Ezequiel 28

On tiotlajtojli yejuan kijtoua tlinon ipan nochiuas on rey de Tiro

ToTEKO onechnots, niman onechijlij: 2 “Tejua tlaltikpaktlakatl, xkijli on rey de Tiro ika nejua nemoTEKO Dios ijkin nikijlia: ‘Tejua rey de Tiro sanoyej yotimoueyimat, hasta timoteneua tidios pampa titlamandaroua itlajkotian on mar. Pero tejua xtidios, yej san tisen tlaltikpaktlakatl maski tiknemilia sanoyej titlamatki. 3 Tiknemilia más titlamatki xken Daniel, niman tiknemilia xitlaj iyantikaj yejuan tejua xtikmati. 4 Ikan motlamatkilis niman kuajli mokajsikamatilis, miyek riquezas yotiksentlalij. Yotiksentlalij miyek oro niman plata. 5 Pampa sanoyej tiueli titlanemaka, yotikmiyekilij moriquezas, niman ika on moriquezas sanoyej yotimoueyimat. 6 Yejua ika tej, nejua akin niiTEKO Dios Israel, ijkin nimitsijlia: Pampa timoteneua sanoyej titlamatki ken sen dios, 7 nejua nikchiuas ma mitsuijsokikij on yejuan de oksekimej países, yejuan sanoyej tlauelejkej. Yejuamej mitsajuijsokiskej niman mitsajxoxotoniliskej nochi on tlen kualtsin yotikchijchiu ikan tlamatkilistli, niman nochi on tlen ika timoueyilia. 8 Mitsontlajkaliskej ipan motlalkon; mitsontlajkaliskej kampa más uejkatlan itlajkotian on mar, niman sanoyej temojtij ken timikis. 9 Ijkuakon tej, tejua xok timoteneuas tidios ijkuak tinemis inmak on yejuan mitsmiktiskej. ¡Ijkuakon tikmatis ika tejua san tisen tlaltikpaktlakatl! 10 Tejua timikis ipan inmauan on yejuan xchanejkej ken mikij on yejuan xnechneltokaj. Nejua akin niiTEKO Dios Israel, ijki yonikijtoj mopan nochiuas, niman nicumpliros tlinon yonikijtoj.’ ”

On ajmankakuikatl ipampa on rey de Tiro

11 ToTEKO oksejpa onechnots, niman onechijlij: 12 “Tejua tlaltikpaktlakatl, xmokuikati sen ajmankakuikatl ipampa on rey de Tiro, niman xkijli ika nejua nemoTEKO Dios ijkin nikijlia:

' 'Tejua rey de Tiro,

tiknemiliaya tikpiya sen sanoyej kuajli nemilistli,

ipampa motlamatkilis niman ipampa on mokualtsinyo yejuan tikpiyaya;

tiknemiliaya ika xakaj okse no ijki kipiyaya ken tejua.

13 Sanoyej kuajli tinemiya.

Otinen ken tinemiskia ipan nokualtetsin xochitlan Edén.

Motlaken tlajmachyoj katka ikan on kualneskayouan

de nochi on sesentlamantikej tetsitsimej

yejuan kualtsistimej, yejuan intoka:

rubí, crisólito, jade, topacio, cornalina,

jaspe, zafiro, granate niman esmeralda.

Oksekimej on mokualneskayouan

niman mopipiloluan,

katkaj de oro yejuan omitsyaxkatijkej

desde ijkuak nejua onimitsmakak nemilistli.

14 Nejua oniktlalij sen ángel yejuan mitscuidarouaya;

tejua tinemiya ipan noyektepeu,

niman tinejnentinemiya ipan temej yejuan kauantokej.

15 Tejua sanoyej melajki timouikaya

desde ijkuak nejua onimitsmakak nemilistli,

pero oajsik tonajli ijkuak opeu tikchiua on xompayejyeualistli.

16 Pampa sanoyej otiricojtiak,

sanoyej otitetlaueltiak niman sanoyej otitlajtlakoj.

Yejua ika, onimitsajkixtij ipan on noyektepeu.

Niman on ángel yejuan mitscuidarouaya,

omitsejkuanij ipan on temej

yejuan kauantokej kampa tinejnentinemiya. 17 Ikan on mokualtsinyo sanoyej otimoueyimat;

pampa sanoyej otikualtetsintiak, otikpoloj motlamatkilis.

Yejua ika, nejua onikchiu para xuetsi hasta ipan tlajli

niman onikinkauilij on reyes para moka ma uetskakan.

18 Sanoyej miyek tlajtlakojli otikchiu

ipampa nochi on tlen tiksemânaya niman tiknemakaya,

yejua ika, hasta on motiopanuan otikinmijtlakoj.

Yejua ika tej, oniktlatij moueyikalpan

niman aman nochimej kitaj ipan tlajli ika yotlikonextiak.

19 Nochimej on chanejkej ipan on oksekimej naciones

sanoyej mitsmojkaitaj

ijkuak mitsitaj, pampa sanoyej temojtij ken yotimokau.

¡Tejua, yotipopoliu para nochipa!' ”

On castigo yejuan kiselis on ueyikalpan Sidón

20 ToTEKO onechnots, niman onechijlij: 21 “Tejua tlaltikpaktlakatl, xontlacha neka kampaka nokaua on ueyikalpan Sidón niman ompaka xontiotlajto. Xkonijto on tlinon xkuajli ipan nochiuas on ueyikalpan.

22 Xkonijli ika nejua nemoTEKO Dios, ijkin nikijlia: 'Tejua ueyikalpan Sidón, nejua yoninokuep motlauelikniu; motechkopa tejua, nejua nikselis ueyilistli. Niman ijkuak nejua nimitscastigaros, para ijki nikteititis ika sanoyej niyektli, nochimej kimatiskej ika nejua niDios.23 Nejua nimitsajtitlanilis kualolistin. On motlauelikniuan kinyejyeualoskej mochanejkauan para kinmiktiskej, niman miyek yestli toyauis ipan mokalpanojuiuan. Niman ijki nochimej kimatiskej ika nejua niDios.

24 ‘On israelitas xok oksejpa kipanoskej on tlajyouilistli yejuan kimatij kenon uitstli yejuan sanoyej tekokoj ken teojso. Ijkon kimatiyaj pampa on naciones yejuan inyeualkan onokej, sanoyej kinchichiuayaj. Niman ijki nochimej kimatiskej ika nejua niDios.’

25 'Nejua akin niiTEKO Dios Israel ijkin nikijtoua: Nejua nikinsentlalis on israelitas yejuan chajchayajtokej ipan on naciones, niman on naciones nikintitis ika nejua sanoyej niyektli. On israelitas nochantiskej ipan imimpaís, on país yejuan onikmakak notekipanojkau Jacob. 26 Ompa xitlaj kimpajsolos niman inyolika nemiskej. Niman ompa kinchijchiuaskej inkaluan, niman ipan imintlal tlatôkaskej ikan uvas. Ijkuak nejua nikincastigaros nochimej on naciones yejuan onokej inyeualkan on israelitas niman yejuan sanoyej kinchichiuaj, ijkuakon kimatiskej ika nejua niiminTEKO niman niiminDios.”