On ichanejkauan Israel no ijkej ken sen xkuajli uvajkuamekatl
15
ToTEKO oksejpa onechnots niman onechijlij: 2 “Tejua tlaltikpaktlakatl, ¿Ipan tlinon ika más kuajli ikojyo on uvajkuamekatl, xken inkojyo on oksekimej kojtin? 3 Ikojyo on uvajkuamekatl xok ueli notekitiltia para kichijchiuaskej muebles nion para sen tlapijpiluastli, nion para itlaj okse. Ikojyo on uvajkuamekatl xok itlaj ika ueli notekitiltia, nion para kichijchiuaskej muebles, nion para ipan tlapipiloskej. 4 Yej san notekitiltia para tlatla. Ijkuak yotlatlak ikuayakauan niman nochi itlajkotian xok itlaj ika ueli notekitiltia. 5 Tla ijkuak xe tlatlaya, xitlaj ika ueliya notekitiltiaya, tla ijkon, ¡ijkuak yotlatlak más xok itlaj ika uelis notekitiltis!6 'Yejua ika tej, nejua nemoTEKO Dios nikijtoua: On yejuan chantij Jerusalén no ijkej ken sen xkuajli uvajkuamekatl. Ijkon ken ikojyo on uvajkuamekatl kontlajkalij tliko para ma tlatla, no ijki nikominxinis tliko on chanejkej Jerusalén. 7 Nejua ninokuepas niintlauelikniu yejuamej. Tla onomanauijkej de sen tlitl, nejua nikchiuas para ipan okse tlitl ma xinitij. Niman ijkuak nejua ninokuepas niintlauelikniu, kimatiskej ika nejua niiminTEKO Dios. 8 Nejua kuajli nikxoxotonis imimpaís, hasta nikauas ken sen xalpatlajkan. Ijkon nikchiuas pampa yejuamej onechtlalkauijkej. ¡Nejua akin niiminTEKO Dios, ijki yonikijtoj nochiuas!”