Lìù tə nə jə cwəŋə, sə ʋ zʋ Ba-Yígúrə́-Jə-Tiu dìə̀ tə wa yɩjʋnɩ
5
1 Gwàgá yáá tíú gwaran, ba nə nuŋə də wii. Davidə gwaran.
2 Ba-Yígúrə́-Jə-Tiu, à lòrì mʋ́, sə n cʋgʋ à sʋ̀ràn tə!
Nì à surə tə də̀ń!
3 À tíú Yɩɩ, à pɩ̀ʋ́, cʋgʋ à bubwiə tə,
à nə bubwi, à kəni n nə!
Kʋ yɩ n mʋ̀ nə à jʋnɩ.
4 Ba-Yígúrə́-Jə-Tiu, jɩjʋ nə, n yàá nì à kori.
Jɩjʋ nə, à yàá bà n yáá con, à ga dànɩ̀.
5 Cɩ́gá, n tà Yɩɩ tə n nə swə yolwan.
N də wʋlʋnyiən wàrɩ̀ duən nə.
6 Ləyirən wàrɩ̀ n yáá con ba zɩga.
N culi lɩ̀à tə mama, ba nə tʋŋa kʋ̀nkʋ̀n yìə̀n.
7 N pɩn ba tə nə kʋ̀nɩ̀ kʋ̀nkʋ̀n tɩ,
Ba-Yígúrə́-Jə-Tiu culi lagʋra, də gɩgɩrɩnyɩna.
8 Yá n wʋywaŋʋ* nəfarʋ tə, n nə tʋŋa à yɩra,
pɩn à mʋ̀ wàá n dìə̀ tə wa à zwɩ,
à twɩ à nadwana yuu də zìlə́,
n wúlú bwálɩ́ tə yáá con, kʋ nə yɩ parɩ.
9 Ba-Yígúrə́-Jə-Tiu, à lòrì sə n pa à ya n cɩ́gá tə wa,
lɩ̀à nə bʋlɩ à nə yɩrɩ.
Kwɛn n cwəŋə tə, n nə pɩ̀à sə à tì,
n pa ka ya mənəmənə à yáá con.
10 Cɩ́gá tə̀lə́ ba nii sʋ̀ràn wa.
Ba bɩcan súə́ də pubʋnlwana.
Sʋ̀ràn tə nə naŋa ba níə́ wa yɩ yokʋkwɩnan,
ndə ba súrí libəri nii nə.
Ba nəndəli ga yɩ ba ma gɩgarɩ lɩ̀à, ba cʋ̀gà.
11 Ooo Yɩɩ, pa ba yolwana tə càn tʋ ba yuu wa!
Pa kʋ tə ba nə vʋrɩ, sə ba tʋn tə cʋ̀gʋ̀ ba!
Vɩ ba n dʋgʋ, ba yolwana tə nə dáá zənzən,
ba ga zàn ba zɩga n nə yɩrɩ.
12 Yá lɩ̀à tə mama, ba nə kwálɩ́ ba yuu n con, dàń wá jwɛ.
Ba wá fwa pupwən máŋá mama,
yá n wá ywàń ba yuu nə.
N wá pa lɩ̀à tə nə swə n yɩrɩ tə fwa pupwən.
13 Cɩ́gá, n mʋ̀ Ba-Yígúrə́-Jə-Tiu tʋŋa zəni cɩ́gá tíú yɩra.
N kwálɩ́ ʋ yuu nə, máŋá mama, ndə nàtànà nə.