Lìù tə nə pɩ̀à sə ʋ lwarɩ Yɩɩ fɩra yɩjʋnɩ
25
1 Davidə gwaran.
Ba-Yígúrə́-Jə-Tiu, à viviri à pubʋŋa tə, à kə n con.
2 À tíú Yɩɩ, à yá à tɩ̀àn n jɩɩn wa,
dàn ká yá n pa à də́ cavɩra!
Dàn ká pa à dʋŋa mʋn nə!
3 Lɩ̀à tə mama, ba nə jələ n yuu wa, bá də́ cavɩra.
Yá cavɩra wá yí lɩ̀à tə mʋ̀, ba nə yɩ pwìí bələ tɩ̀án,
yá kʋ ba nywarɩ jə kʋ pa ba.
4 Ba-Yígúrə́-Jə-Tiu, pa sə à lwarɩ n coŋi tə.
Bɩrɩ nə, n nə swə sə à ya nətʋ.
5 Pa sə à va n cɩ́gá tə wa, n ga kàrɩ̀ nə.
Cɩ́gá, n yɩ Yɩɩ tə, n nə joŋə nə,
yá n mʋ̀ yuu wa nə à jələ, dɩɩn mama.
6 Ba-Yígúrə́-Jə-Tiu, bʋ́n n nə dəri lɩ̀à yinəgə,
n ga yɩ wʋywanyiən tə yoo!
Cɩ́gá, mə n yɩ nətʋ, máŋá mama wuuu.
7 Dàn ká bʋ́n à zandʋan cʋna tə, də à yolwana tə yoo.
Yá n dàń tàá n wʋywaŋʋ* tə də n zəni tə yɩrɩ,
n ga bʋ́n à yoo, Ba-Yígúrə́-Jə-Tiu!
8 Ba-Yígúrə́-Jə-Tiu ziən zənzən, ʋ ga yɩ mənəmənə.
Kʋ mʋ̀ nə pɩn, ʋ ma bɩrɩ cwəŋə cʋna lɩ̀à nə.
9 Ʋ pɩn labwana vəli cɩ́gá cwəŋə wa,
ʋ ga kàrɩ̀ ba, ʋ cwəŋə tə yoo.
10 Ba-Yígúrə́-Jə-Tiu coŋi tə mama yɩ wʋywaŋʋ də cɩ́gá cɩcɩ,
tə pa lɩ̀à tə nə, ba nə zìlí ʋ nimarʋ tə,
də yìə̀n tə ʋ nə pɩn nii, sə ba twá tə nə.
11 Kʋ yɩ n mʋ̀ tətə Ba-Yígúrə́-Jə-Tiu yɩrɩ nə, n wá tà,
n ma yá à yolwan tə, n pa kʋ kɛ̀ń.
Cɩ́gá, à yolwan tə lwara zənzən.
12 Lìù nə dəri Ba-Yígúrə́-Jə-Tiu fən,
Ba-Yígúrə́-Jə-Tiu yàá bɩrɩ wá cwəŋə tə,
ʋ nə mɛ sə ʋ kúrí ʋ tì.
13 Ʋ jə̀rə́ wá sìí ywánɩ́ wa,
yá ʋ dwíí wá tɩnɩ lʋʋ nii tə.
14 Ba-Yígúrə́-Jə-Tiu yàá bɩrɩ ʋ waa yoo lɩ̀à tə nə, ba nə dəri ʋ fən,
sə ʋ ma pa ba lwarɩ ʋ nimarʋ tə.
15 À yɩ́á ywàŋá Ba-Yígúrə́-Jə-Tiu con máŋá mama.
Cɩ́gá, ʋ mʋ̀ nə lɩ à nɛɛ gəgəlu tə wa, kʋ nə jɩn nə.
16 Vəvəri n yáá n kə à con, n ga fwa pubwanʋ à yɩra.
Cɩ́gá, à yɩ à cɩcɩ, à ga yɩ yinənyiən.
17 Twárá súə́ à bɩcan,
à lòrì sə n jon nə à jɩgwarʋ tə wa.
18 Ywàń à yinəgə tə də à càn tə nə yɩ nətʋ,
n ga kwɛn à cʋna tə mama, n lɩ.
19 Ywàń à dʋŋa tə nə dáá ba mɛ nətʋ,
də wʋlʋŋʋ dʋŋɩ tə yiri, ba nə dʋŋa nə.
20 Ywàń à jə̀rə́ tə yuu, n ga jon nə!
Cɩ́gá, n mʋ̀ con nə, à kwálɩ́ à yuu,
kʋ mʋ̀ yɩrɩ, dàn ká yá n pa à də́ cavɩra!
21 Pa sə ka ya təgətəgə, də ka ya mənəmənə cɩ̀ à nə!
Cɩ́gá, n mʋ̀ yuu wa nə à jələ!
22 Ooo à tíú Yɩɩ, à lòrì mʋ́, sə jon Yɩzərayɛlə lɩ̀à tə!
Jon ba, ba jɩgwarʋ tə mama wa!