On israelitas kiseliskej castigo pampa kinmauistiliaj iminídolos
8
ToTEKO ijkin onechijlij: "Ken yakaj soldado yejuan tlajpiya, xpitsa motrompeta, xkinmachisti on notlapejpeniluan ika ye uajlau sen nación ken sen águila para kimpopolos, pampa yejuamej xocumplirojkej nopacto niman xokintlakamatkej notlanauatiluan. 2 On israelitas ijkin chikauak nechijliaj: '¡Timitsseliaj tejua ken tiiDios Israel!' 3 Pero on israelitas xokinekej okichijkej on tlinon kuajli para yejuamej; yejua ika kintlaueltotokatinemiskej intlauelikniuan. 4 Yejuamej okintlalijkej iminreyes, yejuan nejua xonikintlapejpenij; okintlalijkej intlayekankauan pero nejua xitlaj onechtlajtoltijkej tla nikita kuajli. Yejuamej okitekitiltijkej iminplata niman iminoro para okinchijchijkej iminídolos, niman ijkon sano yejuamej impan okuajkikej incastigo. 5 ¡Nemejuamej chanejkej ne Samaria, kuajli xmatikan ika nejua sanoyej niktlajyelita on uakaxkonetl yejuan nenkimauistiliaj! Nejua sanoyej yonikualan nenmouan. ¿Keski tonaltin nonekis para nenyolchipauiskej? 6 ¡On uakaxkonetl yejuan nenkimauistiliaj ne Samaria xmelauak Dios, yej san sen tlamachijchijketl okichijchiu! Yejua ika, on uakaxkonetl noneki kitetlajtlapanaskej. 7 Tla nemejuamej xnennechtlakamatij, on ajakatl niman on temojmojtij ajkomalakotl kixpolos on tlinon tlakis ipan nenmotlal. Ipan nemotlatôk xitlaj onias tlinon nenkipixkaskej; no ijki xnenkixtiskej harina ipan imiyauayo on trigo; niman tla nenueliskiaj nenkixtiskiaj harina, uajlaskej on yejuan xchanejkej niman kikuaskej. 8 ¡On nemonación, nemejuamej israelitas, semi kuajli kitlaniskej on nenmotlauelikniuan! On oksekimej naciones kitaj ken itlaj on kontlapanki yejuan xok ueli notekitiltia. 9 Nemejuamej israelitas onenyajkej ne Asiria ken itlaj on tepepoloko yejuan iselti kistinemi. Nemejuamej xok onennechnekej, yejua ika onenkintlaxtlauilijkej on tlayekankej asirios para onochijkej nenmomekauan. 10 Maski on israelitas okintlaxtlauilijkej miyekej naciones, aman nejua nikinuikas san sekan kampa tlajyouiskej, niman onyas tonaltin ijkuak on israelitas xok kimpiyaskej iminreyes nion imintlayekankauan.11 'Maski on israelitas okinchijchijkej miyek tlaixpantin para ompa kinuentlaliliaj yolkej on ídolos para kinokixtiliskej intlajtlakoluan, ipan on tlaixpantin yej yonokuep más tlajtlakolpan. 12 Maski nejua onikimijkuilouilij miyek notlamachtiluan, yejuamej xokinekej okiselijkej. 13 Yejuamej kuelitaj nechinuentlaliliaj yolkej, niman kikuaj on nakatl yejuan youentiak; pero nejua akin niiminTEKO, xnipaki iminuan. Nejua nikelnamikis on tlinon xkuajli okichijkej niman nikincastigaros impampa intlajtlakoluan. Yejuamej nemiskej esclavos ken inuejkatajuan onenkej esclavos ne Egipto. 14 On ichanejkauan Israel kinchijchiuaj inuejueyipalacios, pero kelkauaj ika nejua oniktlalij iminnación. On ichanejkauan Judá kinchijchiuaj uejueyikalpanmej yejuan kuajli tepanchinanyeualtsakutokej, pero nejua nikuajtitlanis tlitl impan para ma kauanikan, niman on tlitl kinxoxotonis on inuejueyikalpanuan niman impalacios."