Ləzoni yɩ kʋ̀nkʋ̀na, yá Yɩɩ mʋ̀ yɩ cɩ́gá tíú
12
1 Gwàgá yáá tíú gwaran, ba nə nuŋə də bànʋ́, kʋ nə jə ŋoni nana. Davidə gwaran.
2 Ba-Yígúrə́-Jə-Tiu, bà jon nəba!
Cɩ́gá, lɩ̀à tə nə yɩ cɩ́gá tɩ̀án kʋ́ʋ̀ tə̀lə́,
pùə́ nədʋ tɩ̀án wulə ba jɛ́n ləzoni titəŋi wa.
3 Kʋ̀nkʋ̀n nə ba kʋ̀nɩ̀ ba bɩrɩ duən nə.
Ba níə́ yɩ ba ma gɩgarɩ duən,
ba ga jə pubʋŋɩ bələ bələ ba bɩcanɩ wa.
4 Ba-Yígúrə́-Jə-Tiu wá pa lɩ̀à tə mama, ba nə gɩgarɩ lɩ̀à,
də ba tə nə swɩ̀n fwìə́ sʋ̀ràn nyʋn tɩa yuu wa.
5 Ba mʋ̀ lɩ̀à tə, ba nə swɩ̀n, ba wʋ́:
«Nə nii sʋ̀ràn wá pa nə də́ dɩ̀àn!
Nə nii yə̀ə́ sʋgʋ, lìù mama fən ba nəba jə!»
6 Ba-Yígúrə́-Jə-Tiu swɩ̀n, ʋ wʋ́:
«Ba nə fɩfɩn yinənyɩna də zʋra,
ba pa ba kwi ba sisigə tə yɩrɩ,
sɩ́ʋ́n nə, à dàń zàn yɩɩ nə,
sə à jon ba mʋ̀ labwana təntə,
ba nə pìì mɩmɩan ba kəni ba nə.»
7 Ba-Yígúrə́-Jə-Tiu sʋ̀ràn tə yɩ cɩ́gá cɩcɩ.
Tə yɩ ndə wárʋ́ nə, ba nə nyɩan mən wa,
ba lɩ kʋ durən nɛɛ barpɛ.
8 N mʋ̀ Ba-Yígúrə́-Jə-Tiu yàá ywàŋá yinənyɩna yuu.
Nə dàń lòrì mʋ́, sə n cɩ̀ nəba, də ba mʋ̀ ləzwənyiri tə, máŋá mama.
9 Wʋlʋnyɩna súə́ tɩa mama,
kʋ pa cʋna də́ dɩ̀àn ləzoni titəŋi wa.