Yuu-Tiu, máŋá kwà wa nə, n wá bʋ́n à yoo?
13
1 Gwàgá yáá tíú gwaran. Davidə gwaran.
2 Ba-Yígúrə́-Jə-Tiu, n wá swɛ̀ɛ́ à yoo, kʋ dán kʋ mɛ nətə?
N wá pú n yɩ́á à yuu wa, kʋ dán kʋ mɛ nətə?
3 N wá yá, n pa à jə̀rə́ tə ya twara wa,
à bɩcan ga ya pucʋnɩ nəfarʋ wa, dɩɩn mama, kʋ dán kʋ mɛ nətə?
N wá yá n pa à dʋŋʋ də́ dɩ̀àn à yuu wa, kʋ dán kʋ mɛ nətə?
4 Ba-Yígúrə́-Jə-Tiu, à tíú Yɩɩ, dəri à yinəgə, n ga san nə!
Pori à yɩ́á, sə à dàn ká tʋ tɩan jɩɩn wa.
5 Kʋ nə tà nətʋ, à dʋŋʋ wá swɩ̀n də, ʋ dí dɩ̀àn à yuu wa,
yá à nə tʋa, à jarɩduən də wá jwɛ.
6 À mʋ̀ yɩ n wʋywaŋʋ* tə yuu wa nə, à jələ.
Yá à bɩcan súə́ də pupwən, n nə yɩ à jonu tə yɩrɩ,
à ga wá nun, à ma bʋ n mʋ̀ Ba-Yígúrə́-Jə-Tiu nə,
zəni tə yɩrɩ, n nə tʋn à yɩra.