On tlajtlakoltin yejuan nochiua ne Jerusalén
22
ToTEKO onechnots, niman onechijlij: 2 “Tejua tlaltikpaktlakatl, xkintlajtlakolmaka on ichanejkauan Jerusalén pampa on ueyikalpan tentikaj ikan temiktijkej. Xkinmixkomaka nochi on tlen xkuajli yokichijkej, 3 niman xkinmijli ika nejua nemoTEKO Dios ijkin nikinmijlia: '¡Pampa nemejuamej yejuan nenchantij ipan on ueyikalpan Jerusalén, onenkinmiktikej miyekej nemochanejkauan, niman onenkitemiltijkej nemoueyikalpan ikan miyek ídolos yejuan inka nenmijtlakouaj, yoajsik on tonajli ijkuak nenkiseliskej nemocastigo! 4 Nemejuamej sanoyej yonentlajtlakojkej pampa sanoyej yonentemiktijkej, niman sanoyej yonenmijtlakojkej impampa on ídolos yejuan nenkinchijchiuaj. Yejua ika tej, yoajsik tonajli para mechtlaxoxotoniliskej niman mechmiktiskej, niman nikchiuas para on kalpanmej niman nochimej on naciones nemoka ma uetskakan. 5 Nemejuamej yejuan nenchantij ipan on ueyixtikaj ueyikalpan, no nenmoka uetskaskej on naciones yejuan nisiu niman uejka onokej, pampa sa tepinajtij ken xkuajli nenmouikaj, niman sanoyej nenkimpiyaj nenmoídolos. 6 Nochimej on nemotlayekankauan israelitas yejuan nemij nemotsajlan, sa ika nemij temiktiaj. 7 Niman nemejuamej xok nenkitlakaitaj nemotataj niman nemonanaj; nenkintlajyouiltiaj on yejuan xchanejkej, niman sanoyej inka nenmauiltiaj on yejuan iknomej niman yejuan siuakaualtsitsimej. 8 Nemejuamej xok nenkitlakaitaj on kampa noneki nennechmauistiliskej, nion nenkintlakaitaj on tonaltin sábados para nenechmauistiliskej. 9 Sekimej de nemochanejkauan kuelitaj teteixpanuiyaj ikan tlakajkayaualistli para oksekimej ma kinmiktikan. Kuelitaj tlaluichiuaj para kintlakaitaj on ídolos yejuan onokej ipan on tiopanmej pipitikej impan on tepetsitsimej, niman kichiuaj nochi tlen tetlajyeloj. 10 Sekimej tlakamej iuan notekaj insiuau intataj, niman sekimej notekaj iuan sen siuatl ijkuak yestemoua. 11 Sekimej auilnemij iuan sen tesiuau, niman sekimej iuan notekaj insiuamon. Niman nemij yejuan kichiualtiaj inmikniu yejuan siuatl noso intlakpaikniu yejuan siuatl para iuan notekaj. 12 No ijki, nemij yejuan tetlaxtlauiliaj para oksekimej ma temiktikan, niman nemij yejuan kitetlanejtiaj intomin para kitlajtlanij ueyi itlanka. Sekimej sanoyej temomojtiaj para techiualtiaj ma kinmakakan tomin. Yejuamej xok kelnamikij on notlanauatiluan. ¡Nejua nemoTEKO, ijki nikijtoua!13 ' 'Nejua sanoyej nikualantikaj nemouan, pampa nemejuamej sanoyej nenkichtekij tomin niman pampa sanoyej yonentemiktijkej. 14 Maka xnemilikan ika nenueliskej nennechixnamikiskej ijkuak nejua nemechcastigaros. ¡Nejua nemoTEKO ijki yonikijtoj, niman ijki nikchiuas! 15 Nejua nikinchajchayauas on nemochanejkauan ipan nochimej on naciones, niman ijki nikinteltis para maka más ma tlajtlakokan. 16 Niman ijkuak xmechtlakaitaskej ixpan nochimej on naciones, nenkimatiskej ika nejua ninemoDios.' ”
17 ToTEKO oksejpa onechnots, niman onechijlij: 18 “Tejua tlaltikpaktlakatl, nejua nikinta on israelitas ken itlaj on tlajsojli yejuan kisa ipan cobre, ipan estaño, ipan on tepostli hierro, ipan on plomo niman ipan on plata, ijkuak kimpâtlaj ipan horno. 19 Yejua ika tej, nejua akin niiminTEKO Dios, ijkin nikinmijlia: Pampa nemochimej yonemokuepkej ken itlaj on tlajsojli, nemechsentlalis san sekan itlajkotian on ueyikalpan Jerusalén. 20 Ijkon kenon plata, on cobre, on tepostli hierro, on plomo niman on estaño, san sekan kominxiniaj ijtik horno para kimpâtlaj, nejua no ijki ikan miyek notlauel nemechsentlalis san sekan para nemechtlajyouiltis. 21 Melauak, nejua no ken nemechtlatokilis ijkuak nemechtlajyouiltis ikan notlauel. Niman san sekan nemechsentlalis itlajkotian on ueyikalpan para san sekan nenmechtlajyouiltis. 22 Ijkon ken kipâtlaj on plata ijtik on horno, nemejuamej no ken nemechmpâtlas ijkuak nemechtlajyouiltis itlajkotian on ueyikalpan. Niman ijki, nemejuamej nenkimatiskej ika nejua akin ninemoTEKO, nemopan yoniktlalij notlauel.”
23 Niman toTEKO oksejpa onechnots, niman onechijlij: 24 “Tejua tlaltikpaktlakatl, xkinmijli on israelitas ika nejua ijkin nikinmijlia: Nemejuamej yonenmokuepkej sen país yejuan xchipauak. Yejua ika, xok nemopan kiauis para ijki nemechcastigaros. 25 On nemotlayekankauan nouikaj ken itlaj on leones yejuan nanalkaj niman kitekojkotonaj on tlinon kajsij para kikuaj. Ijki nouikaj pampa kinmiktiaj on tlakamej. Yejuamej sanoyej tetlachtekiliaj niman kinkuiliaj iminriquezas oksekimej, niman kinkauaj kaualtsitsimej miyekej siuamej. 26 On tiopixkej ipan in país, ipan chojcholouaj notlanauatiluan niman xkintlakaitaj on tlajtlamach tlen yektli. Yejuamej xkitaj ika on tlen yektli sesekneka xken on yejuan xyektli. Yejuamej xkintitiaj oksekimej para ma kimatikan tlinon chipauak nixpan niman tlinon xchipauak nixpan. Niman on tonaltin sábados xkintlakaitaj niman ijkon xnechtlakaitaj. 27 On tlayekankej ipan in país, ken itlaj on lobos yejuan kitekojkotonaj on tlinon kajsij para kikuaj, pampa nochipa nemij listos para temiktiskej para ijki kitekuiliaj tomin. 28 On tiotlajtojkej kiyanaj tlen melauak. Kichiuaj ken sen tlakatl yejuan kitlapajloltia sen tepantli para tlaixkajkayaua. Kijtouaj kitl saman kipiyaj tlatlachalistin ken ipan intemikpan kampa saman kitaj itlaj nochiuas maski xnejli nochiua. Kiteijliaj nejua nikiminnotsa, pero nejua xitlaj nikinmijlia. 29 On chanejkej Israel sa ika nemij para sanoyej tetlajyouiltiaj pampa techiualtiaj ma kinmakakan tomin niman tetlachtekiliaj. Sanoyej kintekitiltiaj yejuan mayankej, niman xkichiuaj tlen melajki impampa on yejuan xchanejkej. 30 Nejua oniktejtemoj yakaj israelita yejuan kichiuaskia para on chanejkej ma noyolpatlakan niman nechtlajtlaniliskia para maka ma nikincastigaro, pero xakaj oniknextij. 31 Yejua ika, nejua nikontitlanis nocastigo impan yejuamej, niman nikinmiktis ikan notlauel yejuan ken itlaj tlitl, pampa sanoyej xkuajli ken onouikakej. ¡Ijki nochiuas pampa nejua akin niiminTEKO Dios ijki yonikijtoj nochiuas! ”