Lìù tə nə lòrì, sə Yɩɩ jon wá dʋŋa jɩɩn wa yɩjʋnɩ
10
1 Ba-Yígúrə́-Jə-Tiu, bɛ̀ɛ̀ nə pɩn n ma wulə yiŋʋnɩ də nə?Bɛ̀ɛ̀ nə pɩn n ma səgə à yáá nə, jɩgwarʋ máŋá wa?
2 Wʋlʋnyɩna kán yinənyɩna ba kə, ba fɩfɩn də fwiə,
yá pwìí bələ yìə̀n tə ba nə tʋŋa, wá pìí tə ja ba tətə.
3 Cɩ́gá, wʋlʋnyiən yàá bwɩ ʋ tɩ̀àn nə, ʋ fɩra yìə̀n yɩrɩ,
yá gɩgɩrɩnyiən yɩ ʋ zɩrɩ ʋ kəni Ba-Yígúrə́-Jə-Tiu nə, də ʋ fʋfʋlɩ wá.
4 Wʋlʋnyiən yɩrʋ tə pɩn, ʋ yàá kʋ́ʋ̀ ba Yɩɩ yoo bʋŋa.
Ʋ yàá bʋŋa də Yɩɩ tə̀lə́! Mə ʋ pubʋŋa mama nə.
5 Ʋ tʋŋa ʋ yìə̀n, tə nii swí máŋá mama,
kʋ pa ʋ bʋŋa də, n mʋ̀ Yɩɩ bʋra tə ŋʋ́ná də wá zənzən, ka wàrɩ̀ wá ka janɩ.
Yá ʋ dàń yàá bànɩ̀ ʋ jarɩduən tə mama.
6 Ʋ yàá swɩ̀n ʋ waa con, ʋ wʋ́: «Yoo mama wàrɩ̀ nə kʋ vuvugə!
Máŋá də máŋá mama wuuu, yolwan wàrɩ̀ à mʋ̀ kʋ yí, də mama!»
7 Zɩra, də gɩgɩra, də ŋwɩ̀rɩ̀ sʋ̀ràn nə súə́ ʋ nii.
Ʋ nəndəli yɩ yolwana, də kʋ̀nkʋ̀n yìə̀n nə kʋ swɩ̀n.
8 Ʋ yàá səgə tɩbii tə nii nə, ʋ ja lɩ̀à, kʋ dɩ̀ ba yuu.
Ʋ yàá gʋ lìù tə nə wà yoo cʋ̀gʋ̀, bwálɩ́ nə, kʋ nə səgə.
Ʋ yɩ́á yɩ tə pàlɩ̀ labwanʋ, máŋá mama.
9 Ʋ yàá səgə ʋ ja lɩ̀à, ndə gəru nə, kʋ yisəgə bwálɩ́ nə.
Ʋ səgə sə ʋ ja yinənyiən, kʋ dɩ̀ ʋ yuu.
Ʋ yàá yɩ̀rɩ̀ yinənyiən, ʋ ja va ʋ kə ʋ gəgəlu tə wa, ʋ ja.
10 Wʋlʋnyiən tə yàá kwá tɩa, ʋ woli tɩa,
yá ʋ dàń yàá fan ʋ tʋ labwana tə yuu wa, də ʋ dɩ̀àn mama.
11 Ʋ yàá swɩ̀n ʋ waa con: «Yɩɩ swɛ̀ɛ́!
Yɩɩ púə́ ʋ yáá nə, ʋ bá na kʋ tə à nə tʋn tə mɩ́ámɩ́án!»
12 Zàn yɩɩ nə, Ba-Yígúrə́-Jə-Tiu! Yɩɩ, zɩ̀n n jɩɩn yɩɩ nə,
dàn ká swɛ̀ɛ́ labwana yoo!
13 Bɛ̀ɛ̀ nə pɩn wʋlʋnyiən ma fʋfʋlɩ Yɩɩ,
ʋ ga swɩ̀n ʋ waa con, ʋ wʋ́: «Yɩɩ bá bwe nə kabwiekabwie?»
14 Yá n mʋ̀ Yɩɩ nɩ yinəgə tə, də càn tə, lalaŋa nə də́,
n ga ywàŋá ba yuu, sə n jon ba.
N mʋ̀ jɩɩn wa nə, labwanʋ yá ʋ tɩ̀àn.
N mʋ̀ nə yɩ bitarʋ sáŋʋ́.
15 Kɛ́n wʋlʋnyiən də yolwafwanʋ vàn, n ga kə ba càn wa.
Yá n nə twárɩ́ ba yolwana tə, n kʋ́ʋ̀ bá na tə!
16 Ba-Yígúrə́-Jə-Tiu yɩ pɩ̀ʋ́ máŋá mama wuuu.
Dwíə́ nəkaran* tə wá nyʋn tɩa, ʋ lʋʋ nii tə wa.
17 Ba-Yígúrə́-Jə-Tiu, n yə̀ə́ kʋ tə labwana nə pɩ̀à!
N daŋa ba bɩcan, n ga cʋga ba con,
18 sə n bʋ̀rɩ̀, n pa cɩ́gá bitarʋ, də lìù tə nə, ba nə fɩfɩn.
Yá kʋ wá pa, tɩa yuu ləzwənə kʋ́ʋ̀ bá pa fən ja lɩ̀à.