On ajmankakuikatl ipampa on ueyikalpan Tiro
27
No ijki, toTEKO onechijlij: 2 “Tejua tlaltikpaktlakatl, xmokuikati in ajmankakuikatl 3 ipampa on ueyikalpan Tiro yejuan onkaj itenko on mar, yejuan kintlanamakiltia niman kintlakouilia on kalpanmej niman on países yejuan onokej itenko on mar. Xkijli ika nejua akin niiminTEKO Dios on israelitas, ijkin nikijtoua: 'Tejua ueyikalpan Tiro,
timoueyiteneuaya más tikualtetsin de in tlaltikpaktli.
4 On kampa titetlankapiya, ajsi hasta itlajkotian on mar;
On yejuan omitschijchijkej,
omitskajkej sanoyej tikualtetsin.
5 Omitschijchijkej ken itlaj on ueyibarco
pampa omitstlalilijkej tablas de pinojkojtin
yejuan okinualeuitijkej ipan on tepetl Senir.
On ueyakkojtli yejuan motlajkotian okitelketskej
kampa sasalijtikaj on motelas intoka velas
yejuan mitsyekanayaj ikan ajakatl,
okualeuitijkej ne Líbano;
6 niman on kojtin ueueyakej
yejuan ika tlanelouayaj para mitsnejnemiltiayaj,
katkaj de auakojtin de Basán.
On tablas yejuan okimpepechojkej ixko mokaltech
katkaj de cipréskojtin
yejuan okinualeuitijkej itenko on mar de Chipre,
niman okintlajmachyotijkej ikan marfil.
7 On motelas intoka velas
yejuan mitsyekanayaj ikan ajakatl,
katkaj ken itlaj mobandera.
Niman on telas katkaj de lino ikpanepanojlojkej
yejuan okinualeuitijkej Egipto.
On telas yejuan mitstlaseuayotiliayaj,
katkaj telas yejuan morados niman chichiltikej,
yejuan okinualeuitijkej itenko on mar de Elisa.
8 On tlakamej yejuan tlanelouayaj
ikan on kontin para mitsnejnemiltiayaj,
ualeuayaj ipan on uejueyikalpanmej Sidón niman Arvad.
On tlakamej de Tiro
yejuan mitsyekanayaj,
katkaj yejuan sanoyej uelij kinyekanaj barcos.
9 Ijkuak itlaj ijtlakauiya mopan,
mitskuektlaliliayaj on tlakamej tlamatkej
yejuan chanejkej ne Gebal.
Nochimej on tlakamej yejuan kistinemij ipan barcos,
motech uajtlakouayaj
niman tejua no tikintlakouiliaya.
10 Tlakamej yejuan ualeuayaj
ipan on país de Persia, Lidia niman Libia,
yejuamej onochijkej mosoldados
para yayaj ipan nouijsokilistli.
Ika on iminescudos niman imincascos
yejuan pipilkayaj ipan nochi on kech
ika ueyak motepanchinan,
nochi tlakatl mitspakaitaya,
tejua ueyikalpan Tiro.
11 'On soldados yejuan ualeuayaj ne Arvad
inuan tejua mosoldados,
nemiyaj iyeualkan motepanchinan
para mitscuidarouayaj,
niman ipan motorres nemiyaj on tlakamej
yejuan ualeuayaj ne Gamad.
On iminescudos pipilkayaj
ipan nochi on kech ika ueyak motepanchinan,
niman ijki sanoyej mitskualnextiayaj. 12 'Pampa miyek riquezas tikpiyaya, on chanejkej Tarsis ipan on país España uajtlasemanayaj motech, niman yejuamej mitstlaxtlauiliayaj ikan plata, ikan on tepostli hierro, ikan estaño niman ikan plomo. 13 No ijki, on chanejkej Grecia, Tubal niman Mésec, motech uajtlakouayaj, niman mitstlaxtlauiliayaj ikan esclavos niman ikan tlajtlamach yejuan tlachijchijtli ika bronce. 14 On chanejkej ne Bet-togarma no mitstlakouiliayaj, niman mitstlaxtlauiliayaj ikan caballos yejuan imimpan yetinemij, niman no mitstlaxtlauiliayaj ikan caballos niman mulas yejuan tekitij. 15 No ijki, on chanejkej ne Dedán iminuan timotlanamakiltiaya. Miyekej países yejuan onokej itenko on mar, mitstlakouiliayaj. Yejuamej mitstlaxtlauiliayaj ikan marfil niman ikan on ébano kojtin.
16 'On chanejkej ne Edom, no miyek tlajtlamach mitskouiliayaj, niman mitstlaxtlauiliayaj ikan tetsitsimej yejuan kualtsitsimej yejuan intoka granate, coral niman rubí. Niman no, mitstlaxtlauiliayaj ikan telas de lino yejuan más kuajli, ikan telas yejuan tlapajlojkej tekojkoltik niman kuajli ikpanepanojlojkej. 17 No, tikintlanemakiltiaya on chanejkej Judá niman Israel. Niman yejuamej mitstlaxtlauiliayaj ikan trigo yejuan tlakiya ne Minit, niman ikan higos, nekutli, aceite niman bálsamo. 18 On chanejkej ne Damasco, no mitskouiliayaj miyek tlajtlamach de on moriquezas, niman mitstlaxtlauiliayaj ikan vino yejuan ualeua ne Helbón niman ikan iminichkayo on borregos yejuan ualeua ne Sahar.
19 On griegos yejuan ualeuaj Uzal mitsajkuiliayaj vino, tepostli yejuan yokitetsotsonkej, canela niman on ajuiyalistli cálamo, para ika mitstlaxtlauiliayaj on tlinon tejua tikinnemakiltiaya. '
20 'On yejuan ualeuaj Dedán mitsnemakiltiayaj on tlen ika tikinsiyajtiaya mocaballos.
21 'On yejuan de Arabia niman nochimej on tlayekankej de Quedar, nochimej mitstlakouiliayaj. Yejuamej mitstlaxtlauiliayaj ikan borreguitos, borregos niman chivos.
22 'On tlanemakakej yejuan ualeuaj Sabá niman Raama, no mitstlakouiliayaj, niman mitstlaxtlauiliayaj ikan ajuiyalistin yejuan más kuajli, niman ikan tetsitsimej yejuan kualtsitsimej niman ikan oro.
23 'No ijki, iminuan timotlanemakiltiaya on chanejkej Harán, Cané, Edén niman iminuan on tlanemakakej yejuan ualeuaj Sabá, Asiria niman de nochi on país Quilmad. 24 Yejuamej mitsnemakiltiayaj on telas yejuan patiojkej, tlakentin yejuan morados niman telas yejuan ikpanepanojlojkej. No ijki, mitsnemakiltiayaj telas pachontikej yejuan kisouiliaj piso yejuan sesentlamantik tlapajlojkej, niman mekamej xinepajlojkej yejuan chijchikajkej.
Tejua tikatka ken itlaj on barco yejuan yau itlajkotian mar,
yejuan tentiu ikan miyek riquezas.
26 Pero on tlakamej yejuan tlanelouayaj ikan on kojtin
para mitsnejnemiltiayaj,
omitsuikakej kampa sanoyej uejkatlan on atl,
niman on ajakatl yejuan oualeu ikisayan tonaltsintli,
omitsxoxotonij itlajkotian on mar.
27 Nochi on moriquezas, on tlinon tiknemakaya,
on yejuan tekitiyaj ipan mobarcos,
on yejuan mitsyekanayaj,
on yejuan kuektlaliayaj mobarcos,
on yejuan tlasemanayaj,
on mosoldados
niman nochimej on yejuan tikinuikatinemiya,
oapolakkej tlatsitlan ijtik on mar.
28 'Chika on yejuan tekitiyaj ipan on barcos amimiktikatkaj,
on iminmojkatsajtsijkayo okakistito hasta itenko on mar,
niman on yejuan ompaka nemiyaj omojkakuekuetlakakej.
29 Aman, on barcojtlanejnemiltijkej yokinkajtejkej on barcos.
Nochimej on tlakamej tekitkej
niman tlayekankej ipan on barcos,
aman kistinemij atempan.
30 Yejuamej otsajtsikej chikauak
niman oajmankachokakej mopampa.
Yejuamej okinotemilijkej tlalkuechtli ipan intsontekon
niman onomimilojkej ipan tlikonextli.
31 Mopampa tejua, yejuamej onokuatexikalojkej
niman okitlalijkej inajmankatlaken,
niman sanoyej oajmankachokakej.
32 Mopampa tejua onokuikatijkej sen ajmankakuikatl yejuan kijtouaya
ika xakaj okse nemiya ken tejua ueyikalpan Tiro
yejuan aman yotiaj hasta tlatsintlan ijtik on mar.
33 Ijkuak on tlajtlamach tlen tiksemanaya,
yejkoya ikan mobarcos,
tikimpaktiaya miyekej naciones.
Ika on miyek moriquezas
niman on tlajtlamach yejuan tikpiyaya,
tikinricojtiliaya on reyes de in tlaltikpaktli.
34 Aman tinemi ken sen barco
yejuan yomitsxoxotonij on mar;
yotiapolak hasta tlatsintlan.
Nochi on tlajtlamach tlinon tikpiyaya
niman nochimej on yejuan mopan kistinemiyaj,
mouan oapolakej hasta tlatsintlan.
35 Nochimej on yejuan chantij ipan on países
yejuan onokej itenko on mar,
sanoyej yonomojtijkej mopampa;
on iminreyes nesi inmixko
ika temojtij nemojtijli kipiyaj.
36 On tlanemakakej yejuan chantij ipan oksekimej países,
sanoyej mitsmojkaitaj ijkuak mitsitaj.
Sanoyej temojtij ken yotimokau;
aman yotipopoliu,
xokaman oksejpa mitsitaskej.' "