Zəni tə̀lə́ ləzoni pwə́rə́ wa
14
1 Gwàgá yáá tíú gwaran. Davidə gwaran.
Ləbibənu yàá swɩ̀n ʋ waa con, ʋ wʋ́:
«Yɩɩ tə̀lə́ mɩ́ámɩ́án!
Ləzoni cʋ̀gʋ̀, ba tʋŋa yobalwaran,
Lìù tə̀lə́ ba wa, ʋ nə tʋŋa zəni.
2 Ba-Yígúrə́-Jə-Tiu jə̀ə́ lanworu tə wa,
ʋ ga guni ʋ ywàŋá ləzoni,
sə ʋ jə́n pubʋŋa tíú wulə ba wa,
ʋ nə pɩ̀à ʋ mʋ̀ Yɩɩ naaa.
3 Ba mama dwá cwəŋə,
ba ga twá duən ba zʋ tʋtʋnkʋkwɩnan wa.
Lìù tə̀lə́ ba wa, ʋ nə tʋŋa zəni,
ladʋa tətə tə̀lə́.
4 Ba mʋ̀ lɩ̀à təntə mama, ba nə tʋŋa yolwana, yɩ ləyirən naaa?
Ba mʋ̀ lɩ̀à təntə, ba nə ja à lɩ̀à tə wodiu, ba ma kʋ̀nɩ̀ ba tɩ̀àn,
ba ga ba à mʋ̀ Ba-Yígúrə́-Jə-Tiu nə boŋə ba keni.
5 Yá fən dàń jə ba, ba vɩvaga,
ba nə nɩ də, Yɩɩ wulə cɩ́gá tɩ̀án kwa yɩrɩ.
6 Á yàá gugurə yinənyiən pubʋŋa yìə̀n,
yá Ba-Yígúrə́-Jə-Tiu con nə, ʋ kwálɩ́ ʋ yuu.
7 Wàà nə wá nan Siyon* paan tə yuu wa, ʋ bà ʋ jon Yɩzərayɛlə lɩ̀à tə?
Máŋá tə Ba-Yígúrə́-Jə-Tiu nə wá jon ʋ lɩ̀à tə wa ywə́ŋə́ tə, ʋ ja pìí ʋ bà,
Zwakɔbə dwíí tə wá jwɛ,
Yɩzərayɛlə lɩ̀à tə wá làrɩ̀.