vɩ nə n dʋgʋ,
à jonu Yɩɩ!
10 À nyɩna də à nuu nə vɩga nə ba dʋgʋ,
Ba-Yígúrə́-Jə-Tiu mʋ̀ wá jon nə, ʋ ja.
11 Ba-Yígúrə́-Jə-Tiu, bɩrɩ nə n cwəŋə tə,
kə nə cwəŋə wa, ka wa nə ba yoo jə,
lɩ̀à nə bʋlɩ à nə yɩrɩ.
12 Dàn ká yá n pa à jarɩduən ja nə, ba ma tʋn ba fɩra,
Cɩ́gá, kʋ̀nkʋ̀n dansɩa lɩ̀à zàn ba zɩga à nə,
yá ba yɩ ba fʋrɩ də wʋlʋŋʋ.
13 Ooo! Bɛ̀ɛ̀ yà nə wá yí nə,
də à yà nə ba yala jə,
də à wá na Ba-Yígúrə́-Jə-Tiu wʋywaŋʋ* tə,
də à mɩɩ tə wulə lʋʋ wa!
14 Kə n yala Ba-Yígúrə́-Jə-Tiu nə!
Pa n jɩɩn dàn, n ga ja wʋdɩʋ!
Kə n yala Ba-Yígúrə́-Jə-Tiu nə!