On temachistijli yejuan kijtoua ika nochimej yejuan kinmauistiliaj ídolos kiseliskej castigo
14
Sakin, keskimej intlayekankauan on israelitas oualajkej notech niman onoseuijkej nixpan pampa kinekiyaj itlaj kitlajtoltiskej toTEKO notechkopa. 2 Kemaj toTEKO onechnots, niman ijkin onechijlij: 3 "Tejua tlaltikpaktlakatl, yejuamej in tlayekankej, ikan nochi iminyojlo sanoyej yonotemakakej intech iminídolos niman san kitejtemouaj tlajtlakolchiuaskej. Yejua ika tej, ¿tline nikinkauilis itlaj ma nechtlajtoltikan? 4 Tejua tej, xkiminnotsa niman xkinmijli ika nejua nemoTEKO Dios ijkin nikijtoua: 'Cada israelita yejuan yokimakak iyojlo on ídolos para kinmauistilia niman kinkauilia on ídolos ma kiyekanakan ipan tlajtlakojli niman kemaj yas itech on tiotlajtojketl para itechkopa nechtlajtoltis itlaj, nejua niknankilis ikan sen castigo ken kimelaua impampa on miyekej ídolos yejuan kimpiya.'5 'Ijki nikchiuas, para ijki nikinyoltilanas nochimej on israelitas yejuan onechtlalkauijkej impampa iminídolos, niman ijki yejuamej oksejpa nechmauistiliskej. 6 Yejua ika tej, xkinmijli on israelitas ika nejua nemoTEKO Dios ijkin nikinmijlia: 'Xmoyolpatlakan, xkintlalkauikan on nemoídolos niman makasa xchiuakan on tlajtlamach tlen sanoyej tetlajyeloj.' 7 Tla sen israelita noso se yejuan xchanej yejuan chanti ipan on tlajli Israel nechtlalkauiya para kinmauistilia on ídolos, niman kinkauilia on ídolos ma kiyekanakan ipan tlajtlakojli, niman kemaj yau itech on tiotlajtojketl para itechkopa nechtlajtoltis itlaj, nejua, sano nejua niknankilis. 8 Nejua nikixnamikis on tlakatl, niman nikteititis ken nicastigaroua on yejuan kinmauistilia ídolos, niman nikixtis intech on notlapejpeniluan. Niman ijki nemejuamej nenkimatiskej ika nejua ninemoTEKO.
9 'Niman tla nikauilia sen tiotlajtojketl nokajkayaua niman mechijlia sen tiotlajtojli yejuan xmelauak, nejua nicastigaros on tiotlajtojketl niman nikixtis intech on notlapejpeniluan israelitas. 10 Sanken on tiotlajtojketl niman on yejuan itlaj kontlajtoltis, nikincastigaros impampa intlajtlakol. 11 Ijki nikchiuas, para nemejuamej israelitas makasa nennechtlalkauiskej niman makasa nenmijtlakoskej ika nenmotlajtlakoluan. Niman ijki, nemejuamej nennotlapejpeniluan yeskej, niman nejua ninemoDios yes. ¡Nejua akin ninemoTEKO Dios, ijki yonikijtoj nochiuas!”
On temachistijli yejuan kijtoua ika Jerusalén kiselis icastigo ken kimelaua
12 ToTEKO oksejpa onechnots, niman onechijlij: 13 “Tejua tlaltikpaktlakatl, tla sen país tlajtlakoua nixpan niman xkineki nechtlakamatis, nejua nicastigaros ikan chauistli ipan itlatok niman ikan mayantli. Niman ijki, nochimej on ompa chantij mikiskej inuan inyolkauan. 14 Niman tla ipan on país chantiskia Noé, Daniel niman Job, san yejuamej yeyimej nomakixtiskiaj pampa yejuamej yolmelajkej. ¡Nejua nemoTEKO Dios, ijki nikijtoua!
15 'Noso san ma tikonijtokan, nejua nikintitlanis yolkej yejuan tekuanimej ipan sen país, para ma kinmiktikan nochimej on yejuan ompa chantij, niman ijkon on país nokauas ken sen xalpatlajkan kampa xok yakaj kinekis panos pampa kinmakajsiskej on yolkej tekuanimej. 16 Niman tla ipan on país chantiskiaj on yeyimej tlakamej Noé, Danel niman Job, yejuamej xueliskiaj kinmakixtiskiaj inkoneuan tlakamej niman siuamej; yej san yejuamej yeyimej nomakixtiskiaj, niman on país nokauaskia ken sen xalpatlajkan. ¡Nejua nemoTEKO Dios, ijkon ken melauak ninemi, ijki ninotlajtolmaka!
17 “Noso no san ma tikonijtokan, nejua nikchiua ma uajla nouijsokilistli ipan on país, niman nikinnauatia on itlauelikniuan ma kinmiktikan nochimej on ompa chanejkej inuan inyolkauan. 18 Niman tla ompa chantiskiaj on yeyimej tlakamej, yejuamej xueliskiaj kinmakixtiskiaj inkoneuan tlakamej niman siuamej; yej san yejuamej yeyimej nomakixtiskiaj. ¡Nejua nemoTEKO Dios, ijkon ken melauak ninemi, ijki ninotlajtolmaka!
19 'Noso oksejpa san ma tikonijtokan, nejua ikan notlauel nikinuajtitlanis kokolistin ipan on país para ma mikikan on ompa chanejkej iuan inyolkauan. 20 Tla ompa chantiskia Noé, Danel niman Job, yejuamej xueliskiaj kinmakixtiskiaj inkoneuan tlakamej niman siuamej; yej san yejuamej yeyimej nomakixtiskiaj pampa yejuamej yolmelajkej. ¡Nejua nemoTEKO Dios, ijkon ken melauak ninemi, ijki ninotlajtolmaka!
21 'Nejua nemoTEKO Dios ijkin nikijtoua: Más temojtij yes ijkuak nikontitlanis ne Jerusalén in naui temojtij castigo: on nouijsokilistli, on mayantli, on tepeyolkej tekuanimej niman on kokolistin; niman ika nochi in, mikiskej on ompa chanejkej inuan inyolkauan. 22 Sa keskimej nomanauiskej, niman ueliskej kisaskej de ompa iminuan inkoneuan tlakamej niman siuamej. Niman ijkuak yejkoskej ken esclavos ne Babilonia kampa nennemij, nenkitaskej ken sanoyej xompayejyeuamej. Niman ijki nenkimatiskej tline ijkon onicastigaroj Jerusalén. 23 Ijkuak nenkintaskej, nenkimatiskej ika sanoyej xkuajli ken onouikakej niman sanoyej xkuajli tlen okichijkej. Niman ijkuakon nenkimatiskej tline ijkon onicastigaroj Jerusalén. ¡Ijki nochiuas pampa nejua akin ninemoTEKO Dios ijki yonikijtoj nochiuas!”