ON IKA YEYI TLAXELOJLI: ON NACIONES KINMACHISTIAJ TLEN CASTIGO KISELISKEJ
(25.1 32.32)
On tiotlajtojli yejuan kijtoua tlen castigo kiseliskej on amonitas
25
ToTEKO onechnots, niman onechijlij: 2 “Tejua tlaltikpaktlakatl, xontlacha kampaka nokaua imimpaís on amonitas, niman ompaka xontiotlajto ikan notokatsin. Xkonijto on tlinon xkuajli imimpan nochiuas. 3 Xkinmijli ma kakikan notlajtoltsin yejuan nejua akin niDios nikinmijlia. Nejua nikinmijlia: ‘Nemejuamej amonitas sanoyej ika onenuetskakej noueyitiopan ijkuak onenkitakej yokijtlakojkej niman ijkuak otlaxoxotonijkej ipan on país de Israel. Niman no, onenuetskakej ijkuak on chanejkej Judá okinmajsikej niman okinuikakej ken eslavos ipan okse país. 4 Yejua ika tej, aman nejua nemechtemaktilis intech on tlakamej yejuan ualeuaskej kampaka ikisayan tonaltsintli. Yejuamej mechtlalkuiliskej, kintlaliskej imincampamentos ipan nemotlal, niman ompa chantiskej. Yejuamej kikuaskej on tlakyotl yejuan nenkipixkaskej, niman koniskej on leche yejuan nemejuamej nenkoniskiaj. 5 Nejua nikchiuas para on nemoueyikalpan Rabá ma nokuepa sen tlajli kampa tlakuajkuaskej camellos, niman ipan nochi on nemoueyitlalpan Amón, san nemiskej borregos. Niman ijki nemejuamej nenkimatiskej ika nejua niDios.6 ‘ 'Nejua akin niDios yejuan melauak ninemi nikinmijlia, ijkin nikijtoua: Nemejuamej amonitas sanoyej inka yonenuetskakej on israelitas, hasta onenmomatetlatsinijkej niman onenikxitlatepinijkej ijkuak inka onempakauetskakej; sanoyej yonenkinchichijkej. 7 Yejua ika tej, nejua nemechcastigaros niman nemechtemaktilis intech on naciones, para yejuamej ma mechkuilikan nochi tlinon nemejuamej nenkipiyaj. Nejua nikchiuas para xpopoliuikan intsajlan on naciones. ¡Nemochimej nemechpopolos! Niman ijki nenkimatiskej ika nejua niDios.’
On tiotlajtojli yejuan kijtoua tlen castigo kiseliskej on moabitas
8 'Nejua akin niiminTEKO Dios on israelitas, ijkin nikijtoua: On chanejkej Moab niman on chanejkej Seir kijtouaj ika xkijta tla on chanejkej Judá más kuajli nemij xkenon chanejkej ipan oksekimej naciones. 9 Yejua ika tej, pampa ijkon kijtouaj nejua nikchiuas para on uejueyikalpanmej yejuan kimanauiyaj Moab, yejuan onokej kampa notlalnamikij iuan Israel, ma kinuijsokikan. Niman nikchiuas para ma kinxoxotonikan nochimej on uejueyikalpanmej yejuan más uejueyixtokej de on país. Kixoxotoniskej on ueyikalpan Bet-jesimot, Baal-meón niman Quiriataim. 10 Nejua nikchiuas para on yejuan ualeuaskej kampaka ikisayan tonaltsintli, ma kinoyaxkatikan inueyitlalpan on moabitas, no ijki ken okinkuilijkej iminueyitlalpan on amonitas. Ijki nikchiuas, para ipan on naciones xok yakaj kinmelnamikis on amonitas. 11 Nejua tej, nicastigaros Moab, niman ijki kimatiskej ika nejua niDios.
On tiotlajtojli yejuan kijtoua tlen castigo kiseliskej on edomitas
12 'Nejua akin niiminTEKO Dios on israelitas, ijkin nikijtoua: On chanejkej Edom, sanoyej yotlajtlakojkej pampa okintlakuepiltijkej on chanejkej Judá. 13 Yejua ika tej, nejua akin niiminTEKO Dios on israelitas, ijkin nikijtoua: Nejua nikincastigaros on edomitas; nikinmiktis yejuamej niman iminyolkauan. Nikintlaxoxotonilis desde on ueyitlalpan Temán hasta on ueyitlalpan Dedán. Nochimej on ompa chanejkej, mikiskej ipan nouijsokilistli. 14 Nejua nikintlakuepiltis on edomitas intechkopa on israelitas yejuan notlapejpeniluan. Intechkopa yejuamej ninotlauelkixtis imimpan on edomitas. Niman ijki nechixmatiskej kenijki nitecastigaroua ijkuak nitetlakuepiltia. ¡Nejua akin niiminTEKO Dios on israelitas, ijki nikijtoua nochiuas!
On tiotlajtojli yejuan kijtoua tlen castigo kiseliskej on filisteos
15 'Nejua akin niiminTEKO Dios on israelitas, ijkin nikijtoua: On filisteos okintlakuepiltijkej on chanejkej Judá; ikan miyek tlauejli imimpan onotlauelkixtijkej niman okintlaxoxotonilijkej, pampa desde yeuejkaui sanoyej kintlauelitayaj. 16 Yejua ika tej, nejua akin niDios nikijtoua: Nejua nikincastigaros on filisteos; nikimpopolos on cereteos niman tlamis nikinmiktis nochimej on yejuan chantij itenko on mar. 17 Sanoyej temojtij yes ken nejua nikintlakuepiltis; nikincastigaros ikan noueyitlauel. Niman ijkuak nejua yonikintlakuepiltij, yejuamej kimatiskej ika nejua niDios.”