7
Dios no okijtoj: "Nejua nikneki nikimpajuis on notlapejpeniluan, niman Efraín niman Samaria pero nejua nikita ika nochimej yejuamej yokichijkej uejueyi tlajtlakoltin, niman no, on xompayejyeualistin. Nochimej yejuamej tlakajkayauaj niman tlachtekij; kalakij techan para ontlachtekij, niman no ijki tetlachtekiliaj ipan ojtli.2 Yejuamej xkelnamikij ika nejua nikita niman xnikelkaua nochi inxompayejyeualis. Aman, kinyejyeualojtokej nochi on intlajtlakoluan yejuan kichiuaj. Nejua nochipa nikitstikaj on intlajtlakoluan.
On israelitas kimpiyaj iminuejueyitlayekankauan yejuan xompayejyeuamej
3 'Ika inxompayejyeualis niman intlakajkayaualis on notlapejpeniluan kipaktiaj on rey niman on intlayekankauan. 4 Nochimej yejuamej auilnemij; hasta ken kauantiaskiaj ika totonkej, pampa nochipa kipiyaj ineleuilis intech on siuamej. sus corazones arden de codicia por las mujeres. Yejuamej no ijkej ken sen horno yejuan xnoneki más kitlatokiliskej pampa sanoyej yoxotlak, chika on panchijketl sa kicha ma najkokui on tlamaxakualojli tixtli para tlakxitis. 5 On rey inuan iuejueyitlayekankauan sanoyej tlajtlauanij ijkuak tlaluichiuaj, niman yejua inuan on iuejueyitlayekankauan sanoyej teka uetskaj ijkuak yotlamachilispolijkej. 6 Yejuamej kuajli yokinemilijkej ipan inyojlo kenijki kimiktiskej on rey. Imintlauel yejuan kipiyaliaj on rey, ken itlaj itliyo on horno. Nochi tlayoua, tlikui on imintlauel, niman uajmostla nochiua ken sen ueyi tlitl. 7 Yejuamej tlikuitokej ken itlaj on horno; yejuamej kinmiktiaj intlayekankauan. Nochimej iminreyes yokinmiktijkej, niman xok nemi nion se yejuan nechtlajtlanilia ma nikpaleui.
On israelitas kitlalkauiyaj iminTEKO Dios
8 'On israelitas yononelojkej iminuan on tlakamej de oksekimej naciones. Yejua ika, yejuamej tlajtlamatij ken on memelatsitsimej yejuan san se ixko oiksik. 9 On oksekimej naciones yokichijkej para Israel makasa ma kojtik, pero on israelitas xkimatij. Israel yonokau que sen ueuentsin yejuan yotsonistayak, pero nochimej on israelitas yejuamej xkimatij ika ijki yonokajkej. 10 On israelitas xokinekej okajkajkej on tlinon xkuajli kichiuaj, nion xonechtejtemojkej nejua akin niiminTEKO Dios pampa iminnoueyimatilis xokinkauilij ma kichiuakan. 11 On israelitas no ijkej kenon paloma yejuan xtlamachilisyej niman xkimati tlinon kichiuas; achtopa kitlajtlaniliaj Egipto ma kimpaleui, niman kemaj kej yauij ne Asiria para kontlajtlaniliaj ma kimpaleui. 12 Pero ijkuak yejua yas kontetlajtlanilis ma kipaleuikan, nejua nikajsis ken kimajsij on totomej niman nicastigaros ipampa ixompayejyeualis.
13 ¡Temojtij yes on tlinon impan nochiuas pampa yejuamej onechtlalkauijkej! On tlaxoxotonilistli uajlas impan yejuamej pampa xokinekej onechtlakamatkej. Nejua nikneki nikinmakixtis, pero yejuamej noka istlakatij. 14 Maski yejuamej ajmankachokaj chika nemij ipan imintlapech, on tlinon nechtlajtlaniliaj, xnechtlajtlaniliaj ikan nochi iminyojlo. Yejuamej hasta nokojkokouaj ipan intlalnakayo ijkuak nechtlajtlaniaj trigo niman vino, pero yejuamej sanken xkinekij nechtlakamatiskej. 15 Nejua yonikinmachtijka niman yonikinmakaka chikaualistli, pero yejuamej okinemilijkej nechchiuiliskej on tlinon sanoyej xkuajli. 16 Yejuamej oksejpa kinmauistiliaj ídolos; on tlinon yejuamej kichiuaj, sanenkaj, ken itlaj on arco yejuan xmelajki tlamotla, yejuan intlaminal xueli kajxilia on tlinon yejuamej kimotlaj. Pampa yejuamej xonechnotskej ikan tetlakaitlalistli, imintlayekankauan kinmiktiskej ikan espada, niman ne Egipto inka nauiltiskej."