On temachistijli yejuan kijtoua ika san on yejuan tlajtlakos yejua mikis
18
Kemaj toTEKO oksejpa onechnots, niman onechijlij: 2 “¿Tline tej, ne Israel sa chika kijtouaj in ueyitlajtojli yejuan kijtoua: 'Intlajtlakol on tatajtin, kitlaxtlauaj ipan inkoneuan’? 3 Nejua nemoTEKO Dios, ijkon ken melauak ninemi, ninotlajtolmaka ika nemejuamej xokaman oksejpa nenkijtoskej yejua in ueyitlajtojli ne Israel. 4 Nochi tlaltikpaktlakatl nejua noyaxka, sanken on tajtli niman on tekoneu. Yejua ika niueli nikinyolkuitia, pero san on yejuan tlajtlakos, yejua mikis.5 'Ma tikonijtokan ika sen tlakatl yolmelajki, kichiua nochi tlen kuajli niman tlen melajki. 6 Yejua ximinuan nosentlalia on yejuan kintlaluichiuiliaj ídolos impan on pipitikej tiopanmej yejuan onokej impan on tepetsitsimej, nion kitlalia iyojlo intech on ídolos yejuan kimpiyaj ne Israel. Yejua xtesiuakuilia, nion xiuan noteka isiuau ijkuak isiuau yestemoua. 7 In tlakatl xakaj kitlajyouiltia, yej kitekuepilia on tlinon kauilijteuaj ijkuak kitetlanejtia itomin. Xakaj kitlachtekilia, yej kimaka tlakuajli yejuan apismiki niman kitlakentia yejuan xkipiya itlaken. 8 On tlakatl yejuan yolmelajki, kitetlanejtia itomin niman xkitlajtlani itlanka. Yejua xakaj kichiuilia tlen xkuajli. Ijkuak omemej tlakamej kipiyaj tlauejli, yejua kuajli kixtlaloua akinon kipiya tlajtlakojli. 9 San nouika ipan noleyes niman ipan notlanauatiluan. In kenin tlakatl, melauak yejua yolmelajki. Yejua ika tej, yejua xmikis. ¡Nejua akin ninemoTEKO Dios, ijki nikijtoua!
10 'Pero ma tikonijtokan, in tlakatl yejuan yolmelajki kipiya sen ikoneu yejuan xipanteitani niman temiktijketl, niman xnouika ken itataj onouikak. 11 Yejua uej iminuan nosentlalia on yejuan kintlaluichiuiliaj ídolos impan on pipitikej tiopanmej yejuan onokej impan on tepetsitsimej, niman tesiuakuilia. 12 Kitlajyouiltia yejuan mayanki niman yejuan xueli nomanauiya. Tetlachtekilia niman xkitekuepilia on tlinon kauilijteuaj ijkuak kitetlanejtia itomin. Kitlalia iyojlo intech on ídolos niman kichiua on tlen nejua sanoyej niktlajyelita. 13 Kitetlanejtia itomin pero kitlajtlani ueyi itlanka. Yejua ika tej, in kenin tlakatl kimelaua mikis. Ijkuak in tlakatl yokichiu nochi on tlajtlamach tlen nejua sanoyej niktlajyelita, ika onkaj mikis, niman san yejua kipiyas tlajtlakojli ipampa imikilis.
14 'No ijki, ma tikonijtokan ika in tlakatl xompayejyeua kipiya sen ikoneu yejuan kita nochi on tlajtlakotin yejuan kichiua itataj, pero yejua uej xnouika ken onouikak itataj. 15 On kijtosneki, ika yejua ximinuan nosentlalia on yejuan kintlaluichiuiliaj ídolos impan on pipitikej tiopanmej yejua onokej impan on tepetsitsimej, niman xkitlalia iyojlo intech on ídolos yejuan kimpiyaj ne Israel, niman xtesiuakuilia. 16 Yejua xakaj kitlajyouiltia; xitlaj kitlajtlani ma kauilijteuakan ijkuak kitetlanejtia itomin niman xakaj kitlachtekilia. Yej kimaka tlakuajli yejuan apismiki niman kitlakentia yejuan xkipiya itlaken. 17 No ijki, yejua xakaj kichiuilia tlen xkuajli, niman ijkuak kitetlanejtia itomin xkitlajtlani itlanka, niman cumpliroua noleyes niman kintlakamati notlanauatiluan. Tla ijkon tej, in tlakatl xmikis ipampa itlajtlakoluan itataj, yej nikauilis ma nemi.
18 'Pero itataj in tlakatl mikis sano yejua ipampa itlajtlakoluan, pampa otetlajyouiltij, otlachtek niman okinchiuilij tlen xkuajli on ichanejkauan. 19 Niman tla nemejuamej nenmotlajtoltiaj: '¿Tline tej on tekoneu xyejua kitlaxtlaua itlajtlakoluan itataj?' Nejua tej, nemechijlia ika xyejua kitlaxtlaua itlajtlakoluan itataj, pampa on tekoneu okichiu nochi tlen kuajli niman tlen melajki; ocumpliroj notlanauatiluan niman okintlakamat nochi noleyes. Yejua ika tej, on tekoneu xmikis. 20 San on yejuan tlajtlakos yejua mikis. Nion on tekoneu kitlaxtlauas itlajtlakoluan itataj nion on tajtli kitlaxtlauas itlajtlakoluan ikoneu. On yejuan yolmelajki kiselis itlaxtlauil yejuan kuajli pampa kuajli onouikak; niman on yejuan xompayejyeua kiselis icastigo ipampa ixompayejyeualis.
ToTEKO kimaka itlaxtlauil cada se ken kimelaua kiselis
(Ez 33.10-20)
21 'Pero tla on xompayejyeua kitlalkauiya nochi on tlajtlakoltin yejuan kichiuaya, niman kitlakamati nochi noleyes niman kichiua nochi tlen kuajli niman tlen melajki, tla ijkon, yejua xmikis, yej nikauilis ma nemi. 22 Nejua xok nikelnamikis nochi on tlen xkuajli okichiu, niman yejua nemis pampa okichiu on tlen melajki. 23 Nejua tej, xniknekilia ma miki on xompayejyeua, yej nikneki ma noyolpatla niman kuajli ma nouika para ijkon xmikis. ¡Nejua nemoTEKO Dios, ijki nikijtoua!
24 'Pero tla on yejuan yolmelajki, kajkaua ika kichiua tlen kuajli, niman yej kichiua nochi tlen xkuajli niman tlen tetlajyeloj ken kichiuaj on xompayejyeuamej, ¿nenkinemiliaj ika yejua sanken nemis? Nejua tej nikijtoua ika ka. Yejua mikis pampa onechtlalkauij niman ipampa itlajtlakoluan, niman xokaman nikelnamikis on tlen kuajli okichijka. 25 Pero nemejuamej nenkijtouaj xkuajli tlen nikchiua. Yejua ika tej, xkakikan nemejuamej israelitas: ¿Tlinon xkuajli nikchiua? ¿Tlen xyej nemejuamej nenkichiuaj on tlinon xkuajli? 26 Tla on yejuan yolmelajki, kajkaua ika kichiua tlen kuajli niman yej kichiua tlen xkuajli, mikis pampa xkuajli tlen okichiu. 27 Pero tla on xompayejyeua uej kajkaua on tlen xkuajli kichiuaya niman kichiua tlen kuajli niman tlen melajki, tla ijkon yejua uej kimanauis inemilis. 28 Tla yejua kinomaka cuenta niman kajkaua on tlen xkuajli kichiuaya, yejua xmikis, yej sanken nemis.
29 'Pero on israelitas sanken kijtouaj xkuajli tlen nikchiua. Yejua ika oksejpa nikintlajtoltia: ¿Tlinon xkuajli nikchiua? ¿Tlen xyej nemejuamej israelitas nenkichiuaj tlen xkuajli? 30 Nejua nemechtlaxtlauilis cada se de nemejuamej israelitas ken onenmouikakej. ¡Nejua akin ninemoTEKO Dios, ijki nikijtoua nochiuas! Xtlalkauikan tej, nochi on nemoxompayejyeualis, para ijki xnentlajyouiskej ipampa nemotlajtlakoluan. 31 Xkajkauakan nochi on nemoxompayejyeualis yejuan ika yonentlajtlakojkej nixpan, niman xyenkuilikan nemoyojlo niman nemoespíritu. ¿Tline tej nenmikiskej nemejuamej israelitas, 32 tla nejua xnikneki yakaj ma miki? Xtlalkauikan on tlen xkuajli, niman ijki xnenmikiskej. ¡Nejua akin ninemoTEKO Dios, ijki nikijtoua nochiuas!