Lìù tə nə lòrì yazurə Yɩɩ con yɩjʋnɩ
6
1 Gwàgá yáá tíú gwaran, ba nə nuŋə də gwaran zɩla, ba nə sán də ŋoni. Ba nuŋə tə də bànʋ́, kʋ nə jə ŋoni nana. Davidə gwaran.
2 Ba-Yígúrə́-Jə-Tiu, dàn ká kə nə càn wa, də lɩŋa.
Dàn ká fɩrɩ nə, n kə cwəŋə wa, də lɩŋa tə nə fʋrɩ.
3 Fwa pubwanʋ à yɩra, Ba-Yígúrə́-Jə-Tiu.
Cɩ́gá, à ba dɩ̀àn jə.
Pa nə yazurə, Ba-Yígúrə́-Jə-Tiu!
Cɩ́gá, à kurən tə mama vɩvaga.
4 À jə̀rə́ tə mama vɩvaga.
Máŋá kwà wa nə, n mʋ̀ Ba-Yígúrə́-Jə-Tiu wá dəri à yinəgə?
5 Ba-Yígúrə́-Jə-Tiu, pìí bà n jon à jə̀rə́ tə.
Tàá n wʋywaŋʋ* tə yɩrɩ, n jon nə.
6 Cɩ́gá, lìù nə tɩga, ʋ kʋ́ʋ̀ wàrɩ̀ n yoo ʋ bʋŋa.
Wàà nə wàá n nə ʋ bwɩ ciru* nə?
7 À surə tə pɩn à dɩ̀àn zwɛ̀.
Tɩtɩn mama, à yàá kwi, à yinɩa pàlɩ̀, à gədoo yuu.
À yinɩa yàá və à yipaa bwálɩ́.
8 Pucʋnɩ nəfarʋ tə pɩn à yɩ́á cʋ̀gʋ̀.
À jarɩduən tə dáá zənzən,
kʋ pa à yɩ́á tə dɩ̀àn wulə tə zwɛ̀.
9 Á naŋa kwa à yáá con, á mʋ̀ yolwafwana tə mama.
Cɩ́gá, Ba-Yígúrə́-Jə-Tiu nì à kwirə tə.
10 Ba-Yígúrə́-Jə-Tiu nì à lòrí tə.
Ba-Yígúrə́-Jə-Tiu sɛ̀ à yɩjʋnɩ tə.
11 À dʋŋa tə mama wá də́ cavɩra, ba ga vɩvaga.
Ba wá də́ cavɩra, ba ga pìí ba kə ba kwa, naa nədʋ.