On ichanejkauan Jerusalén nouikaj ken yakaj siuaauilnenketl
16
ToTEKO oksejpa onechnots niman onechijlij: 2 “Tejua tlaltikpaktlakatl, xkixkomaka Jerusalén nochi on tlajtlamach tlen sanoyej tetlajyeloj yokichiu. 3 Xkijli ika nejua nemoTEKO Dios ijkin nikijtoua: 'Tejua Jerusalén, ticananea desde otitlakat; motataj oyaj sen amorreo niman monanaj sen hitita. 4 Ijkuak otitlakat, xakaj mopan otlachix. On tonajli ijkuak otitlakat xomitsxikmekayotekej nion xomitsaltijkej; xomitsmatlalojkej ikan istatl para omitschipajkej, nion xomitstetejkuixkej ikan tojtontli. 5 Xakaj omitsiknelij, nion xakaj mopan otlachix para ijkon mitscuidaroskiaj. On tonajli ijkuak otitlakat, omitstlajkaltejkej ipan campo pampa sanoyej omitstlajyelitakej. 6 Kemaj, nejua onipanok kampaka tejua titlajkaltoya. Niman ijkuak onimitsitak titlatejteliksatok ipan moyesyo, onimitsiknelij, niman onimitsijlij: "Nejua xnimitskauilis timikis." 7 Niman onimitsiskaltij ken itlaj on xojtli yejuan onkaj ipan campo. Otimoskaltij kuajli niman otichpochtiak. Mochichiualuan onoskaltijkej niman otitsonueueyakiyak. Pero tejua sanken titetsotsoltik katka.8 ' 'Kemaj oksejpa onipanok kampaka tinemiya, niman onikitak yoajsik tiempo para timonamiktis. Niman onimitskentij notlakempani para oniktlapachoj on motsotsolistlalnakayo. Niman onimitstlajtolmakak ika mouan ninonamiktis. Nejua mouan onikchiu sen pacto de nonamiktilistli, niman tejua otimochiu tinosiuau. ¡Nejua akin nimoTEKO Dios, ijki nikijtoua onochiu! 9 Kemaj nejua onimitsaltij, onimitschipau de on yestli yejuan tikpiyaya niman onimitsajuiyalij. 10 Kemaj onimitstlakentij ikan tlakentli yejuan kipiya kualtetsin ikpanepanojli, niman onimitskaktij ikan kaktin yejuan sanoyej patiojkej; onimitstlaliltij sen xijlanilpikatl de lino niman onimitskuatlapachoj ikan tela de seda. 11 No ijki, onimitsintlaliltij kualneskayomej, makoskamej niman sen kualtetsin kechkoskatl. 12 Onimitstlaliltij sen anillo de oro ipan moyak niman onimitsintlaliltij pipiloltin ipan monakasuan, niman no, onimitstlaliltij sen kualtetsin corona ipan motsontekon. 13 Sanoyej otikualtetsintiak ikan miyek oro niman plata, motlakeuan katkaj de lino niman de seda yejuan kipiya kualtetsin ikpanepanojli. Tikuaya pan yejuan tlachijchijtli katka ika on más kuajli harina, niman tikuaya nekutli niman aceite de oliva. Sanoyej otikualtetsintiak ken sen reina. 14 Sanoyej omitsixmatkej ipan oksekimej naciones pampa sanoyej tikualtetsin katka. Sanoyej otikualtetsintiak pampa nejua onimitskualneskayotij. ¡Nejua akin nimoTEKO Dios, ijki nikijtoua onochiu!
15 ' 'Pero pampa sanoyej tikualtetsin katka niman miyekej omitsixmatkej, sanoyej otimoueyimat, niman otiktekitiltij mokualtsintilis para otiauilnen. Otimotemakak ken sen siuaauilnenki intech nochimej yejuan motech panouayaj. 16 Ikan on kualtetsin tlakentli yejuan onimitsmakak, otikinchijchiu pipitikej tiopankajkaltin ipan tepetsitsimej kampa otikinmauistilij on ídolos, niman ompa otiauilnen. 17 Otikintekitiltij on kualneskayomej de oro niman de plata yejuan nejua onimitsintlayokolij, para inka otikinchijchiu inmixneskayouan tlakamej, niman otikinmauistilij. Nixpan nejua, on ken sen auilnemilistli. 18 Otikintlaliltij motlakeuan yejuan kipiyaj kualtetsin ikpanepanojli, niman otikinuentlalilij on aceite niman on kopajli yejuan nejua onimitsmakak. 19 On pan yejuan nejua onimitsmakak, yejuan tlachijchijtli katka ika on más kuajli harina, niman on aceite niman on nekutli yejuan nejua onimitsmakak para xkua, tejua otikinmakak on ídolos ken itlaj uentli ajuiyak. ¡Nejua akin nimoTEKO Dios, ijki nikijtoua otikchiu!
20 ' 'Otikitak xueyi tlajtlakojli ika otiauilnen, yejua ika, on mokoneuan tlakamej niman siuamej yejuan onimitsinmakak, hasta otikinuentlalilij on ídolos ken tlakuajli para yejuamej. 21 ¡On nokoneuan yejuan onimitsinmakak, otikinmiktij! ¡Otikintlatij ken uentli inmixpan on ídolos! 22 Ika on tetlajyeloj nemilistli de siuaauilnenki yejuan tikpiya, niman ika nochi on okseki tetlajyeloj xompayejyeualistin yejuan tikchiua, hasta xok tikelnamiki ken tinemiya ijkuak tipitentsin katka, ika titetsotsoltik katka niman titlatejteliksatoya ipan moyesyo.
23 ' 'Nejua akin nimoTEKO Dios nikijtoua: ¡Sanoyej titlajyouis tejua Jerusalén pampa sanoyej yotitlajtlakoj! 24 Ipan on plazas niman nochiuiyan kampa tlamalakachouaj on kalpanojtin, otikinchijchiu tlaixpantin kampa tikinmauistilia on ídolos. 25 Niman ompa, otikijtlakoj on mokualtetsin tlachalis; otimokuep sanoyej titetlajyeloj pampa otimotemakak intech nochimej on tlakamej yejuan motechika panouayaj, niman ijki nochipa tiauilnemiya. 26 Niman no, otiauilnen iminuan on monisiuchanejkauan, on egipcios yejuan sanoyej eleuilistin, niman otikchiu para nejua sanoyej ma nikualani pampa tejua sa chika timotemakaya para tiauilnemiya iminuan.
27 ' 'Yejua ika tej, nejua onimitscastigaroj. Onikchiu para on motlauelikniuan seki ma kinoyaxkatikan on mopaís, niman onimitstemakak intech on motlauelikniuan filisteos yejuan sanoyej mitstlauelitaj niman mitstlajyelitaj pampa sanoyej tepinajtij ken timouika. 28 Pero pampa tejua xtiyolpachiuiya, no iminuan otiauilnen on asirios; pero nion ijki otiyolpachiu. 29 Kemaj kej otiauilnen iminuan on tlanemakakej yejuan chantij ipan on tlajli Babilonia; pero nion ijki otiyolpachiu. 30 Nejua akin nimoTEKO Dios, ijkin nikijtoua: Yotimotemakatinen para otiauilnen ken sen siuaaluinenki yejuan nion achijtsin xkipinajkayoj. 31 Nochiuiyan kampa tlamalakachouaj on kalpanojtin niman ipan nochimej on plazas, otikinchijchiu tlaixpantin kampa tikinmauistilia on ídolos, niman timotemaka ipan auilnemilistli. Pero tejua xmitstlaxtlauiliaj on tlakamej yejuan iminuan timoteka ken oksekimej siuaauilnenkej kintlaxtlauiliaj, yej tejua tikintlaxtlauilia on tlakamej.
32 'Tejua ken tisen siuatl yejuan xok iuan noteka iueuentsin, niman yej noteka iminuan on tlakamej yejuan xkinmixmati. 33 Nochimej siuaauilnenkej kintlaxtlauiliaj, pero tejua más tixompayejyeua pampa yej tejua tikinmaka tetlayokoliltin on momekauan, niman tikintlaxtlauilia para yejuamej ma uajlakan ma tlajtlakokij mouan. 34 Tejua okse tlamantik tiauilnemi, xken oksekimej siuaauilnenkej, pampa on tlakamej xyejuamej mitstejtemouaj para iminuan titlajtlakoua, nion xyejuamej mitstlaxtlauiliaj, yej tejua tikintlaxtlauilia yejuamej. ¡Yejua ika, tejua okse tlamantik tiauilnemi!
35 ' 'Yejua ika tej, tejua siuaauilnenki, xkaki notlajtol: 36 Nejua akin nimoTEKO Dios nimitsijlia: Tejua nion xotipinau otiktsotsoloj motlalnakayo para otiauilnen iminuan on momekauan, niman xtipinaua tikinmauistilia on motetlajyelojkauan ídolos. Niman no otikinmiktij mokoneuan yejuan otikinuentlalij. 37 Yejua ika tej, nejua nikinsentlalis nochimej on naciones yejuan otikimpaktij ken momekauan yeskiaj. Nikinsentlalis sanken on yejuan otikintlajsojtlak niman on yejuan otikintlauelitak, niman inmixpan nochimej, nimitskixtilis motlaken para ijki nochimej ma mitsitakan kuajli titetsotsoltik para ma mitspijpinauikan. 38 Nejua nimitscastigaros ipampa motlakapapatlalis ika oksekimej dioses otikinmauistilij niman pampa otitemiktij. Niman pampa sanoyej otinechkualanij, nimitstemakas para ma mitsmiktikan. 39 Nimitstemaktilis intech nochimej on naciones yejuan tikintlajsojtla, para yejuamej ma mitstlanikan niman ma kinxoxotonikan intlaixpanuan on ídolos kampa otiauilnen. Yejuamej mitskixtiliskej motlakeuan niman on mokualneskayouan, niman mitskauaskej kuajli titetsotsoltik niman ipan pinaualistli. 40 No ijki, yejuamej kichiuaskej para nochi tlakatl ma mitstlauelita, mitstemojmotlaskej niman mitsmiktiskej ikan iminespadas. 41 Kintlatiskej nochimej mokaluan, niman inmixpan miyekej siuamej mitscastigaroskej. Ijkon nimitskixtilis on mosiuaauilnenkayo, niman xokaman más tikintlaxtlauilis on momekauan. 42 Ijki tej, noyolika ninokauas tla yonimitscastigaroj, niman on notlauel pampa otikinmauistilij oksekimej dioses, no seuis. 43 Tejua Jerusalén, otikelkau nochi on tlen kuajli onikchiu mopampa ijkuak xtiueyixtikatka, niman sanoyej otinechkualanij ika otikchiu on tlen sanoyej tetlajyeloj. Yejua ika tej, nejua nimitscastigaros pampa sanoyej xkuajli ken otimouikak. ¡Nejua akin nimoTEKO Dios, ijki yonikijtoj nochiuas!
Ijkon ken sen nantli nouika, iichpokau no ijki nouikas
44 ' 'Nochimej on yejuan kitekitiltiaj uejueyitlajtoltin, ijkin mitsteneuiliskej: Ken sen nantli nouika, iichpokau no ijki nouikas. 45 Tejua tiichpokau sen nantli yejuan sanoyej kitlauelitaya iueuentsin niman ikoneuan; niman mokniuan siuamej, Samaria niman Sodoma, no sanoyej kintlauelitayaj iminueuentsitsiuan niman inkoneuan. Nenmonanaj katka sen hitita niman nenmotataj katka sen amorreo. 46 On mokniu siuatl yejuan yakatstiu niman ikoneuan, yejuan kixnextiaj on ueyikalpan Samaria niman ikalpantsitsiuan, nemij kampaka norte. Niman on mokniu siuatl yejuan más konetl niman ikoneuan, yejuan kixnextiaj on ueyikalpan Sodoma niman ikalpantsitsiuan, nemij kampaka sur. 47 Niman tejua xsan otitlajtlakoj ken mokniuan otlajtlakojkej, yej sanoyej más otitlajtlakoj xken yejuamej. 48 Nejua akin nimoTEKO Dios, ijkon ken melauak ninemi, ijkin ninotlajtolmaka: nion on mokniu Sodoma niman ikalpantsitsiuan, xsanoyej okichijkej on tlen sanoyej tetlajyeloj ken tejua Jerusalén otikchiu iminuan on kalpantsitsimej de Judá. 49 On mokniu Sodoma okichiu yejua in tlajtlakojli: yejua iminuan on oksekimej kalpantsitsimej yejuan onkatkaj nijnisiu, sanoyej onouejueyimatkej. Maski kipiyayaj miyek tlakuajli niman sanoyej kuajli chantiyaj, xkaman okimpaleuijkej on yejuan mayankej niman on yejuan xitlaj kipiyaj. 50 Yejuamej onouejueyimatkej niman okichijkej on tlinon nejua sanoyej nechkualania. Yejua ika, nejua onikinxoxotonij ken aman tejua tikinta. 51 Niman on mokniu Samaria, xokichiu nion tlajkotipan de on tlajtlakojli yejuan tejua yotikchiu. Tejua más sanoyej yotitlajtlakoj xken yejuamej. Motechika tejua, nesi ken yejuamej uej xkipiyaj tlajtlakojli. 52 Tejua tej, ika onkaj tikijyouis tlen sanoyej tepinajtij. Pampa tejua más otitlajtlakoj xken on mokniuan siuamej, yejuamej motechika nesi ken xmás kipiyaj tlajtlakojli. Tejua tej, ika onkaj tikijyouis más on pinaualistli niman más timoknelis xken yejuamej, pampa tejua más otitlajtlakoj xken on mokniuan siuamej, hasta nesi ken yejuamej uej xmás kipiyaj tlajtlakojli.
53 ' ‘Pero nejua oksejpa nikyenkuilis Sodoma niman Samaria iminuan inkalpantsitsiuan; niman tejua no oksejpa nimitsyenkuilis. 54 Pero achtoj, tejua ika onkaj timoknelis niman tipinauas de nochi on tlen sanoyej xkuajli otikchiu. Ijkuak on mokniuan siuamej mitsitaskej ika tikpanoua nochi on, noyoltlaliskej pampa kimatiskej ika yejuamej xsanoyej otlajtlakojkej ken tejua. 55 Niman ijkuak on mokniuan siuamej Sodoma niman Samaria iminuan inkalpantsitsiuan, oksejpa kuajli nemiskej ken achtoj nemiyaj, tejua iminuan mokalpantsitsiuan no oksejpa kuajli nennemiskej. 56-57 Ijkuak tejua sanoyej timoueyimatiya, niman ijkuak sanken xe panesiya on moxompayejyeualis, tejua ika otiuetskak mokniu Sodoma ijkuak onicastigaroj. Pero aman on uejueyikalpanmej edomitas niman filisteas, niman nochimej on oksekimej países, mitsuijuikaltiaj; ¡nochiuiyan mitstlauelitaj pampa nochimej yokimatkej moxompayejyeualis! 58 Aman ika onkaj tikijyouis on castigo ipampa on tlinon xkuajli niman tetlajyeloj otikchiu. ¡Nejua akin nimoTEKO, ijki nikijtoua nochiuas!
59 ' 'Nejua akin nimoTEKO Dios, ijkin nikijtoua: Nimitsmakas motlaxtlauil ijkon ken tejua mitsmelaua tikselis, pampa xotikchiu ken otimotlajtolmakak niman xoticumpliroj on pacto yejuan nouan otikchiu. 60 Pero nejua kemaj nicumpliros on pacto yejuan onikchiu mouan ijkuak tejua ueyikalpan Jerusalén xe tiueyixtikaka, niman nikchiuas mouan sen pacto yejuan xkaman popoliuis. 61 Kemaj tejua tikelnamikis kenijki xkuajli otimouikak niman sanoyej tipinauas. Nikchiuas para on mokniuan siuamej Samaria niman Sodoma nochiuaskej ken mochpochuan yeskiaj maski yejua in xkijtoua ipan on pacto yejuan onikchiu mouan. 62 Nejua nikyenkuilis nopacto mouan, niman tejua tikmatis ika nejua nimoTEKO. 63 Ijkuak nejua nimitstlapojpoluis nochi on tlen xkuajli otikchiu, tejua tikelnamikis nochi on motlajtlakoluan niman sanoyej tipinauas, hasta xok tiuelis timoueyiteneuas ipampa on mopinauis. ¡Nejua akin nimoTEKO Dios, ijki yonikijtoj nochiuas!' ”