Oseas kitemachistia ika ichanejkauan kiseliskej castigo
(9.1 - 10.15)
Imintlajtlakoluan on israelitas niman on tlajyouilistli yejuan impan uajlas
9
On tiotlajtojketl okimijlij on israelitas: "¡Israelitas, ipan nemoauilnemilis, maka xmopakakuikatikan ika yonentetlankej! ¡Maka xchiuakan on tlinon kichiuaj oksekimej yejuan tsijtsikuinij ikan paktli! Ipan nochi on tlajli Israel, yonenmonemakakej intech on dioses ken kichiuaj on tlakamej ijkuak kintlaxtlauiliaj ikan tomin on siuaauilnenkej, niman sanoyej nenkitlajsojtlaj on tlakyotl de nemotlatôk yejuan nenkinemiliaj yejuamej omechmakakej. 2 Yejua ika, nemejuamej israelitas xnenkipiyaskej trigo nion vino; mechpolos trigo ipan nemokueskouan niman mechpolos on yenkuik vino ipan nemokaltlayejyeualoyan. 3 Nemejuamej nemokuepaskej Egipto, niman ne Asiria nenkuaskej tlakuajli yejuan xchipauak ixpan Dios. Xok nenchantiskej ipan ipaís toTEKO yejuan okinmakak nemouejkatajuan. 4 Pampa nenmejuamej nennemiskej uejka de Jerusalén, xok nenkimakaskej toTEKO on uentli de vino niman okseki uentin. ToTEKO xkipaktis nion se uentli yejuan ompa nenkimakaskej, pampa yejua kitas on uentli kenon tlakuajli yejuan okimatokakej on yejuan nemij mikapan. Nochimej yejuan kikuaj on tlakuajli, xok chipajkej ixpan Dios; uelis kuaskej on tlakuajli, pero xuelis kiuentlaliliskej toTEKO. 5 Xnenueliskej nentlaluichiuaskej para nenkitlakaitaskej toTEKO. 6 Maski sekimej ouelkej ocholojtejkej de intlaxoxotonilis on asirios, ne Egipto kinmajsiskej, niman ne Menfis kintlaltôkaskej. Niman nochi on tlajtlamach de plata yejuan nenkipiyayaj, impan noskaltis uitstli niman nochi kitepoyas, niman nemochan nochi tlapachiuis ika on uitstli yejuan ompa noskaltis.7 '¡Yoyejkok on tonaltin ijkuak onias castigo! ¡Yoyejkok on tonaltin ijkuak on israelitas kiseliskej intlaxtlauil ijkon ken yejuamej kinmelaua kiseliskej ipampa on miyek tlajtlakoltin yejuan okichijkej! ¡On israelitas saniman kimatiskej ika yoyejkok on tonaltin! Nemejuamej israelitas nenkijtouaj: 'On tiotlajtojketl sen tonto. On tlakatl yejuan Dios ipan okitlalij iespíritu para techmachistia itlajtol, yotlamachilispoliu.' Pero nemejuamej ijkon nenkijtouaj pampa nententokej ikan xompayejyeualistli, pampa nenmotlauel sanoyej ueyi. 8 Dios yokitlalij itiotlajtojkau ken sen soldadojtlachixki ne Israel para mechijlis tlinon xkuajli nemopan nochiuas, pero nemejuamej nenkitlatlaliliaj nochiuiyan kampaka yejua yau; ¡nemejuamej hasta ipan iueyitiopan Dios nenkitlauelitaj! 9 Nemejuamej sanoyej yonentlajtlakojkej, ken on yejuan chantiyaj ne Gabaa. Pero toTEKO kelnamikis nenmoxompayejyeualis niman mechcastigaros ipampa nenmotlajtlakoluan."
10 ToTEKO kijtoua: " Ijkuak oniknextij Israel, nejua sanoyej onipak kenon yejuan kinextia uvas ne xalpatlajkan. On nenmoachtojtajuan onikintak ken itlaj on higos yejuan achtoj tlaki. Pero ijkuak oajsikej itech on tepetl Baal-peor, onotemakakej itech on yejuan xmelauak dios, niman ompa yejuamej onochijkej sanoyej tetlajyelojkej, kenon ídolo yejuan yejuamej sanoyej kitlajsojtlaj. 11 On iueyilis Israel popoliuis ken sen tototl yejuan ompoliui ijkuak patlani niman xok yakaj kimati kanika yau. Xok tlakatiskej más kokonej, xok nemiskej siuamej yejuan kanaskej inkonetsin niman xok tlanemitiskej. 12 Niman tla yejuamej ueliskiaj kinmiskaltiskiaj inkoneuan, nejua nikiminkuiliskia, niman nion se de yejuamej xnikinkauiliskia ma nemi. ¡Sanoyej tlajyouiskej ijkuak nejua nikintlalkauis!" 13 On país Israel niman on ueyikalpan Tiro sano ijki tlajtlamatij: yejuamej kipiyaj kualtetsin iminueyitlalpan. ¡Pero on chanejkej Israel kinuikaj inkoneuan ipan on ojtli kampa kinmiktiskej!''
14 Oseas ijkin okijlij Dios: "¡ToTEKO, xkiminmaka on tlinon yejuamej kinmelaua kiseliskej! ¡Xkiminmaka iminsiuauan iminsiuayo yejuan xuelis ika nokoneanaskej, niman maka kipiyaskej leche ipan inchichiualuan!"
On ikualanilis toTEKO yejuan kimpiyalia on israelitas
15 ToTEKO kijtoua: "Ne Gilgal okichijkej nochi on tlen sanoyej xkuajli, yejua ika, nejua ompa opeu sanoyej nikintlauelita. Ipampa on xompayejyeualistli yejuan okichijkej, nejua nikinkixtis ipan notlal; nejua xok nikintlajsojtlas, pampa nochimej intlayekankauan xkinekij nechtlakamatiskej. 16 Israel nemi tlakokojli; yejua ken itlaj on kojtli yejuan yoneluayouak niman yejuan xok ueli kitemaka itlakyo. Maski tla on israelitas kintlakatiliskej inkoneuan, nejua nikchiuas para ma mikikan."
17 Kemaj Oseas okijtoj: "On israelitas xokinekej okakej nion okitlakamatkej noDios. Yejua ika, noDios xkinselis, niman yejuamej san kistinemiskej ipan on naciones kampa xchanejkej.