Ixoxotonilis on país Egipto
30
ToTEKO oksepa onechnots, niman onechijlij: 2 “Tejua tlaltikpaktlakatl, xtiotlajto ikan notokatsin niman xkijto ika nejua nemoTEKO Dios, ijkin nikijtoua: '¡Xajmankatsajtsikan niman xchokistsajtsikan ipampa on tlen sanoyej xkuajli yejuan nemopan nochiuas ipan on temojtij tonajli! 3 ¡Ye ajsitikaj on tonajli ijkuak nejua akin niDios nemechcastigaros! ¡Ipan on tonajli onyas ajmantli, niman temojtij yes para on naciones! 4 Ipan on país Egipto uajlas nouijsokilistli, niman miyekej egipcios kinmiktiskej ompa niman kinmichtekiliskej iminriquezas. Ijkuak on país Egipto ijkon ipan nochiuas niman kixoxotoniskej hasta ipan icimientos, on país Etiopía sanoyej mojkakuekuetlakas. 5 Ipan on nouijsokilistli, no mikiskej on soldados de Etiopía, de Libia, de Lidia, de nochi Arabia, de Cub, niman de oksekimej países yejuan Egipto iminuan nopaleuiya. 6 'Nejua akin niiTEKO Dios Israel, ijkin nikijtoua: Nochimej on yejuan kipaleuiskej Egipto mikiskej ipan on nouijsokilistli, desde on ueyikalpan Migdol kampaka norte, hasta on ueyikalpan Sevene kampaka sur. On ueyilistli yejuan kipiya Egipto ikan noueyimatilistli, uetsis. ¡Ijki nochiuas pampa nejua akin niDios, ijki yonikijtoj nochiuas!
7 'Egipto yejua yes país yejuan más tlakauyan nokauas xken nochimej on oksekimej países ipan in tlaltikpaktli, niman iuejueyikalpanuan yejuamej más xoxotontoskej xken oksekimej uejueyikalpanmej. 8 Ijkuak nejua nikchiuas para ma kitlatikan Egipto niman ma kinmiktikan nochimej on yejuan iminuan nopaleuiya, ijkuakon on chanejkej ne Egipto kimatiskej ika nejua Dios.
9 'Ijkuak ajsis on tonajli ijkuak Egipto kiselis icastigo, nejua nikintitlanis notlajtojkauan yejuan yaskej ipan barcos, para ma kinmomojtitij on chanejkej Etiopía yejuan kinemiliaj xkaman itlaj xkuajli impan nochiuas. Niman yejuamej sanoyej nomojtiskej. On tonajli ijkuak ijkon nochiuas, semi ye ajsitikaj.
10 'Nejua akin niiTEKO Dios Israel, nikijtoua ika nejua nikpopolos nochi on riquezas de Egipto itechkopa Nabucodonosor, on rey de Babilonia. 11 Nabucodonosor yas iminuan isoldados yejuan sanoyej tlauelejkej, para kixoxotoniskej Egipto. Kuijsokiskej Egipto ikan iminespadas, niman on país kitemiltiskej ikan mikatsitsimej. 12 Nejua nikchiuas para on río Nilo ma uaki, niman on país niktemaktilis intech on xompayejyeuamej. Intechkopa on yejuan xchanejkej, nejua nikxoxotonis on país niman nochi on tlinon ompa onkaj. ¡Nejua akin niDios, yonikijtoj ika ijki ipan nochiuas!
13 'Nejua akin niiTEKO Dios Israel, nikijtoua ika nejua nikinxoxotonis on ídolos de Egipto niman nikimpopolos nochimej on yejuan xmelauak dioses yejuan onokej ipan on ueyikalpan Menfis. Ne Egipto xokaman nemis yejuan tlamandaros, niman on país niktemiltis ikan nemojtijli. 14 Nitlaxoxotonis ipan on región itoka Patros yejuan nokaua kampaka sur de Egipto. No ijki, niktlatis on ueyikalpan Zoán yejuan nokaua kampaka norte de Egipto. Niman nicastigaros ken kimelaua on ueyikalpan Tebas yejuan icapital Egipto. 15 Nejua ninotlauelkixtis ipan on ueyikalpan Sin kampa Egipto kipiya on ueyikajli tepantilauak kampa on soldados nomanauiyaj. Niman no ijki, nikpopolos on riquezas de on ueyikalpan Tebas, icapital Egipto. 16 Niktlatis nochi on país Egipto, niman on chanejkej ipan on ueyikalpan Sin, sanoyej nokokoskej. On ueyikalpan Tebas kinkoyoniliskej itepanchinanuan, niman on ueyikalpan Menfis xkaman tlamis ika kitlajyouiltiskej. 17 Miyekej telpokamej yejuan chanejkej ipan on ueyikalpan Avén niman ipan on ueyikalpan Pibeset, mikiskej ipan nouisokilistli, niman on yejuan siuamej kinmajsiskej niman kinuikaskej ken esclavas ipan oksekimej países. 18 Ijkuak nejua nikpopolos on iueyilis Egipto niman nikuilis nochi on ipoder yejuan ika sanoyej noueyimati, on tonajli, on chanejkej ipan on ueyikalpan Tafnes sanoyej najmanaskej. Yes ken impan uajlaskia sen moxtli yejuan kitlapachos on país Egipto, pampa on chanejkej ipan iuejueyikalpanuan, kinmajsiskej niman kinuikaskej ipan oksekimej países. 19 Ijki tej, nejua nicastigaros Egipto, niman ijkuakon kimatiskej ika nejua niDios.”
20 Ipan on ika chikome tonajli de on achtoj metstli, ijkuak tikuikayaj majtlaktli iuan se xipan ika otechajsikej niman otechuikakej ne Babilonia, toTEKO onechnots niman onechijlij: 21 “Tejua tlaltikpaktlakatl, nejua nikchiuas para isoldados Nabucodonosor ma kintlankapiyakan isoldados on rey de Egipto. Nikchiuas ken nikmapostekiskia on rey de Egipto, niman xakaj kipajtilis on ima nion xakaj kitejkuilis para oksejpa nokojtilis niman oksejpa uelis kimakuis iespada. 22 Yejua ika tej, nejua akin niiTEKO Dios Israel nikijtoua: Nejua yoninokuep itlauelikniu on rey de Egipto, niman nikpopolos nochi ipoder; nikchiuas ken nikpostekiliskia on ome ima. On se yonikpostekilij, niman on okse no nikpostekilis, niman nikchiuas para makasa ma ueli kimakui iespada. 23 Nejua nikinchajchayauas on egipcios ipan miyekej oksekimej naciones imanyan in tlaltikpaktli. 24 On rey de Babilonia nikmakas chikaualistli ipan imauan niman niktlalis noespada ipan ima. Pero on rey de Egipto, uej nikmapojpostekis, niman yejua tsajtsis ikan nekokojli ixpan itlauelikniuan ken sen tlakatl yejuan ye mikis pampa sanoyej tlajtlakokojli. 25 On rey de Babilonia nikmakas más chikaualistli, niman on rey de Egipto uej nikuilis on chikaualistli. Ijkuak nejua niktlalis noespada ipan ima on rey de Babilonia, yejua kajkokuis tlakpak para kuijsokis Egipto, niman on egipcios kimatiskej ika nejua niDios. 26 Nejua nikinchajchayauas on egipcios ipan oksekimej países. Niman ijkuakon kimatiskej ika nejua niDios.”