Lìù tə nə lòrì, sə Yɩɩ jon wá dʋŋa jɩɩn wa yɩjʋnɩ
7
1 Lúə́ pucʋnɩ gwaran tə Davidə nə dɩga, ʋ ma bon ʋ kə Ba-Yígúrə́-Jə-Tiu nə, kʋ tə yɩrɩ, Kuswə, ʋ nə yɩ Bɛnzwamɛn dwíí lìù, nə swɩ̀n.
2 Ba-Yígúrə́-Jə-Tiu, à tíú Yɩɩ,
n mʋ̀ con nə à twarɩ bwálɩ́ tə, à nə wá kwálɩ́ à yuu.
Jon nə lɩ̀à tə mama jɩɩn wa, ba nə fɩfɩn nə,
n pa à tɩnɩ à tɩ̀àn.
3 Kʋ nə tà nətʋ, ba wá van nə ba cɩrɩ, ndə gərən nə,
yá lìù mama bá wànɩ́ nə ʋ jon.
4 Ba-Yígúrə́-Jə-Tiu, à tíú Yɩɩ,
də à cɩ́gá nə tʋn yoo təntə, ba nə caga à nii nə kʋ yɩrɩ,
də à jɩ̀àn nə tʋn cʋna,
5 nə à yə̀ə́ à nə tʋn yolwan lìù yɩra, à də wá nə ba yoo duən nə jə,
nə à yə̀ə́ à nə vɩrɩ à jarɩdon wiən də dɩ̀àn, yá ʋ wà à con kena,
6 sə Yɩɩ yá, sə à dʋŋʋ dɩŋa nə ʋ ja,
ʋ nɩŋa naa à bɩan nə, ʋ marɩ tɩa, də à tə wà tɩ,
ʋ ga tùrì nə pùrú wa, ʋ pa à kwɩ̀n à dun tə nə! Zɩgɩ sìí bwálɩ́.
7 Ba-Yígúrə́-Jə-Tiu, zàn yɩɩ nə də lɩŋa!
Zàn yɩɩ nə, n cɩ̀ à jarɩduən tə lɩŋa nəfarʋ tə yáá nə.
Súrí n yɩ́á à yuu wa, n mʋ̀ nə tún cɩ́gá cwəŋə!
8 Pa lʋʋ dwíə́ tə mama kɩkarɩ mʋ́!
N dàń jə̀ń lanworu wa, n də́ pàrɩ̀ ba yuu wa!
9 Ba-Yígúrə́-Jə-Tiu, n mʋ̀ nə bʋ̀rɩ̀ lʋʋ dwíə́ tə bʋra.
À lòrì mʋ́, sə n bʋ̀rɩ̀ à bʋra,
kʋ twá à nə yɩ mənəmənə, à ga yɩ təgətəgə tə nə!
10 Pa wʋlʋnyɩna yolwana tə cən tə zɩgɩ,
n ga kə dɩ̀àn cɩ́gá tíú jɩɩn wa!
N mʋ̀ Yɩɩ nə yɩ cɩ́gá tíú!
N yə̀ə́ ləzoni pubʋŋɩ də ba bɩcanɩ nə yɩ nətʋ.
11 À mʋ̀ nàtànà yɩ ka wulə Yɩɩ con.
Ʋ mʋ̀ nə joŋə lɩ̀à tə, ba bɩcanɩ nə yɩ mənəmənə.
12 Yɩɩ yɩ lìù tə, ʋ nə bʋ̀rɩ̀ bʋra, kʋ twá cɩ́gá nə.
Ʋ yɩ Yɩɩ tə, ʋ lɩŋa nə wàá tə zaŋa dɩɩn mama.
13 Wʋlʋnyiən nə wà lwàń, Yɩɩ wá lɩ ʋ kwatara sɩ̀ʋ́ nii,
ʋ ga van ʋ twan, ʋ dɩ̀.
14 Ʋ tanɩ tɩan kwatarɩ zɩla, də cɩan, tə nii nə jə mən.
15 Á nəŋə, lìù nə tanɩ yolwan,
ʋ yàá ja cʋna pùə́, yá ʋ yàá lɩra kʋ̀nkʋ̀n.
16 Lìù nə tʋn pwìí bələ yoo,
kʋ yàá pìí kʋ ja ʋ tətə.
17 Ʋ cʋna tə yàá pìí tə tʋ ʋ tətə yuu wa,
yá ʋ wʋlʋŋʋ tə yàá pìí kʋ mà ʋ tətə yáá wa.
18 À wá bʋ Ba-Yígúrə́-Jə-Tiu nə,
ʋ nə yɩ cɩ́gá tíú tə yɩrɩ.
À wá dɩ gwaran à ma siən Ba-Yígúrə́-Jə-Tiu,
ʋ nə yɩ Baan Yɩɩ, yɩrɩ tə.