Ba-Yígúrə́-Jə-Tiu yɩ lalaŋa də labwana jonu
9
1 Gwàgá yáá tíú gwaran, ba nə nuŋə də kobɩa. Davidə gwaran.
2 À wá bʋ Ba-Yígúrə́-Jə-Tiu nə, də à waa mama,
yá à wá swɩ̀n n tʋtʋnzəŋə tə mama yoo, də à bwɛ́.
3 N pɩn à sú də pupwən, à ga jwɛ.
À wá nun à ma siən n mʋ̀ Baan Yɩɩ yɩrɩ tə!
4 N pɩn à dʋŋa tə pìí ba dəri,
ba mà ba nɛɛ, ba naŋa ba twɩ ba tɩ, n yáá con.
5 Cɩ́gá, n mʋ̀ nə tɛ n pɩn nə, n ga bʋ̀rɩ̀, n pɩn nə cɩ́gá.
N yɩ bʋra lìù tə, n nə jə̀ə́ n padaʋ tə yuu,
n bʋ̀rɩ̀ bʋra, n pɩn ka twá cɩ́gá nə.
6 N caga dwíə́ nəkaran* tə nii nə, n ga pɩn wʋlʋnyiən tɩ.
N pɩn ba yɩrɩ jɛ́n mɩ́ámɩ́án.
7 Dʋŋa kʋ́ʋ̀ tə̀lə́! N cʋ̀gʋ̀ ba mɩ́ámɩ́án!
N cʋ̀gʋ̀ ba tɩan tə də mɩ́ámɩ́án,
lìù mama kʋ́ʋ̀ bá lìí ba yoo.
8 Ba-Yígúrə́-Jə-Tiu jə̀ə́ ʋ padaʋ tə yuu, máŋá mama wuuu.
Ʋ tún ʋ padaʋ tə, sə ʋ ma bʋ̀rɩ̀ bʋra.
9 Ʋ mʋ̀ nə ywàŋá lʋʋ tə yuu də cɩ́gá,
ʋ ga bʋ̀rɩ̀ lʋʋ dwíə́ tə bʋra, kʋ twá cɩ́gá nə, ndə kʋ nə mɛ nətʋ.
10 Ba-Yígúrə́-Jə-Tiu yɩ ndə dɩ̀àn dəkuu bwálɩ́ nə,
ʋ pa lìù tə nə, ba nə fɩfɩn.
Ʋ yɩ dɩ̀àn dəkuu bwálɩ́, jɩgwarʋ máŋá wa.
11 Kʋ mʋ̀ nə pɩn, lɩ̀à tə nə yə̀ə́ mʋ́, jələ n yuu wa.
Cɩ́gá, n mʋ̀ Ba-Yígúrə́-Jə-Tiu ba lɩ̀à tə nə pɩ̀à mʋ́ vɩ n dʋga!
12 Á nuŋə á ma siən Ba-Yígúrə́-Jə-Tiu,
ʋ nə də́ pàrɩ̀ Siyon* nə!
Á swɩ̀án ʋ tʋtʋnfaran tə yoo á bɩrɩ, lʋʋ dwíə́ tə titəŋi wa!
13 Cɩ́gá, ʋ yàá bʋ́n lɩ̀à tə ba nə gʋa yoo,
ʋ ga fwi ʋ lɩŋa, lagʋra tə yuu wa.
Ʋ ba yinənyɩna bubwiə yoo swɛ̀ɛ́.
14 À lòrì, sə n fwa pubwanʋ à yɩra, Ba-Yígúrə́-Jə-Tiu!
Ywàń à yinəgə tə nyɩɛn, lɩ̀à tə nə culi nə, nə pɩn à də́!
À lòrì, sə n van nə, n lɩ tɩan bʋʋ wa,
15 sə à pìí à swɩ̀n yìə̀n tə mama, à nə bwɩ n nə tə yɩrɩ,
Siyon bʋ̀áa tə mimien nə.
Yá à wá jwɛ, n nə yɩ à jonu yɩrɩ.
16 Dwíə́ nəkaran tə tʋa pwìí bələ yoo tə wa, ba nə tʋn.
Ba dɩga ba nɛɛ gəgəlu tə wa, ba tətə nə səgə ba vwa.
17 Ba-Yígúrə́-Jə-Tiu pɩn ba lwarɩ wá,
ʋ bʋ̀rɩ̀ bʋra, ʋ pa ka tì cɩ́gá cwəŋə.
Ʋ pɩn wʋlʋnyiən tʋ ʋ tətə nyalɩ tə wa. Gwaran zɩla dwíú, \qs də zɩgɩ sìí bwálɩ́.
18 Yɩɩ wá pa wʋlʋnyɩna tə va ciru*.
Ba mʋ̀ dwíə́ nəkaran təntə mama, ba nə swɛ̀ɛ́ Yɩɩ yoo.
19 Yá Yɩɩ ba zʋrʋ mʋ̀ yoo swɛ̀ɛ́, máŋá mama wuuu,
yinənyiən də yala ma ba zwɛ̀ mɩ́ámɩ́án.
20 Zàn yɩɩ nə, Ba-Yígúrə́-Jə-Tiu! Dàn ká yá, n pa ləzwənə də́ dɩ̀àn!
Bʋ̀rɩ̀ dwíə́ nəkaran tə bʋra, n yáá con!
21 À lòrì, sə n pa fən zʋ ba, Ba-Yígúrə́-Jə-Tiu!
Pa sə ba yəni də, ba yɩ ləzoni, ba tà kaka! Zɩgɩ sìí bwálɩ́.