Kinxoxotoniskej intlaixpanuan on israelitas
10
'On nación Israel ken sen uvajkojtli katka yejuan sanoyej otlak; pero ijkuak más okipix itlakyo, on israelitas no ijki más miyek okinchijchijkej intlaixpanuan iminídolos. Ijkuak más kualtetsin katka intlal, más kualtetsitsimej katkaj iminyekpilares. 2 Aman, inyojlo on chanejkej Israel okan onkaj, yejua ika, ika onkaj kisekiskej castigo ipampa intlajtlakoluan. ToTEKO kinxoxotonilis imintlaixpanuan niman on iminyekpilares.3 'Aman on israelitas ijkin kijtoskej: "Tejuamej xok tikpiyaj sen rey pampa xtiktlakamatij toTEKO. Pero tla tikpiyaskiaj sen rey ¿yejua tlinon ueliskia kichiuas topampa?" 4 On israelitas san tlajtlajtouaj, pero xkichiuaj on tlinon notlajtolmakaj kichiuaskej. pero xkichiuaj on tlinon notlajtolmakaj kichiuaskej. On tlen yejuamej kinemiliaj melajkachiualistli, ken itlaj on xojtli yejuan tepajmiktia yejuan noskaltia ipan ikuenyo on tlatôktli.
5 'On tlakamej yejuan chantij ipan on ueyikalpan Samaria kuekuetlakaj; chokaj pampa okinkuilijkej iminídolo yejuan tlajtlacha ken uakaxkonetl yejuan onkatka ne Bet-aven. San ipampa yejua, on israelitas niman on tiopixkej najmantokej, pampa yopopoliu inueyilis. 6 On ixneskayo on uakaxkonetl no kiktiskej ne Asiria para kimakaskej ken sen tetlayokolijli yejua on ueyixtikaj rey. Niman kemaj on chanejkej ne Asiria kinuetskaskej on israelitas, pampa okitlalijkej nochi iminyojlo itech on ídolo. Yejua ika, on israelitas sanoyej pinauaskej. 7 On rey de Samaria popoliuis ken sen tlakotsintli ijkuak atokoua. 8 Kinxoxotoniliskej on tiopantsitsimej kampa kinmauistiliaj on ídolos, kampa on israelitas tlajtlakouayaj. Ipan on tlaixpantin noskaltis miyek xkuajli xojtli niman xojtli yejuan uitsyoj, niman on tlakamej kinmijliskej on tepemej: '¡Xtechtlapachokan!', niman on tepetsitsimej kimijliskej: '¡Topan xmalauakan!' "
On castigo yejuan toTEKO kijtoua kiseliskej on israelitas
9 ToTEKO kijtoua: "On israelitas xkajkauaj ika tlajtlakouaj desde ijkuak iminuejkatajuan opejkej tlajtlakouaj ne Gabaa. ¡Yejuamej xkinekij kajkauaskej imintlajtlakoluan! Yejua ika, on nouijsokilistli impan ajsis on xompayejyeuamej ne Gabaa. 10 Nejua nikincastigaros on israelitas ijkuak nejua niknekis. Nosentlaliskej iminsoldados on naciones para kiminuijsokiskej ijkuak nejua nikincastigaros ipampa iminueyixompayejyeualis.
11 'On nación Israel katka ken sen siuauakaxkonetl yejuan kuajli tlamachtijli niman yejuan kuelitaya kiteinia trigo. Pero aman nejua niktlalilis sen yuko yetik ipan ikechpanselika, para ijki yejua kintilanas on carretas de nouijsokilistli; on chanejkej ne Judá kitilanaskej arado, niman on chanejkej ne Israel kixoponiskej on tlajli yejuan chikauak." 12 Oseas ijkin okinmijlij on israelitas: ''¡Nejua onemechijlij nemejuamej israelitas: ¡Xmochipauakan para nenueliskej nenkitejtemoskej Dios. Nemejuamej no nenijkej kenon yenkuik tlajli kampa kemach tlatôkaskej. Onemechijlij xtôkakan ixinachyo on yolmelajkanemilistli niman nenkipixkaskej itlakyo on tetlajsojtlalistli. Niman ijki, Dios uajlas niman mechmakixtis; uajlas ken itlaj on kiautli ijkuak xini ipan on tlaluaktli. 13 Pero nemejuamej yej onenkitôkakej ixinachyo on tlinon xkuajli, Yejua ika aman ye nentlajyouijtokej, niman ye nenkiselijtokej itlaxtlauil nenmotlakajkayaualis. niman onenkitlalijkej nochi nemoyojlo intech on miyekej nenmocarretas de nouijsokilistli niman intech on miyekej nenmosoldados. 14 Nemejuamej nenmojkatsajtsiskej pampa nemopan uajlas nouijsokilistli, niman nochimej on nemouejueyikalpanuan yejuan tepanchinanyeualtsakutokej kinxoxotoniskej, sano ijki ken ijkuak isoldados on rey Salmán okixoxotonijkej on ueyikalpan Bet-arbel, ipan on tonajli ijkuak onkatka nouijsokilistli. Hasta okinkuejkuechojkej on nanantin iminuan inkoneuan. 15 No sa no ijki nenmopan nochiuas, nemejuamej yejuan nenchantij ne Bet-el ipampa nenmoueyixompayejyeualis. ¡Semi nimantsin ijkuak tlalchipauis, on rey de Israel mikis!"