Dios kintlajsojtla intlapejpeniluan maski yejuamej xkitlakamatij
11
Dios ijkin okimijlij on israelitas: "Ijkuak Israel xe nochiuaya sen nación, nejua oniktlajsojtlak ken sen tlakatl kitlajsojtla itlakakoneu. Oniknots para ma kisa ne Egipto. 2 Pero ijkuak nejua más niknotsaya, yejua más nechtlalkauiyaya. Notlapejpeniluan kintlauentlaliliayaj on yejuan xmelauak dioses niman kimpopochuiyayaj on ídolos. 3 Maski on israelitas ijkon kichiuayaj, nejua nikinyekanaya niman nikintitiayaj kenijki nejnemiskej. Pero yejuamej xonomakakej cuenta ika nejua nikincuidarouaya. 4 Ika noteiknelilis niman ika notetlajsojtlalis yejuan oniktekitiltij ken itlaj mekatl yeskia, nejua onikinuajuikak notech. Onikinnapaloj niman onikinnisiuij itech noxayak kenon kokonej yeskiaj yejuan saken chîchij, niman nejua oninopachoj intech para onikinmakuitij intlakual, 5 pero yejuamej xokinekej onokuepkej notech. Yejua ika, yejuamej oksejpa nokuepaskej Egipto ken esclavos, niman Asiria yejua kinmandaros. 6 Intlauelikniuan kinuijsokiskej inuejueyikalpanuan, niman kinxoxotoniskej on inuejueyikaluan tepantilajkej kampa on soldados nomanauiyaj. Niman yejuamej xok ueliskej kichiuaskej on tlinon kinemiliayaj kichiuaskej. 7 Notlapejpeniluan yokisetlalilijkej ika xnokuepaskej notech. Maski yejuamej kijtouaj ika nejua niueyixtikaj Dios, yejuamej xkinekij nechtlakaitaskej.8 '¿Kenijki uelis nemechkauas nemejuamej chanejkej ipan on tlajli Efraín? ¿Kenijki uelis nemechkauas nemejuamej chanejkej ipan on tlajli Israel? ¿Uelis nemechtlaxoxotonilis ken onikinxoxotonij on uejueyikalpanmej Adma niman Zeboim? On sanoyej nechyolkokos, pampa nejua sanoyej nemechtlajsojtla! 9 Nejua xnemechcastigaros maski sanoyej nikualantikaj. Nejua xok oksejpa nemechpopolos nemejuamej israelitas, pampa nejua niDios, niman xsan niyakaj tlakatl. Nejua niYektli yejuan nemotsajlan ninemi, niman xniuajlas para nemechpopolos.
10 'Se tonajli nemejuamej nenuajlaskej notech ijkuak ninanalkas ken itlaj león. Ijkuak ninanalkas ken sen león, nemejuamej yejuan nennoyaxkauan nenualeuaskej neka kampaka ikalakiyan tonaltsintli mojka nenkuekuetlakatiaskej. 11 Sekimej nemejuamej nenualeuaskej Egipto nenuajkuekuetlakatiaskej kenon totomej; oksekimej nenualeuaskej ne Asiria kenon palomas. Nikchiuas para oksejpa nenchantiskej ipan nemokal. ¡Ijki nochiuas pampa nejua akin niDios ijki yonikijtoj nochiuas!
Iminxompayejyeualis itlapejpeniluan Dios
12 'Nemejuamej israelitas nochipa nennechkajkayauaj; nochipa nennechijliaj on tlinon xmelauak. Niman nemejuamej yejuan nenchantij ne Judá no yonenechtlalkauijkej nejua akin ninemoDios, niman sanoyej yonenmotemakakej imintech on ídolos.