Ezequiel 23

Samaria niman Jerusalén, ken omemej siuamej iknijtin yejuan sanoyej tlajtlakolejkej

ToTEKO onechnots, niman onechijlij: 2 “Tejua tlaltikpaktlakatl, nimitstlajtlajtouilis iminnemilis omemej siuamej iknijtin yejuan kisaj san itech sen nantli. 3 Desde ijkuak in omemej siuamej ichpokamej katkaj, onotemakakej ipan auilnemilistli ne Egipto. Ompa, okinnokauilijkej ma kinchichiualkijkitskikan, niman iminuan onotekakej on egipcios. 4 On yejuan yakatstiu itoka katka Ahola, (yejuan kixnextia on ueyikalpan Samaria), niman on ikniu siuatl yejuan más konetl itoka katka Aholiba, (yejuan kixnextia on ueyikalpan Jerusalén). Niman nejua iuan onikinnosiuatij on omemej siuamej, niman yejuamej okintlakatilijkej nokoneuan tlakamej niman siuamej. 5 Pero maski Ahola nosiuau katka, onechtlalkauij para okintatoj on soldados asirios yejuan sanoyej okiminejeleuij, niman yejuamej onochijkej imekauan. 6 Nochimej on soldados kualtsitsimej telpokamej katkaj, tlayekankej niman tlamandarojkej; notlakentiayaj ikan intlaken morado niman kistinemiyaj ipan incaballos. 7 On soldados asirios yejuan Ahola iminuan oauilnen, yejuamej más kualtsitsimej katkaj de nochimej on asirios. Niman hasta iminídolos on soldados, Ahola okinmauistilij, niman inka sanoyej oniktlakoj. 8 Desde ijkuak yejua ichpokatl katka, ijkuak nemiya ne Egipto, opeu auilnemi, niman xkaman okajkau ika oauilnen. Desde ijkuakon, miyekej telpokamej okichichiualkijkitskijkej niman iuan onotekakej, niman ijki okuepkej sen siuaauilnenketl. 9 Yejua ika tej, nejua oniktemaktilij Ahola intech on soldados yejuan imekauan para ika ma najauiltikan, on soldados yejuan yejua sanoyej okiminejeleuij. 10 Niman on soldados asirios sanoyej okipijpinajtijkej Ahola. Kemaj okinkuilijkej ikoneuan tlakamej niman siuamej para okinuikakej ken esclavos, niman yejua okimiktijkej ipan nouijsokilistli para ocastigarojkej. Niman on tlinon ipan onochiu, okinmixkotiauij nochimej on siuamej.

11 'Niman Aholiba, on ikniu, okitak nochi on tlinon ipan onochiu Ahola. Pero maski tla okitak, yejua yej no ijki okichiu ken ikniu. Niman hasta más okiminejeleuij tlakamej niman más oauilnen xken on ikniu. 12 Yejua no sanoyej okiminejeleuij on soldados asirios yejuan kualtsitsimej telpokamej katkaj, tlayekankej niman tlamandarojkej, kualtetsin notlakentiayaj niman kistinemiyaj ipan incaballos. 13 Nejua onikitak ika Aholiba no nemi ipan auilnemilistli, no ijki okichiu kenon ikniu yejuan yakatstiu. 14-15 Pero yejua yej más sanoyej onotemakak ipan auilnemilistli ijkuak okintak ipan tepantli inmixneskayouan on babilonios yejuan tlapajlojkej katkaj chichiltik. Nochimej yejuamej nesiyaj ken uejueyitekiuajkej pampa kipiyayaj inxijlanilpika niman inkuatlaken de tlayekankej. 16 Ijkuak Aholiba okintak inmixneskayouan on babilonios, sanoyej okiminejeleuij, niman nimantsin okintekuitlan para ma uajlakan itech. 17 Niman on babilonios oualajkej itech Aholiba para iuan onotekakej, niman miyekpa iuan onotekakej hasta kampa yejua opeu kintlajyelita. 18 Pero ijkuak yejua xok opinau oauilnen, niman onotetsotsoloj para ma kitakan, nejua oniktlajyelitak no ken oniktlajyelitak ikniu. 19 Pero yejua sanken más onotemakak ipan auilnemilistli ijkon ken okelnamik auilnemiya ne Egipto ijkuak ichpochkatl katka. 20 Okelnamik ken sanoyej kinejeleuiyaya on egipcios yejuan imekauan katkaj niman iminuan notekaya. Niman yejuamej no sanoyej okejeleuijkej yejua, no kenon polokomej niman on caballos kichiuaj.

21 'Tejua Aholiba, oksejpa otiauilnen ken otikchiu ijkuak tiichpokatl katka, ijkuak on egipcios kemach yeyika omitschichiualkijkitskijkej. 22 Yejua ika tej, nejua akin nimoTEKO Dios ijkin nimitsijlia: Nejua nikchiuas para on momekauan, on soldados yejuan aman tikintlajyelita, ma nokuepakan motlauelikniuan. Nikchiuas ma mitsyejyeualokan para ma mitsuijsokikan 23 on soldados babilonios niman nochimej on oksekimej soldados yejuan ualeuaj tlajtlaluis ipan on tlajli Babilonia, iminuan on yejuan chantij ne Pecod, ne Soa niman ne Coa, niman nochimej on asirios. Mitsajuijsokiskej on asirios yejuan kualtsitsimej telpokamej, tlayekankej niman tlamandarojkej, yejuan kualtetsin notlakentiaj niman kistinemij ipan incaballos. 24 Yejuamej uajlaskej mitsajuijsokiskej iminuan miyekej soldados ikan carretas de guerra yejuan mitsyejyeualoskej nochiuiyan. Uajlaskej ikan intepos, incascos niman inescudos, niman nejua nikinkauilis ma mitscastigarokan ken nouikaj ipan iminleyes. 25 Nejua tej, mopan ninotlauelkixtis, niman yejuamej temojtij xkuajli tlinon mitschiuiliskej. Mitstekiliskej moyak niman monakasuan, niman on yejuan sanken nemiskej, kinmiktiskej ikan iminespadas. Mitsinkuiliskej mokoneuan tlakamej niman siuamej, niman nochimej yejuan nokauaskej kimpopoloskej ikan tlitl. 26 Mitskauaskej semi titetsotsoltik, niman nochi on mokualneskayouan mitsinkuiliskej. 27 Ijki tej, nimitskixtilis on ika tisiuatlamakaualkistinemi niman nimitskixtilis on moauilnemilis yejuan ika otimotemakak ne Egipto. Niman on tlajtlamach ne Egipto xokaman oksejpa tikinejeleuis niman xokaman tikinelnamikis.

28 'Nejua akin nimoTEKO Dios ijkin nikijtoua: Nejua nimitstemaktilis intech motlauelikniuan ipan on naciones yejuan tejua sanoyej tikintlauelita niman tikintlajyelita. 29 Niman yejuamej mitschiuiliskej tlen sanoyej xkuajli pampa sanoyej mitstlauelitaj. Kinoyaxkatiskej nochi on tlinon tejua otiktlan ipan motekiu niman mitskauaskej semi titetsotsoltik, niman ijki nochi tlakatl kitas ika xkuajli otimouikak niman otiauilnen. 30 Mitschiuiliskej nochi in, pampa tejua otimotemakak ipan auilnemilistli intech on tlakamej de oksekimej naciones, niman sanoyej otimijtlakoj pampa otikinmauistilij iminídolos. 31 Yejua ika tej, pampa tejua no ijki otitlajtlakoj kenon mokniu yejuan yakatstiu, no ijki nimitstlajyouiltis ken yejua oniktlajyouiltij.

32 'Nejua akin nemoTEKO Dios ijkin nikijtoua: Tejua no ijki titlajyouis ken mokniu otlajyouij; on tlajyouilistli sanoyej temojtij yes niman sanoyej mitskokos, niman no sanoyej mitspijpinauiskej niman mitschichiitaskej. 33 Temojtij yes ken mopan tlaxoxotonis niman moselti timokauas. Titlamachilispoliuis ken sen tlauanki, ijkon ken ipan onochiu mokniu Samaria ijkuak onicastigaroj. 34 Niman ijkuak sanoyej yotitlajyouij ikan nochi on moueyicastigo, tejua sanoyej timochichiualtetekis. ¡Nejua akin nemoTEKO Dios, yonikijtoj ika ijki mopan nochiuas!

35 'Yejua ika tej, nejua akin nemoTEKO Dios nikijtoua: Pampa tejua yotinechtlalkauij niman yotinechelkau, ika onkaj tikijyouis on castigo pampa otikinejeleuijtinen tlakamej niman otiauilnemiliskistinen iminuan."

36 Kemaj toTEKO onechijlij: “Tejua tlaltikpaktlakatl, ¿tinemi listo para tiktlajtlakolmakas Ahola niman Aholiba? Tla ijkon, xkinmixkomaka nochi on tlinon sanoyej tetlajyeloj yokichijkej. 37 Yejuamej onechtlalkauijkej niman sanoyej yotemiktijkej. Onechtlalkauijkej para yej okinmauistilijkej iminídolos, niman okinmiktijkej inkoneuan yejuan iminuan onikimpix, para okinuentlalilijkej ipan tlitl on iminídolos. 38 Niman no, okijtlakojkej noueyitiopan, niman xok okintlakaitakej on tonaltin sábados para nechmauistiliskej. 39 Niman sano ipan on tonajli ijkuak yejuamej okinuentlalijkej inkoneuan intech on iminídolos, oyajkej ipan noueyitiopan niman okijtlakotoj. ¡Nochi in okichiuatoj ipan nochan!

40 'On siuamej iknijtin, Ahola niman Aholiba, okintitlankej uejka on intlajtojkauan para okintekuitlankej tlakamej. Niman ijkuak on tlakamej oualajkej, on omemej siuamej onaltijkej, onixkualtsintilijkej niman okinotlaliltijkej inkualneskayouan para okinselijkej on tlakamej. 41 Kemaj iminuan onotlalijkej ipan sen kualtetsin ueyak sillón, nisiu sen mesa kampa okintlamakakej, niman ompa okitlalijkej on kopajli niman on aceite yejuan tlatiochijtli, yejuan san nejua noyaxka. 42 Niman kakistiya ken tojlamej tsajtsiyaj pampa tlaluichiuayaj. On tlakamej yejuan ompa nemiyaj oualejkej xalpatlajkan, niman okinuajkikej kualneskayomej para okintlaliltijkej on siuamej. Okintlaliltijkej inmakoskauan, niman ipan intsontekon okintlaliltijkej kualtetsitsimej coronas. 43 Kemaj, ijkin oniknemilij: 'On tlakamej iminuan notekaskej in siuaauilnenkej yejuan hasta yotekajkantiakej pampa miyekej tlakamej iminuan yonotekatinenkej. 44 Niman melauak iminuan onotekakej Ahola niman Aholiba, on omemej siuatlamakaualtin, ken notekaskiaj iminuan on siuaauilnenkej yejuan kemach peua auilnemij.’ 45 Pero on tlakamej yejuan yolchipajkej kintlajtlakolmakaskej on siuamej ken kinmelaua kintlajtlakomakaj on tlakapapatlakej niman temiktijkej. Ijkon kinchiuiliskej pampa yejuamej melauak tlakapapatlakej niman temiktijkej.”

46 Aman tej, nejua nemoTEKO Dios ijkin nitlanauatia: “Ma uajlakan miyekej soldados para ma kinmomojtikij Ahola yejuan kitosneki Samaria niman Oholiba yejuan kitoseki Jerusalén niman ma kinkuilikij nochi on tlinon nyaxka. 47 Ma kintemojmotlakan niman ma kinmiktikan ikan iminespadas. Ma kinmiktilikan inkoneuan tlakamej niman siuamej, niman ma kintlatilikan inkaluan. 48 Ijki tej, nikpopolos ipan in país nochi tlen sanoyej tepinajtij kichiuaj. Niman ijki, nochimej on siuamej nomojtiskej, niman xkinekiskej no ijki nouikaskej ken sanoyej xkuajli onouikakej on omemej siuamej. 49 Niman on omemej siuamej iknitin, kiseliskej on castigo pampa sanoyej xkuajli ken onouikakej niman pampa sanoyej otlajtlakojkej ika okinmauistilijkej on ídolos. Kemaj nemejuamej nenkimatiskej ika nejua ninemoTEKO Dios.”