On ixnextilistli de on kontli yejuan ipan tlakuakualatsaj
24
Ipan on ika majtlaktli tonajli de on ika majtlaktli metstli, ijkuak tikuikayaj chiknaui xipan ika otechajsikej niman otechuikakej ne Babilonia, toTEKO onechnots niman onechijlij: 2 “Tejua tlaltikpaktlakatl, xkijkuilo kech tinemij ipan in tonajli, pampa ipan in tonajli on rey de Babilonia yopeu kuijsoki Jerusalén. 3 Niman xkintiti on xipanteitanij israelitas in ixnextilistli yejuan nejua nimitsijlis: 'Xteka atl ipan sen kontli, niman kemaj on kontli xkontlali tliko. 4-5 Kemaj xmikti sen borrego yejuan más tomauak. Niman on inakayo tlatejtektli yejuan más kuajli de on metskojyomej niman on lomos, xkontlatlali ijtik on kontli. Niman no xkontlali ipan on kontli, on iomiyouan yejuan más kuajli. Niman on kontli kampa iksis on nakatl, xtlatlatilikan ikan miyek kojtli para sanoyej ma kuakualaka hasta kaman kuajli nochi ma iksi.6 ' 'Ijki xchiua pampa nejua nemoTEKO Dios ijkin nikijtoua: ¡Sanoyej tlajyouiskej on yejuan chantij ipan on ueyikalpan Jerusalén pampa ompa sa tlatentok ikan temiktijkej! ¡Jerusalén no ijki kenon kontli yejuan yopoxkau niman xok ueli chipaui! Aman tej, tejua Ezequiel xkikixti sesentetl on nakatl; maka tiktlapejpenijtias, san katlejua xkontilana hasta kaman tlamis nochi tikixtis. 7 On chanejkej Jerusalén sanoyej yokitoyajkej yestli pampa sanoyej yotemiktijkej, pero on yestli xokitoyajkej ipan tlajli para ma tlalpachiui, yej okitoyajkej ipan temej. 8 Yejua ika tej, nejua nikchiuas para maka popoliuis on yestli ipan on temej, para ijki xnitlauelseuis hasta tla yonikincastigaroj.
9 ‘ 'Nejua nemoTEKO Dios ijkin nikijtoua: ¡'On yejuan chantij ne Jerusalén sanoyej tlajyouiskej pampa sa tlatentok ikan temiktijkej. Yejua ika on ueyikalpan sano nejua niktlatlatilis ikan miyek kojtli. 10 Niman tejua Ezequiel más xtlatokili on kontli. Niman on nakatl xtlalili on ajuiyalistli para uelik ma kisa. Xkikxiti hasta ma ayouaki, niman ma tlatlakan on omimej. 11 Kemaj xtsonoki on kontli niman oksejpa xkontlali tliko para ma tlixochtia on teposkontli, niman ijki, on tlen xchipauak yejuan kipiya nochi kisas. Ijki xchiuili para on iteposkisajlo no ma popoliui. 12 Pero pampa sanoyej teposkiski xuelis chipauis nion ikan tlitl.
13 ' 'Nemejuamej yejuan nenchantij ne Jerusalén, no nenijkej ken iteposkisajlo on kontli ipampa on tetlajyeloj nemilistli yejuan nenkipiyaj. Niman nejua yoniknektinen nemechchipauas, pero nemejuamej xnenkinekij nenchipauiskej. Yejua ika tej, san uelis nemechchipauas ijkuak nemechcastigaros. Ijkuakon nitlauelseuis. 14 ¡Nejua akin ninemoTEKO Dios, ijki yonikijtoj nochiuas! Yoyejkok on tonajli para nikchiuas niman xninotlajtolpatlas. Nejua xnemechiknelis, yej nemechcastigaros ken mechmelaua ipampa nochi on nenmoxompayejyeualis yejuan yonenkichijkej. ¡Nejua akin ninemoTEKO Dios, ijki yonikijtoj nochiuas!' ”
Miki isiuau Ezequiel
15 ToTEKO onechnots niman onechijlij: 16 “Tejua tlaltikpaktlakatl, nejua ijsikapan nikchiuas para maka sa xpiya on mosiuau yejuan tejua sanoyej tiktlajsojtla. Pero ijkuak yejua mikis, tejua maka timajmanas, maka tichokas, nion maka tiktoyauas mixayo. 17 Xmejelti, pero san ichtaka; maka timajmanas ipampa yejua ken nochiua ijkuak yakaj miki. Maka tikuatsotsolkistinemis niman maka tikistinemis xikan mokakuan ken on yejuan najmana; maka timixtlapachos para tikteititis ika tikpiya ueyi ajmantli, nion maka tikselis on tlakuajli yejuan on motlajsojkaikniuan ika kejekouiliskej mitsyoltlaliskej."
18 Ipan on kualkan nejua Ezequiel onikinnots on israelitas ken nochipa nikinnotsaya, niman on tiotlak omik nosiuau. Niman uajmostla, onikchiu nochi ken toTEKO onechnauatij. 19 Kemaj on israelitas onechijlijkej: “Xtechijli tlinon kijtosneki para tejuamej on tlinon tejua tikchiua. ¿Tlinon titechijlisneki?”
20 Niman nejua onikinmijlij: “ToTEKO onechnots niman onechijlij: 21 ‘Xkinmijli on israelitas ika nejua nemoTEKO Dios ijkin nikimijlia: Nejua nikijtlakos on noueyitiopan yejuan nemejuamej sanoyej nenkuelitaj nenkitaj niman nenkitlajsojtlaj, yejuan ipampa sanoyej nenmoueyimatij niman nenyolchikajtokej. On nemokoneuan yejuan tlakamej niman siuamej, yejuan onenkajkej ne Jerusalén, kinmiktiskej ipan nouijsokilistli. 22 Niman nemejuamej no ijki nenkichiuaskej ken okichiu Ezequiel. Maka nenmixtlapachoskej para nenkiteititiskej ika nenkipiyaj ueyi ajmantli, nion maka nenkiseliskej on tlakuajli yejuan on nemotlajsojkaikniuan ika kejekouiliskej mechyoltlaliskej. 23 No ijki, maka nenkuatsotsolkistinemiskej niman maka nenkistinemiskej xikan nenmokakuan. Maka nenmajmanaskej niman maka nenchokaskej. Nemejuamej nenkipoloskej on nemochikaualis ipampa nemotlajtlakoluan, niman nenmosepanajmanaskej. nosepanajmanaj 24 Ezequiel yejua yomechmakak on ejemplo, niman nochi on tlinon yejua okichiu, nemejuamej no ijki nenkichiuaskej. Niman ijkuak ijkon nochiuas, nemejuamej nenkimatiskej ika nejua ninemoTEKO Dios.' ”
25 Kemaj toTEKO onechijlij: “Tejua tlaltikpaktlakatl, nejua nikinkuilis on israelitas on ueyitiopan yejuan ika yolchikajtokej, yejuan sanoyej kimpaktia pampa sanoyej kualtetsin, niman yejuan sanoyej kuelitaj kitaj niman kitlajsojtlaj. No ijki, nikinkuilis on inkoneuan yejuan tlakamej niman siuamej. 26 Ipan on tonajli ijkuak ijkon nochiuas, yakaj uajcholojteuas ne Jerusalén niman uajlas nikan Babilonia para mitsalijlis tlinon yonochiu. 27 Niman ipan on tonajli ijkuak yejkos, tejua xok tinontsin yes, niman tiuelis titlajtlajtos iuan on yejuan uajcholojteuas ne Jerusalén. Ijki tej, on tlinon mopan nochiuas, yes sen ejemplo para on israelitas, niman ijki kimatiskej ika nejua ninemoTEKO.”