Lìù tə nə jələ Yɩɩ yuu wa gwaran
11
1 Gwàgá yáá tíú gwaran. Davidə gwaran.
Ba-Yígúrə́-Jə-Tiu con nə, à kwálɩ́ à yuu.
Á fwa nətə, á swɩ̀n à con, á wʋ́:
«Dəri lala, ndə zuŋə nə piri, n va n səgə á pɛɛn tə wa?
2 Cɩ́gá, nə̀ń wʋlʋnyɩna van twan ba dɩ̀,
ba ken ba fɩlɩ twamɩa nə,
sə ba ma ta lɩ̀à yikunu wa, ba bɩcanɩ nə yɩ mənəmənə.
3 Won dəkuu nə gùrì,
bɛ̀ɛ̀ nə cɩ́gá tíú wàá ʋ fwa?
4 Ba-Yígúrə́-Jə-Tiu wulə ʋ sàń tə wa,
kʋ nə yɩ parɩ.
Ba-Yígúrə́-Jə-Tiu jə ʋ padɔɔ, lanworu tə wa.
Ʋ yɩ́á pàá won mama yuu,
ʋ zəŋə ləzoni bɩcan.
5 Ba-Yígúrə́-Jə-Tiu zəŋə cɩ́gá tíú, də wʋlʋnyiən mɛ bɩcan,
yá ʋ culi lìù tə ʋ nə swə wʋlʋŋʋ.
6 Ʋ wá pa məncala, də mənvwə, də jiribu lwá wʋlʋnyɩna yuu wa, ndə dwà nə.
Vʋʋ tə nə lɩŋa, nə wá ya ba ŋwɩ́rán.
7 Cɩ́gá, Ba-Yígúrə́-Jə-Tiu yɩ cɩ́gá tíú,
ʋ swə tʋtʋnɛɛ tə nə tì cɩ́gá cwəŋə.
Lɩ̀à tə nə yɩ mənəmənə yàá na ʋ yáá.