On ixnextilistli de on kuaktin niman de on uvajkuamekatl yejuan toTEKO okijlij Ezequiel
17
ToTEKO onechnots niman onechijlij: 2 “Tejua tlaltikpaktlakatl, xkintlajtlajtouili on israelitas in ixnextilistli. 3 Xkinmijli ika nejua nemoTEKO Dios, ijkin nikijtoua: 'Sen kuaktli sanoyej ueyi oajsik ne Líbano; yejua sanoyej mastlakapalpajpatlauak katka, niman ijuiyo sanoyej ueueyak katka niman miyek sesentlamantik tlapajloj katka. Niman on kuaktli onotlalij ikuatipan sen cedrojkojtli, 4 niman okitekilij sen imakojyo yejuan más uejkapan. Kemaj okitôkato ipan imimpaís on tlanemakakej, ipan on ueyikalpan kampa sanoyej tlanemakaj. 5 Niman ipan on país okikuik sen xinachtli, niman okitôkak ipan sen tlajli kampa kuajli tlatlaki, itenko sen ayajtok kampa onkaj miyek atl. 6 On xinachtli oixuak, niman onochiu sen uvajkuamekatl yejuan xuejkapan onoskaltij pero sanoyej onomajmatij. Niman on imakojyouan okomintlachaltij kampaka nemi on kuaktli, niman kuajli ononeluayotij ijtik on tlajli. Ijkon tej, on uvajkuamekatl ochikau, niman sanoyej oitsmolin niman onomajmatij. 7 Pero nemiya okse kuaktli yejuan no sanoyej ueyi. Imastlakapaluan sanoyej uejueyimej katkaj niman sanoyej ijuiyomiyek katka. Niman on uvajkuamekatl okontlachaltij ineluayouan niman imakojyouan kampaka nemiya in kuaktli para más ma kimaka atl. 8 Ijkon okichiu on uvajkuamekatl maski ye tôktoya ipan kuajli tlajli kampa onkaj miyek atl, kampa ueliskia nomajmatiskia niman tlakiskia, niman ompa nochiuaskia sen kualtetsin uvajkuamekatl.'9 'Xkinmijli tej, ika nejua nemoTEKO Dios ijkin nikijtoua: 'On uvajkuamekatl xnochipa xoxouixtias. On achtoj kuaktli yejuan okitôkato, kineluayouiuitlas, niman kichiuas para ma xini itlakyo. Yejua xojuitikaj para kuiuitlas, niman xnoneki yakaj kipaleuis para kuiuitlas, niman ijkon uakis nochi iselika. 10 Maski oksejpa kitôkaskej, xok itsmolinis; yej uakis ijkuak ipan yejkos on ajakatl yejuan ualeua ikisayan tonaltsintli; uakis sano ipan on kuajli tlajli kampa onoskaltij.' ”
On tlinon kijtosnekij on ixnextilistin de on ome kuaktin niman on uvajkuamekatl
11 Kemaj toTEKO onechnots niman onechijlij: 12 “Xkintlajtolti on israelitas yejuan nion xipanteitanij tla kimatij tlinon kijtosnekij in ixnestilistin yejuan yonikinmakak. Xkinmijli ika nejua nikijtoua: 'On ixnestilistin kijtosneki ika on rey de Babilonia ouajlaj nikan Jerusalén, niman okajsik on rey de Judá iuan iuejueyitlapaleuijkauan niman okinuikak Babilonia. 13 Ijkuakon, on rey de Babilonia okitlapejpenij se yejuan ken kitaya on rey de Judá, niman yejua okitlalij rey de Judá. Kemaj iuan okichiu sen pacto, niman okichiualtij ma kitlajtolmaka ika nochipa kitlakamatis. No ijki, on rey de Babilonia okinmajsik nochimej on israelitas yejuan uejueyixtikatkaj ipan in ueyitlalpan Judá niman okinuikak ne Babilonia 14 para on israelitas yejuan onokajkej nikan Judá xok ueliyaj ipan nokuepaj on rey, yej nonekiya kitlakamatiskej on pacto yejuan on rey de Babilonia okichiu iuan on rey de Judá. 15 Pero on rey de Judá xokitlakamat on rey de Babilonia, niman okomintitlan itlajtojkauan ne Egipto para okintlajtlanitoj caballos niman miyekej soldados. Aman tej, ¿Nemejuamej nenkinemiliaj kuajli kisas on tlen okichiu, niman on israelitas xkiseliskej tlajyouilistli? ¿Uelis kimanauis inemilis se yejuan xcumpliroua sen pacto? 16 Nejua nemoTEKO Dios, ijkon ken melauak ninemi, ninotlajtolmaka ika on rey de Judá mikis ne Babilonia pampa xokitlakaitak on tlajtolmakalistli niman xocumpliroj on pacto yejuan okichiu iuan on rey de Babilonia yejuan okitlalij para ma tlamandaro ken rey ne Judá. 17 Ijkuak on rey de Babilonia kuijsokis Jerusalén, niman kintlalis torres niman escaleras de tlajli para on isoldados tlejkoskej ipan on tepanchinantli yejuan onkaj iyeualkan on ueyikalpan, niman kimiktiskej miyek tlakatl, nion isoldados on rey de Egipto xuelis kimanauiskej Jerusalén. 18 Ijkon ipan nochiuas pampa on rey de Judá xokitlakaitak on tlajtolmakalistli niman xocumpliroj on pacto yejuan okijtoj cumpliros. Yejua ika tej, xuelis nomauauis de on mikilistli.
19 ' 'Niman nejua nemoTEKO Dios, ijkon ken melauak ninemi, ninotlajtolmaka ika nicastigaros on rey de Judá. Nicastigaros pampa xokitlakaitak on tlajtolmakalistli niman xocumpliroj on pacto yejuan nouan okichiu ijkuak noka onotlajtolmakak. 20 Nejua ipan nikonchapanis nomatlau niman ika nikajsis. Nikuikas Babilonia para ompa nicastigaros pampa xipan onechitak. 21 Isoldados yejuan más uelij tlauijsokij, mikiskej ipan nouijsokilistli, niman yejuan xkinmiktiskej nochajchayauaskej imanian in tlaltikpaktli. Niman ijkuakon nemejuamej nenkimatiskej ika nejua nemoTEKO, nicumpliroua tlinon nikijtoua.
On tlamachalistli yejuan Dios kinmaka on israelitas
22 ' 'Nejua nemoTEKO Dios nikijtoua: Nejua niktekis sen selik tlatsmolintli de imakojyo sen cedrojkojtli yejuan más uejkapan; niman nikontôkas ikuatipan sen tepetl yejuan más ueyi, 23 on tepetl yejuan más uejkapan de ne Israel. Kemaj nomajmatis niman tlakis. Nochiuas sen sanoyej kualtetsin cedrokojtli yejuan uejkapan niman mayeualtik. Niman ipan imakojyouan kitlaliskej intepajsol nochimej on sesentlamantikej totomej yejuan nemij. 24 Niman nochimej on kojtin de on campo kimatiskej ika nejua ninemoTEKO. Nejua nikchiua ma uetsi on kojtli yejuan uejkapan niman kualtetsin, niman nikchiua ma uejkapania on kojtli yejuan pitentsin. Nejua nikuatsa on kojtli yejuan xoxouixtikaj, niman nikchiua ma xoxouiya on kojtli yejuan youakka. ¡Nejua nemoTEKO, nicumpliroua tlinon nikijtoua!' ”