12
Itlayekankauan Israel kitejtemouaj tlapaleuilistli intech oksekimej naciones. Kichiuaj pactos iuan Asiria, niman Egipto kontitlaniliaj tetlayokolijli de aceite. Pero nochi on tlen kichiuaj sanenkaj, pampa nochi on tlen kichiuaj ken kitojtokaskiaj on ajakatl yejuan ualeua kampaka ikisayan tonaltsintli. Sanoyej yomiyekiyak intlakajkayaualis niman inxompayejyeualis yejuan sanoyej tetlajyouiltiaj."
2 Oseas okimijlij on israelitas: "ToTEKO yokinteixpanuij on tlakamej yejuan chantij Israel. Yejua kincastigaros iuejkakoneuan Jacob ipampa on tlinon xkuajli okichijkej. Yejua kintlaxtlauilis ken kinmelaua on tlinon okichijkej. 3 Ijkuak Jacob sanken xe tlakatiya, okajsik ikniu ipan ikotsko pampa yejua kinekiya achtoj tlakatis, niman ijkuak yotlakatiak onouijsok iuan Dios. 4 Onouijsok iuan Dios yejuan tlajtlachaya ken sen ángel, niman okitlan; ochokak niman okitlajtlanilij ma kikneli. Dios okinextij Jacob ne Betel niman ompa iuan otlajtlajtoj. 5 Yejua toTEKO, yejua Dios yejuan nochi ueli kichiua. ¡Yejua itoka toTEKO! 6 Yejua ika tej, nemejuamej israelitas, xmokuepakan itech nemoDios; xtetlajsojtlakan niman xchiuakan tlen melajki impampa oksekimej, niman nochipa xtlalikan nemoyojlo itech nemoDios."
7 ToTEKO okinmijlij on chanejkej Israel: ''Nemejuamej israelitas nenmouikaj ken yejuamej on tlanemakakej yejuan intlatemachiual xkuajli tlaaxitia, pampa nemejuamej nenkuelitaj nentlakajkayauaj. 8 Nemejuamej ijkin nemoueyiteneuaj: '¡Aman tejuamej tiricos! ¡Yotiktotlanilijkej nochi in miyek riquezas, niman xakaj uelis techmajpiluis niman kijtos ika tejuamej nochi in otiktlankej ikan tlachtekyotl!'
9 'Nejua akin ninemoTEKO niman ninemoDios desde ijkuak nenmoachtojtajuan nemiyaj ne Egipto, nikchiuas para nemejuamej oksejpa xchantikan ipan kajkaltin de tela, ken ipan on tonaltin ijkuak nenmoachtojtajuan nemiyaj ipan on xalpatlajkan.
10 'Nejua onemechontitlanilij notiotlajtojkauan yejuan miyekpa onikinnots ipan tlatlachalistli ken ipan temiktli niman ikan miyek ejemplos, para ma mechmachistikan on tlinon xkuajli yejuan uelis nenmopan nochiuas.
11 'Ipan on ueyikalpan Galaad sanoyej xompayejyeuamej. Niman ipan on ueyikalpan Gilgal kinuentlaliaj okichuakaxtin; on imintlaixpanuan ken itlaj on temej yejuan olochijtokej ipan ikuenyouan on tlatôktli."
12 'Nemoachtotataj Jacob ocholojteu niman oyaj ipan on país Aram, niman ompa, para yejua ouel okipix isiuau, otekit kintlajpiyaya borregos. 13 Sakin ijkuak yopanok miyek xipan, [toTEKO, itechkopa sen tiotlajtojketl okinkixtij on nemoachtojtajuan israelitas ne Egipto, niman itechkopa sen tiotlajtojketl okincuidaroj. 14 Pero on tlakamej yejuan chantij ne Israel sanoyej yokualanijkej toTEKO, niman yejua ika kincastigaros. ToTEKO kichiuas para ma kitlaxtlauakan nochi on tlinon xkuajli okitechiuilijkej, niman kitlaxtlauaskej nochi iminxompayejyeualis.