Babilonia yejua iespada toTEKO yejuan ika castigaros Israel
21
Niman toTEKO oksejpa onechnots, niman onechijlij: 2 “Tejua tlaltikpaktlakatl, xontlacha neka kampaka nokaua Jerusalén, niman ompaka xontiotlajto. Xkonijto on tlinon xkuajli ipan nochiuas iueyitiopan. Niman no xkijto on tlinon xkuajli impan nochiuas on chanejkej ne Israel. 3 Xkonijto ika nejua nemoTEKO nikijtoua: 'Nejua yoninokuep motlauelikniu. Nikixtis noespada para nikinmiktis nochimej, sanken on yejuan yolchipajkej niman yejuan tlajtlakolejkej. 4 Melauak, nikixtis noespada para nikinmiktis nochimej, yejuan yolchipajkej niman yejuan tlajtlakolejkej, desde norte hasta sur. 5 Niman nochimej on tlaltikpaktlakamej kimatiskej ika nejua nemoTEKO yonikixtij noespada, niman xnikeuas hasta kaman tlamis nitemiktis.'6 'Niman tejua tlaltikpaktlakatl, sanoyej xajmankachoka; xkintiti on israelitas ika sanoyej timoyolkokoua. 7 Niman tla yejuamej mitstlajtoltiaj tline tichoka, tejua xkinmijli ika tichoka pampa yotikmat ika saniman impan nochiuas on tlen sanoyej xkuajli. Niman xkinmijli ika ijkuak yejuamej kimatiskej, nochimej sanoyej nomojtiskej, kuekuetlakaskej niman xok kojtikej yeskej. Xkinmijli ika in saniman impan nochiuas. Yoajsik on tonajli para impan nochiuas. ¡Nejua nemoTEKO Dios, ijki nikijtoua!”
8 ToTEKO oksejpa onechnots, niman onechijlij: 9 “Tejua tlaltikpaktlakatl, xtiotlajto, niman xkijto ika nejua nemoTEKO Dios ijkin nikijtoua:
'¡On espada, on espada! Yokitentijkej niman yokipetlanaltijkej. 10 Yokitentijkej para ika temiktiskej, yokipetlanaltijkej para pepetlakas; On chanejkej Judá xnemiskej ikan paktli ika on castigo yejuan kiseliskej, pampa yejuamej xokinekej onoyolpatlakej ijkuak nejua onikinmailij ikan sen kojtli. 11 Yokitentijkej on espada niman yokipetlanaltijkej para kimaktiliskej on tlakatl yejuan temiktis.'
12 'Niman tejua tlaltikpaktlakatl, ¡xtsajtsi niman xchoka ikan ajmantli, pampa on espada ika onkaj kinmiktis on notlapejpeniluan! Nochimej on tlayekankej de Israel niman nochimej on israelitas, ika onkaj mikiskej. Yejua ika tej, xmoyelpanuiteki ikan sanoyej ueyiajmantli. 13 ¡Nejua nemoTEKO Dios, ijki nikijtoua!’
14 'Tejua tlaltikpaktlakatl, xontiotlajto ikan notokatsin niman xmomatlaxkalo. Xtsilinalti miyekpa on espada para kixnextis ika ye kinmiktis miyekej. Sanoyej temojmojtij on espada, yejuan nochi israelita kimiktis niman xakaj nomanauis. 15 On espada nochimej kimakajsiskej pampa miyek tlakatl kimiktis. Nochiuiyan ipan techajchan, yoniktlalij on espada yejuan temiktia. On espada yokipetlanaltijkej para ma pepetlaka, yokitentijkej para temiktis. 16 Tejua espada, xtetsonteki kampaka tlayekmakopa niman no xtetsonteki kampaka tlaopochkopa; xtetsonteki san kanika kampaka tejua tiknekis. 17 Nejua nemoTEKO, no ninomatlaxkalos ikan nopakilis pampa yotemiktij on espada, niman ijki nitlauelseuis. ¡Nejua nemoTEKO, ijki yonikijtoj nochiuas!”
18 ToTEKO no onechnots, niman onechijlij: 19 “Tejua tlaltikpaktlakatl, xchijchiua sen mapa kampa tikixneskayotis ome ojtli yejuan on rey de Babilonia kinejnemis ijkuak yas ikan iespada. On ome ojtli kisaskej san sekan ipan on país de Babilonia. Niman ipan ipeuyan cada ojtli, tiktlalis sen neskayotl kampa kijtos kanon ajsi cada ojtli. 20 On rey yejuan kiktis iespada, tikititis ika se de on ojtli yau ipan on ueyikalpan Rabá yejuan inyaxka on amonitas; niman on okse ojtli yau ipan on ueyikalpan Jerusalén yejuan yeualtsakutikaj ikan tepanchinantli ipan on ueyitlalpan Judá. 21 Niman on rey de Babilonia notelketsas kampa uajpeuaj on ome ojtli, niman kichiuas sen tlatejtemoualistli para kitas katlejua ojtli kajsis. Yejua peuas kinnejnelos on flechas yejuan ika kichiuas on tlatejtemoualistli, kiminnotsas iídolos, niman no kichiuas tlatejtemoualistli ipan inyeltapach yolkej para kimatis tlinon kuajli kichiuas. 22 Kampaka iyekmakopa on rey, kajkokuis on flecha yejuan kititis para ma kajsi on ojtli yejuan yau Jerusalén. Kemaj nimantsin kinnauatis isoldados ma uiyan Jerusalén para ma kixoxotonitij itepanchinan on ueyikalpan niman ma temiktitij. Kinnauatis on isoldados para chikauak ma tsajtsitiakan ipan on nouijsokilistli, ma kintlajkalikan on uejueyitsakuijlomej, ma kinchijchiuakan escaleras de tlajli para ika tlejkoskej ipan on tepanchinantli niman kuajli ma kiyejyeualokan on ueyikalpan. 23 Pero on chanejkej Jerusalén xkineltokaskej on tiotlajtojli yejuan tikinmijlis notechkopa, pampa on rey de Babilonia okichiu sen pacto de tlajsojkaiknijtin iminuan. Pero on rey kinmelnamiktis ika sanoyej yotlajtlakojkej. Yejua ika, kinmajsis niman kinuikas ken esclavos. 24 Yejua ika tej, nejua nemoTEKO Dios ijkin nikinmijlia: 'Nochi on tlajtlakojli niman on temiktilistli yejuan yonenkichijkej, sano nemejuamej yonenkipanextijkej, pampa sanoyej nenxompayejyeuamej niman xipan nenkitaj on rey de Babilonia. Yejua ika tej, aman nejua nemechtemaktilis intech on nemotlauelikniuan para ma mechajsikan niman ma mechuikakan ne Babilonia. 25 Niman tejua rey de Israel, akin tixompayejyeua temiktijketl, ye ajsitikaj on tonajli ijkuak tikselis mocastigo. 26 Nejua akin nimoTEKO Dios nikijtoua ika mitskixtiliskej mokuatlaken, mitskuiliskej mocorona pampa xok tejua titlamandaros, yej nochi nopatlas. Aman on yejuan xokipix tekiuajyotl kipiyas tekiuajyotl, niman on yejuan okipix tekiuajyotl kipolos itekiuajyo. 27 ¡Nochi in ueyikalpan nikxoxotonis! Niman in ueyikalpan xnokueltlalis hasta ijkuak yejkos on rey de Babilonia yejuan yoniktlalij para itechkopa nemechcastigaros. Yejua nikmakas in ueyikalpan para ma kimandaro.'
Castigo yejuan kiseliskej on amonitas
28 'Tejua tlaltikpaktlakatl, xtiotlajto ikan notokatsin, niman xkinmijli on amonitas yejuan kinuijuikaltiaj on israelitas, ika nejua nemoTEKO Dios nikijtoua ika on espada sa tlamacha para temiktis. Yokipetlanaltijkej para pejpetlakas niman yokitentijkej para temiktis. 29 Xkinmijli ika on tlatlachalistli ken intemikpan yejuan on imintiotlajtojkauan kijtouaj kipiyaj, xmelauak, niman on tlinon yejuamej kijtouaj nochiuas, no san tlakajkayauilistli. On espada kinkechtsontekis on xompayejyeuamej temiktijkej. Ye ajsitikaj on tonajli ijkuak kiseliskej incastigo.
Castigo yejuan kiseliskej ichanejkauan Babilonia
30 'Niman tejua Babilonia, xkeua on moespada ipan ibolsa, pampa aman nimitstlajtlakolmakas ipan sano tejua mopaís. 31 Mopan ninotlauelkixtis. Nimitsajtitlanilis notlauel ken itlaj tlitl yejuan mitspopolos. Nimitstemaktilis intech on tlakamej yejuan tetlajyouiltiaj niman xteikneliaj ijkuak temiktiaj. 32 Mouejueyikalpanuan kintlatiskej niman kinxoxotoniskej. Moyesyo toyauis ipan nochi mopaís, niman xokaman yakaj mitselnamikis. ¡Nejua akin niminTEKO on israelitas, ijki yonikijtoj nochiuas!”