Pɩ̀ʋ́ tə Yɩɩ nə tún
2
1 Bɛ̀ɛ̀ nə pɩn dwíə́ nəkaran* tə ma kukuri?Bɛ̀ɛ̀ nə pɩn lʋʋ níə́ tə lɩ̀à ma vʋrɩ yìə̀n tə nə wàrɩ̀ tə jì?
2 Bɛ̀ɛ̀ nə pɩn tɩa yuu pɛ̀gá tə ma tanɩ, sə ba ta kʋ̀ʋ̀?
Bɛ̀ɛ̀ nə pɩn yun tɩ̀án tə ma kəni nii nədʋ,
sə ba zɩgɩ Ba-Yígúrə́-Jə-Tiu, də pɩ̀ʋ́ tə nə, ʋ nə tún*?
3 Ba swɩ̀n duən con, ba wʋ́:
«Nə kʋra nə tɩ̀àn nə jon ba ŋoni tə wa!
Nə kara nə tɩ̀àn nə jon ba banzala tə wa!»
4 Yá Yɩɩ tə, ʋ nə də́ pàrɩ̀ lanworu tə wa, yɩ ʋ mʋŋa ba.
Yuu-Tiu yɩ ʋ fʋfʋlɩ ba.
5 Ʋ dàń caga ba nii nə, də lɩŋa,
ʋ lɩŋa nəfarʋ tə ga pa ba vɩvaga.
6 Ʋ swɩ̀n, ʋ wʋ́: «À mʋ̀ nə tún pɩ̀ʋ́ tə,
sə ʋ də́ pàrɩ̀ Siyon* paan tə yuu wa,
ka nə yɩ à mʋ̀ nyiən.»
7 À wá bòrì kori tə, Ba-Yígúrə́-Jə-Tiu nə swɩ̀n, à bɩrɩ.
Ʋ swɩ̀n à con, ʋ wʋ́: «N yɩ à bìú!
Kʋ nə zɩgɩ zə̀n kʋ tə, à mʋ̀ dàń nə yɩ n nyɩna.
8 Lòrì nə, yá à wá pa mʋ́ dwíə́ nəkaran tə, sə n tɩnɩ tə.
À wá pa mʋ́ lʋʋ səpunə banɩa tə mama, sə tə ya n mʋ̀ nyiən.
9 N wá tɩtaga ba də lugu dangolu,
n ga nyʋnyʋgʋ ba, ndə daʋ nəkənə nə.»
10 Yá sɩ́ʋ́n nə, á mʋ̀ pɛ̀gá tə, á yana wʋbʋnyɩna!
Á cʋga kwìə̀, á mʋ̀ tɩa tə yun tɩ̀án tə!
11 Á tʋŋa á pa Ba-Yígúrə́-Jə-Tiu nə, də zìlə́.
Á yana pupwən wa, á ga dəri ʋ fən.
12 Á twɩa ʋ bìú tə nɛɛ nə,
kʋ nə tà nətʋ, ʋ lɩŋa wá zàn,
yá á tʋtʋnɛɛ tə wá ja aba, tə va jɩ́ʋ́n cwəŋə wa.
Cɩ́gá, ʋ lɩŋa ba dánɩ́ tə zaŋa.
Pupwən lɩ̀à nə yɩ lɩ̀à tə mama, ba nə kwálɩ́ ba yuu, ʋ con!