Ba-Yígúrə́-Jə-Tiu zʋa ʋ dìə̀ tə wa
24
1 Davidə gwaran.
Ba-Yígúrə́-Jə-Tiu nə tɩ tɩa tə, də ka yuu wiən tə,
ʋ mʋ̀ ga nə tɩ lʋʋ tə, də kʋ waa ləzoni tə!
2 Cɩ́gá, ʋ mʋ̀ nə fwa tɩa tə mʋran tə yuu wa,
ʋ ga pa ka zɩga zəni, mʋnɛɛ tə yuu wa.
3 Wàà nə wàá Ba-Yígúrə́-Jə-Tiu paan tə yuu wa ʋ dɩ̀?
Wàà nə wàá ʋ bwálɩ́ tə wa kʋ nə yɩ parɩ ʋ zɩga?
4 Kʋ yɩ lìù tə, ʋ jɩ̀àn nə wà yolwan tʋn, ʋ bɩcan ga ba durən jə.
Kʋ yɩ lìù tə, ʋ nə ba ʋ pubʋŋa kʋ̀nkʋ̀n yìə̀n nə keni,
ʋ ga ba Yɩɩ dwì, sə ʋ ma gɩgɩrɩ lɩ̀à.
5 Ba-Yígúrə́-Jə-Tiu yàá fwa zəni kʋ tíú yɩra,
yá ʋ tíú Yɩɩ tə, ʋ nə yɩ ʋ jonu wá bʋ̀rɩ̀ ʋ pa wá.
6 Mə lɩ̀à tə, ba nə pɩ̀à Yɩɩ yɩ nətʋ yiri.
Ba tə nə twi n mʋ̀ Ba-Yígúrə́-Jə-Tiu yáá con,
nə yɩ Zwakɔbə dwíí cɩ́gá cɩ́gáa! Zɩgɩ sìí bwálɩ́.
7 Á zɩan á yuu yɩɩ nə, mimien-bab!
Á wala á súrí lá, á mʋ̀ dí yáá lɩ̀à mimien tə,
sə dun pɩ̀ʋ́ tə wànɩ́ ʋ zʋ!
8 Wàà nə yɩ dun pɩ̀ʋ́ təntə?
Kʋ yɩ Ba-Yígúrə́-Jə-Tiu:
Ʋ yɩ babɩʋ, ʋ ga yɩ ladɩa.
Kʋ yɩ Ba-Yígúrə́-Jə-Tiu:
Ʋ yɩ kwatarʋ babɩʋ.
9 Á zɩan á yuu yɩɩ nə, mimien-ba!
Á wala á súrí lá, á mʋ̀ dí yáá lɩ̀à mimien tə,
sə dun pɩ̀ʋ́ tə wànɩ́ ʋ zʋ!
10 Wàà ga nə yɩ dun pɩ̀ʋ́ təntə?
Kʋ yɩ Ba-Yígúrə́-Jə-Tiu, ʋ nə yɩ kwatara Yɩɩ.
Mə ʋ mʋ̀ nə yɩ dun pɩ̀ʋ́ tə! Zɩgɩ sìí bwálɩ́.