On nación Israel kuajli tlamis kixoxotoniskej
13
'On inuejkakoneuan itribu Efraín sanoyej kintlakaitayaj ne Israel; ijkuak yejuamej tlajtouayaj, on oksekimej itribus Israel tlakakiyaj ikan tetlakaitalistli; pero pampa on inuejkakoneuan itribu Efraín otlajtlakojkej ika okimauistilijkej on ídolo Baal, okinmiktijkej intlauelikniuan. 2 ¡Niman yejuamej sanken tlajtlakouaj! Kipâtlaj iminplata niman kinchijchiuaj ídolos ken yejuamej kinejnemiliaj. Kemaj kijtouaj: '¡Ma tikintlauentlalilikan on todioses!' Niman on tlakamej kinmakaj tlatenkualtin* on ídolos yejuan tlajtlachaj ken uakaxkojkonej, para kinmauistiliaj. 3 Yejua ika tej, yejuamej no saniman popoliuiskej ken saniman popoliui on tilauak ayautli yejuan onkaj ijkuak kualkan niman kenon ajuichtli yejuan xini ijkuak xe tlanesi. Popoliuiskej ken itlaj on polokatl yejuan kuika ajakatl, kenon poktli yejuan kisa ipan on chimalpopokatl."4 Pero nejua akin ninemoTEKO onikimijlij on notlapejpeniluan: 'Nejua ninemoTEKO; nejua ninemoDios desde ijkuak nemoachtojtajuan nemiyaj ne Egipto. Maka xselikan ken Dios yakaj okse, pampa nejua san nejua niDios, niman san nejua niuelis nemechmakixtis. 5 Nejua onikincuidaroj nemoachtojtajuan ijkuak nemiyaj ne xalpatlajkan, ipan on tlajli kampa sanoyej tona niman tlaluatsalkan.
6 'Pero ijkuak yejuamej okipixkej miyek tlakuajli, sanoyej onouejueyimatkej niman onechelkajkej, niman aman nemejuamej no ijki nennemij ken nemoachtojtajuan onenkej. 7 Yejua ika tej, nejua niyes para nemejuamej kenon león, noso kenon leopardo yejuan mechuijsokis ipan ojtli. 8 Ijkon ken sen siuaosa konuijsoki yakaj yejuan kinkuilia ikoneuan, nejua no nemechixnamikis nemejuamej israelitas, niman nemechtlankojkotonas. Ken itlaj on león, nejua ompa nemechkuas, ken itlaj on tepeyolki nejua nenmechtlankojkotonas. 9 Israelitas, nejua nikxoxotonis nenmonación, niman xakaj uelis nechteltis. 10 On nenmoachtojtajuan okijtojkaj: '¡Xtechtlalili sen rey niman oksekimej totlayekankauan para ma techyekanakan ken oksekimej naciones kinyekanaj!' Aman tej, nemejuamej nenkipiyaj sen rey, niman ipan nochimej nemouejueyikalpanuan nenkimpiyaj nenmotlayekankauan. Yejua ika tej, ¿tline yejuamej xmechmanauiyaj? 11 Maski nejua sanoyej onikualan pampa onenechintlajtlanilijkej reyes, nejua onemechimakak. Pero más sakin, pampa no sanoyej onenechkualanijkej, nejua onemechinkuilij on reyes.
12 Nochi on nenmoxompayejyeualis xnikelkaua; nochi on nenmotlajtlakoluan ye tlajkuilolnestikaj ipan sen amatl yejuan kuajli yejtikaj, para sakin nikixtis ijkuak nemechyolkuitis. 13 Nennemij ken sen konetsintli yejuan ye tlakatis. Pero semi nentontos niman sanoyej nenyoltechikajkej. Nemejuamej no nenijkej ken on konetsintli yejuan xueli nokuektlalia para kuajli uajonotias ijkuak tlakatis. 14 ¿Niman ijki nenkichaj nemechmakixtis de ipoder on tlalkontli? ¡Ka, xnemechmakixtis! ¿Nemechmakixtis de on mikilistli? ¡Ka, xnemechmakixtis! ¡Xuajla tejua mikilistli, ikan mopoder yejuan tlaxoxotonia! ¡Xuajla tejua tlalkontli, ikan on motetlajyouiltilis! ¡Nejua xok nikimiknelis yejuamej in tlakamej! 15 Version #1 Maski nemejuamej israelitas más kuajli nennemiskej, on soldados asirios yejuan ualeuaskej kampaka kisa tonaltsintli mechajuijsokiskej. Yejuamej yeskej kenon temojtij totonki ajakatl yejuan toTEKO kualeuitia ne xalpatlakan, yejuan mechuachilis nenmoameyaluan. Version #2 Maski nemejuamej israelitas más kuajli nennemiskej, on soldados asirios ualeuaskej niman mechajuijsokiskej. Yejuamej yeskej kenon temojtij totonki ajakatl yejuan toTEKO kualeuitis xalpatlakan, kampaka kisa tonaltsintli, yejuan mechuachilis nenmoameyaluan. 16 On tlakamej yejuan chantij ne Samaria kiseliskej imincastigo pampa xokinekej onechtlakamatkej nejua yejuan niiminDios. Yejuamej kinmiktiskej ijkuak onyas nouijsokilistli; inkoneuan inka tlamotlaskej ipan tlajli para kimiktiskej, niman on siuamej yejuan koneuajkej kinmijtitlaposkej."