ToTEKO xkaman notlajtolpatla, niman on israelitas miyekpa kitlalkauiyaj toTEKO
20
Ipan on ika majtlaktli tonajli de on ika makuijli metstli, ijkuak tikuikayaj chikome xipan ika otechajsikej niman otechuikakej ne Babilonia, keskimej tlayekankej israelitas oualajkej notech pampa kinekiyaj itlaj kitlajtoltiskej toTEKO notechkopa. Niman onotlalijkej nixpan chika kichayaj ken kiminnankilis toTEKO. 2 Kemaj toTEKO onechnots niman ijkin onechijlij: 3 “Tejua tlaltikpaktlakatl, xtlajto iminuan on tlayekankej israelitas xkinmijli ika nejua nemoTEKO Dios, ijkin nikinmijlia: 'Nemejuamej onenualajkej pampa nenkinekij itlaj nennechtlajtoltiskej. Pero nejua nemoTEKO Dios, ijkon ken melauak ninemi, ninotlajtolmaka ika xnemechnankilis.’ 4 Pero tejua tlaltikpaktlakatl Ezequiel, tejua xkinmijli ika yotlajtlakojkej. Xkinmijli on tlen sanoyej tetlajyeloj okichijkej on inuejkatajuan. 5 Xkinmijli ika nejua nemoTEKO Dios, ijkin nikinmijlia: ‘Ijkuak on nenmoachtojtajuan israelitas onikintlapejpenij para noyaxkauan yeskej, onikintlajtolmakak ika nejua niiminDios yes on inuejkakoneuan. Kemaj ijkuak onenkej ipan on país Egipto, oksejpa ijki onikintlajtolmakak. Onikinmijlij ika nejua niiminTEKO Dios. 6 Ipan on tonajli nejua onikimprometerouilij ika nikinkixtis ne Egipto niman nikinuikas ipan on país yejuan nejua onikintejtemouilij, kampa sanoyej tlatlaki niman xitlaj poliui, ¡on país yejuan más kualtetsin xken oksekimej países! 7 Niman nochimej onikinnauatij ma kinxoxotonikan on intetlajyelojkauan ídolos niman maka ma nijtlakokan inka on ídolos de Egipto, pampa nejua nemoTEKO, nejua niiDios de Israel.8 ' ‘Pero yejuamej xipan onechitakej, niman xokinekej onechkakej. Xokinxoxotonijkej on intetlajyelojkauan ídolos, nion xokintlalkauijkej on ídolos de Egipto. Nejua niknekiya inka ninotlauelkixtis niman nikincastigaros ne Egipto hasta kampa nitlauelseuis. 9 Pero xonikontitlan noueyitlauel impan yejuamej, para ijki xonikpoloj on tlakaitalistli yejuan nechpiyaliaj. Niman ijki xnoka ouetskakej on naciones yejuan nokauayaj nisiu kampa nemiyaj on israelitas yejuan okitakej ken onikinkixtij on israelitas ne Egipto. 10 Niman ijkuak yonikinkixtij ne Egipto, onikinuikak ipan on xalpatlajkan. 11 Ompa onikinmakak noleyes niman notlanauatiluan yejuan kimaka nemilistli on akin kintlakamati. 12 No ijki, onikinnauatij para ipan on tonaltin sábados ma noseuikan niman ma nechmauistilikan. Ika in sábados nikimelnamikiltiaya ika nikpiya sen pacto iminuan, niman ijki no xkaman kelkauaskiaj ika nejua akin niiminDios onikintiochijkatlalij para noyaxkauan yeskej. 13 Pero on israelitas xipan onechitakej ipan on xalpatlajkan niman xokintlakamatkej noleyes. Xokinselijkej notlanauatiluan yejuan kimaka nemilistli on akin kintlakamati, niman xonechmauistilijkej ipan on tonaltin sábados. Yejua ika tej, nejua niknekiya inka ninotlauelkixtis niman nikinmiktis nochimej ipan on xalpatlajkan. 14 Pero xonikchiu para ijki xonikpoloj on tlakaitalistli yejuan nechpiyaliaj, niman ijkon xnoka ouetskakej on naciones yejuan okitakej kenijki nejua onikinkixtij ne Egipto.
15 ' ‘No ijki, ipan on xalpatlajkan, nejua onikintlajtolmakak ika xnikinkauilis ma kalakikan ipan on país yejuan nejua yonikinmakaka, on país yejuan más kualtetsin xken oksekimej países, kampa sanoyej tlatlaki niman xitlaj poliui. 16 Ijki onikinmijlij pampa xokiselijkej notlanauatiluan, xokintlakamatkej noleyes niman xonechmauistilijkej ipan on tonaltin sábados, yej okintekipanojkej on ídolos. 17 Pero maski ijki, nejua onikinmiknelij niman xoniknek onikimpopoloj ipan on xalpatlajkan. 18 Kemaj on inkoneuan kuajli onikinnajnauatij para maka no ijki ma nouikakan ken imintajuan onouikakej, maka ma nijtlakokan ikan on tetlajyelojkej ídolos. 19 Onikinmijlij: Nejua ninemoTEKO Dios. Xkintlakamatikan nochi noleyes niman notlanauatiluan, 20 niman xkintlakaitakan on tonaltin sábados yejuan mechelnamikiltia ika nikpiya sen pacto nemouan, niman ijki no nenkimatiskej ika nejua ninemoTEKO Dios.
21 ' ‘Pero on inkoneuan no xipan onechitakej. Xokintlakamatkej noleyes niman xipan onouikakej notlanauatiluan yejuan kimaka nemilistli on akin kintlakamati. Niman no, xonechmauistilijkej ipan on tonaltin sábados. Yejua ika, no niknekiya inka ninotlauelkixtis niman nikimpopolos ipan on xalpatlajkan para nitlauelseuis. 22 Pero xonikchiu, para ijki xonikpoloj on tlakaitalistli yejuan nechpiyaliaj. Niman ijki xnoka ouetskakej on naciones yejuan okitakej kenijki nejua onikinkixtij ne Egipto. 23 Niman ipan on xalpajtlajkan, no onikintlajtolmakak ika nikinchajchayauas ipan nochimej on naciones de in tlaltikpaktli, 24 pampa xokintlakamatkej notlanauatiluan, xokinselijkej noleyes niman xonechmauistilijkej ipan on tonaltin sábados. Yej okintekipanojkej on tetlajyelojkej ídolos yejuan kinmauistiliayaj intajuan. 25 Niman hasta onikinkauilij ma kintlakamatikan on leyes yejuan xkuajkualtin niman on tlanauatiltin yejuan xkitemakaj nemilistli. 26 Onikinkauilij ma nijtlakokan ika okintlauentlalilijkej on iminídolos, niman onikinkauilij ma kinuentlalikan intlakayenkuiyokoneuan. Ijki onikinkauilij ma kichiuakan, pampa niknekiya sanoyej ma nomojtikan ijkuak onikincastikaroj para ma kimatikan ika san nejua niiminTEKO.’
27 'Yejua ika tej, tejua tlaltikpaktlakatl, xkinmijli on israelitas ika nejua nemoTEKO Dios, ijkin nikinmijlia: ‘No ijki, on nenmoachtojtajuan no okichijkej ma nikualani. Yejuamej xonechtlakaitajkej niman onechtlalkauijkej. 28 Ijkuak nejua onikinuikak ipan on tlajli yejuan yonikimprometerouilijka ika nikinmakas, nimantsin tlauentlaliayaj ipan cada tepetsintli yejuan kitayaj, noso tlatsintlan de cada kojtli mayeualtik. Okichijkej para sanoyej ma nikualani ijkuak kintlauentlaliliayaj on imindioses. Kitlatiayaj on kopajli ajuiyak niman kitotoyauayaj uentli de vino iminixpan iminídolos. 29 Nejua onikintlajtoltij: ¿Tline nenyauij ipan on tepetsitsimej niman nenkinmauistiliaj on ídolos ipan on tiopanmej pipitikej?' (Hasta in tonajli, kitokayotiaj Tiopan Pitentsin Kampa Kinmauistiliaj on Ídolos.)
30 'No ijki, xkinmijli on israelitas ika nejua nemoTEKO Dios, ijkin nikinmijlia: '¿Tline tej, nemejuamej no nenkinekij nenmijtlakoskej ken okichijkej on nemoachtojtajuan? ¿Tline nennechtlalkauiyaj para yej nenkinmauistiliaj on tetlajyelojkej ídolos? 31 Ijkuak nemejuamej nentlauentlaliaj, niman ijkuak nenkintlatiaj on nemokoneuan para nenkinuentlaliaj, nenmijtlakouaj ikan on nenmoídolos. ¿Niman ijki nemejuamej israelitas nenuajlauij para itlaj nennechtlajtoltiskej? Nejua nemoTEKO Dios, ijkon ken melauak ninemi, ninotlajtolmaka ika xnemechnankilis. 32 Ipan nemotlamachilis nenkipiyaj ika nenkinekij nemouikaskej kenon naciones de in tlaltikpaktli, on naciones yejuan kinmauistiliaj ídolos de kojtli niman de tetl. Pero on tlen nenkinemiliaj, xijki yes. 33 Nejua nemoTEKO Dios, ijkon ken melauak ninemi, ninotlajtolmaka ika nejua nemechmandaros ikan noueyipoder, niman nemechcastigaros ikan notlauel. 34 Ikan noueyipoder niman ikan notlauel, nejua nemechkixtis ipan on kalpanmej niman ipan on naciones kampa nenchajchayajtokej, para san sekan nemechsentlalis. 35-36 Nemechuikas ipan on xalpatlajkan yejuan onkaj intsajlan on naciones, niman ompa nemechcastigaros no ijki ken onikincastigaroj on nemoachtojtajuan ipan on xalpatlajkan de Egipto. ¡Ijki nochiuas pampa nejua akin ninemoTEKO Dios ijki yonikijtoj nochiuas! 37 Nejua, ompa nikitas nemoyojlo cada se de nemejuamej, no ijki kenon tlajpixki kintlapejpenia iborregos niman kinmejkuania yejuan xiyaxkauan, niman nemechchiualtis para xtlakamatikan on pacto yejuan onikchiu nemouan. 38 Nejua nemechkixtis ne Babilonia kampa aman nennemij ken xchanejkej. Pero nikinmejkuanis nemotech on yejuan xipan nechitaj niman xnechtlakamatij, niman yejuamej xkalakiskej ipan on tlajli Israel. Ijki tej, nemejuamej nenkimatiskej ika nejua ninemoTEKO.
39 ‘ 'Niman nemejuamej israelitas, ijkin nemechijlia nejua nemoTEKO Dios: Tla xnenkinekij nennechtlakamatiskej, ¡xuiyan xkinmauistilitij on nemoídolos! Pero más sakin, kemaj kuajli nennechkakiskej niman nennechtlakamatiskej, niman xokaman oksejpa nenkijtlakoskej noyektokatsin ikan on uentli yejuan nenkinmakaj on nemoídolos. 40 Nemochimej nemejuamej israelitas nennechmauistiliskej ipan on noyektepeu Sión, on tepetl yejuan más uejkapan de Israel. ¡Nejua nemoTEKO Dios, ijki nikijtoua! Ompa nemechselis ikan paktli. Ompa nemechtlajtlanilis para xnechiktilikan nochi nenmouen. Nennechiktiliskej on tlen achtoj tlakis ipan nemotlatok niman nochi on okseki tlajtlamach uentli yejuan nennechyaxkatiskej. 41 Ijkuak nejua nemechkixtis ipan on países kampa nenchajchayajtokej, nejua nemechselis ken sen uentli ajuiyak. Ijkuak in nochiuas, nikintitis nochimej on oksekimej naciones ika sanoyej niyektli.
42 ' ‘Niman ijkuak nejua oksejpa nemechuikas ipan on tlajli Israel, ipan on país yejuan yonikimprometerouilijka nemoachtojtajuan ika nikinmakas, ikuakon, nenkimatiskej ika nejua ninemoTEKO. 43 Ompa nenkelnamikiskej nochi on tlen xkuajli onenkichijkej yejuan ika onenmijtlakojkej, niman sano nemejuamej nenmotlajyelitaskej ipampa on miyek tlajtlakojli yejuan onenkichijkej. 44 Maski nemejuamej israelitas xkuajli ken onenmouikakej niman sanoyej onentlajtlakojkej, nejua nikchiuas tlen kuajli nemopampa para ma nechtlakaitakan. Niman ijkuakon nemejuamej nenkimatiskej ika nejua ninemoTEKO Dios. ¡Nejua akin ninemoTEKO Dios, ijki yonikijtoj nochiuas!’ ”
Castigo yejuan kiselis on tlajli Neguev
45 Kemaj toTEKO oksejpa onechnots niman onechijlij: 46 “Tejua tlaltikpaktlakatl, xontlacha neka kampaka sur, niman ompaka xontiotlajto ikan notokatsin. Xkonijto on tlinon xkuajli ipan nochiuas on kojyoj yejuan onkaj ipan on tlajli Neguev, 47 niman xkijli ika nejua nemoTEKO Dios ijkin nikijtoua: 'Nejua niktlakechis sen tlitl mopan yejuan kintlatis nochimej on kojtin yejuan xoxojkej niman yejuan uakej. On tlitl sanoyej kauanis niman xkaman seuis. Niman nochi tlakatl yejuan mopan chanti, desde norte hasta sur, chichinauis ixayak. 48 Niman nochimej on tlaltikpaktlakamej, kimatiskej ika nejua nemoTEKO, nejua oniktlakechij on tlitl. Niman on tlitl xkaman seuis.’ ”
49 Kemaj nejua Ezequiel ijkin onikijlij toTEKO: “¡Ay noTEKO, ijkuak nejua nikinmijlia on tlakamej in tlajtlamach, yejuamej xnechneltokiliaj niman kijtouaj ika on tlinon nejua nikijtoua xitlaj kijtosneki!”