On tiotlajtojli yejuan kijtoua tlen castigo kiseliskej on chanejkej ne Tiro (26.1 – 28.19)
Ixoxotonilis on ueyikalpan Tiro
26
Ipan on achtoj tonajli de on metstli, ijkuak tikuikayaj majtlaktli uan se xipan ika otechajsikej niman otechuikakej ne Babilonia, toTEKO onechnots, niman onechijlij: 2 “Tejua tlaltikpaktlakatl, on ueyikalpan Tiro sanoyej ika yopakauetskak on ueyikalpan Jerusalén, pampa okijtoj: ‘¡Sanoyej kuajli pampa Jerusalén yokixoxotonijkej! Ompa yejkoyaj miyekej de oksekimej naciones para tlasemanayaj, pero aman xok tlanemakalos. Aman kej yejuamej uajlaskej notech uajtlasemanaskej, niman ijki, nejua nikpiyas miyek riquezas, niman yejua uej xokuitlaj kipiyas.’3 'Yejua ika tej, nejua akin niiminTEKO Dios on israelitas, ijkin nikijtoua: Tejua ueyikalpan Tiro, nejua yoninokuep motlauelikniu. Niman nikchiuas para miyekej naciones ma mitsuijsokikan ken mitstlapachoskia iakoxonajlo on mar. 4 Nikchiuas para on naciones ma kinxoxotonikan motepanchinanuan niman ma kintlajkalikan on motorres. Nochi on kaltin kuajli kinxoxotoniskej niman sa tlalkuechtli nokauas, niman ijki, tejua ueyikalpan Tiro, sa nimitskauas ken sen ueyitetl yejuan petstik. 5 Mopan xok yakaj chantis. ¡On motlaluan yejuan onokej itlajkotian on mar sa kintekitiltiskej para kinuajuatsaskej matlamej. ¡Nejua akin niiminTEKO Dios on israelitas, ijki nikijtoua nochiuas! Tejua ueyikalpan Tiro, mitstlachtekiliskej oksekimej naciones. 6 On tlakamej yejuan chantij ipan mokalpantsitsiuan yejuan onokej itenko on mar, kiminmiktiskej imintlauelikniuan ika iminespada. Niman ijkuakon, nenkimatiskej ika nejua ninemoTEKO.
7 'Nejua akin niiminTEKO Dios on israelitas ijkin nikijtoua: Nejua nikchiuas para neka kampaka norte ma ualeua Nabucodonosor, on rey de Babilonia. Yejua kipiya más poder xken nochimej oksekimej reyes, niman uajlas mitsajuijsokis tejua ueyikalpan Tiro. Yejua kinuajuikas isoldados ika incaballos niman ika incarretas de guerra, niman kinuajuikas sanoyej miyekej soldados yejuan san uajnejnentiaskej. 8 Achtoj, on isoldados kiminnauatis ma kinmiktikan on tlakamej yejuan chantij ipan on kalpantsitsimej yejuan onokej itenko on mar. Kemaj moyeualkan, tejua ueyikalpan Tiro, kintlaliskej torres yejuan ika kalakiskej mopan para mitsuijsokiskej, niman kinchijchiuaskej escaleras de tlajli niman de kojtli para ika tlejkoskej ipan motepanchinanuan. Niman on isoldados on rey Nabucodonosor, notsajtsakuiliskej ika inescudos ijkuak kinmojmotlaskej ikan flechas. 9 No ijki, yejuamej kintekitiltiskej tojtomajkej kojtin yejuan ika kintechakuaniskej on motepanchinanuan para kintlajkaliskej, niman kintsineuaskej motorres ikan barretas yejuan tojtomajkej. 10 Ijkuak on rey de Babilonia kalakis ipan on mouejueyitsakuijlouan para kinoyaxkatis on moueyikalpan, sanoyej miyekej caballos kinuikas. On caballos sanoyej tlalpopotstiaskej, hasta titlapachiuis ika on tlalpoktli. Niman on motepanchinanuan hasta uiuixkaskej ijkuak on carretas de guerra niman on caballos sa kokomokatiaskej ijkuak notlaloskej. 11 On imincaballos tlatejtepinijtiaskej ikan iministiuan ipan nochimej on mokalpanojuiuan. On soldados kinmiktiskej on mochanejkauan ikan iminespadas, niman kintlajkaliskej on mouejueyipilares. 12 No ijki, mitskuiliskej nochi on moriquezas, mitsichtekiliskej nochi on tlen tiknemakaya. Yejuamej kintlajkaliskej motepanchinanuan niman kinxoxotoniskej on mokaluan yejuan sanoyej kualtetsitsimej. Kemaj kominxiniskej ipan mar nochi on temej, on kojtin niman hasta nochi on tlalkuechtli yejuan kisas ipan on kaltin yejuan kinxoxotoniskej. 13 Ijki tej, xokaman kakistis mopakakuikauan, niman xokaman nenkintsotsonaskej on nemoarpas. 14 Tejua ueyikalpan Tiro, nimitskauas ken sen ueyitetl yejuan petstik, kampa on michajsikej kinuajuatsaskej iminmatlauan, niman xokaman oksejpa mitschijchiuaskej. ¡Nejua akin niiTEKO Dios Israel, yonikijtoj ika ijki nochiuas!
15 'Nejua akin niiminTEKO Dios on israelitas, ijkin nikijlia on ueyikalpan Tiro: On países yejuan onokej itenko on mar, sanoyej mojkakuekuetlakaskej ijkuak kimatiskej ika mitstlankapiyaj niman ika sanoyej ajmankachokaj on mochanejkauan yejuan tlakokoltin niman miyekej yokinmiktijkej. 16 Nochimej on reyes yejuan chantij ipan on países yejuan onokej itenko on mar, nejkuaniskej ipan imintrono, niman kinokixtiliskej on imincapa de rey. Niman no, kinokixtiliskej imintlaken yejuan sanoyej kualtetsin ikpanepanojloj. Yejuamej ikan miyek nemojtijli notlaliskej ipan tlajli, niman nion xnoseuijtiaskej ika kuekuetlakaskej pampa sanoyej nomojtiskej ipampa on tlen mopan nochiuas. 17 Kemaj yejuamej nokuikatiskej in ajmankakuikatl yejuan kinokuikatiaj ijkuak yakaj miki:
‘ 'Temojtij ken yomitsxoxotonijkej,
tejua ueyikalpan Tiro yejuan sanoyej mitsixmatiyaj.
¡Aman, yotipopoliu ipan on mar!
¡Tejua iuan mochanejkauan niman miyek mobarcos, sanoyej nenuejueyixtikatkaj ipan on mar!
Nochimej on kalpanmej yejuan onokej ipan in tlaltikpaktli,
sanoyej mitsmakajsiyaj.
18 Niman aman pampa yotiuets,
on países yejuan onokej itenko on mar,
sanoyej mojkakuekuetlakaj.
Aman pampa yotipopoliu,
on tlaluakchanejkeja sanoyej yonomojtijkej.’
19 'Nejua akin niiminTEKO Dios on israelitas, ijkin nikijtoua: Nejua nimitsxoxotonis niman nimitskauas kenon uejueyikalpanmej kampa xakaj chanti. Nikchiuas para xapachiui ipan on uejkatlan mar, 20 niman xuetsiti hasta kampa nemij on mikatsitsimej yejuan yeuejkaui onenkej. Tixoxotontos niman timokauas ijtik tlajli kampa tinemis intsajlan on mikatsitsimej para nochipa. Tejua xokaman tikimpiyas mochanejkauan, niman xokaman oksejpa mitschijchiuaskej ipan in tlajli kampa nemij on yejuan yoltokej. 21 Sanoyej temojtij yes ken nimitskauas, niman tipopoliuis. Maski mitstejtemoskej, xokaman mitsnextiskej. ¡Nejua akin niiminTEKO Dios on israelitas, ijki yonikijtoj mopan nochiuas!"