Temachistijli yejuan kijtoua ika on tlakamej yejuan xmelauak tiotlajtojkej kiseliskej castigo
13
ToTEKO onechnots, niman onechijlij: 2 “Tejua tlaltikpaktlakatl, xtiotlajto ikan notokatsin de on tlinon xkuajli impan nochiuas on tiotlajtojkej de ne Israel, on tiotlajtojkej yejuan san yejuamej kinejnemiliaj tlinon kijtouaj. Xkinmijli ma kakikan ika nejua nemoTEKO Dios ijkin nikijtoua: 3 '¡Sanoyej tlajyouiskej on yejuan xmelauak tiotlajtojkej, yejuan san yejuamej kinejnemiliaj tlinon kijtouaj niman xnejli kiseliaj on tlatlachalistli ken ipan intemikpan. 4 Israelitas, on nemotiotlajtojkauan sanenkaj nemij, ken itlaj on ostotsitsimej yejuan tlakojkoyoniaj ipan sen ueyikalpan kampa tlaxoxotontok. 5 Nemejuamej tiotlajtojkej xitlaj nenkichiuaj para nenkuektlaliskej intepanchinanuan on israelitas para ma kojtitiakan, niman ijki uelis nomanauiskej de on intlauelikniuan yejuan nejua nemoTEKO Dios nikomintitlanilis. 6 On nemotlatlachalis ken ipan nemotemikpan yejuan nenkijtouaj nenkipiyaj, niman on nemotiotlajtol, xmelauak. Nenkijtouaj ika nejua nemechtitlani para xteijlikan notlajtol, pero nejua xitlaj nemechnauatia xteijlikan. ¡Niman nenkinemiliaj nochiuas on tlinon yonenkijtojkej! 7 ¡On tlatlachalistli ken ipan temiktli yejuan nenkijtouaj nenkipiyaj, xmelauak! ¡On nenmotiotlajtol san tlakajkayaualistli! Nenkijtouaj ika on tlinon nenkiteijliaj yejua notlajtol maski xitlaj onemechijlij xteijlikan.8 'Yejua ika tej, nejua nemoTEKO Dios ijkin nikijtoua: Pampa nemejuamej san nentlakajkayajtokej, niman nenkijtouaj nenkipiyaj tlatlachalistli ken ipan temiktli maski xnejli, ninokuepas nemotlauelikniu. ¡Nejua akin ninemoTEKO Dios ijki yonikijtoj nochiuas! 9 Nejua nemechcastigaros nemejuamej tiotlajtojkej yejuan nenkijtouaj nenkipiyaj tlatlachalistli ken ipan nemotemikpan niman ijkon nentlakajkayauaj. Nemejuamej xteuan nentlapoualtin yeskej itech on notlapejpeniluan israelitas ijkuak nosentlaliskej. On nenmotoka xtlajkuilolnestias kampa tlajkuilolnestiaskej imintoka on israelitas, nion xnenmokuepaskej ipan on tlajli Israel. Niman ijki nemejuamej nenkimatiskej ika nejua ninemoTEKO Dios.'
10 'Ijki tej, nenmopan nochiuas pampa onenkinkajkayajkej on notlapejpeniluan. Onenkinmijlijkej nochi kuajli onkaj maski xnejli. Onenkichijkej ken ijkuak sen tlakatl kichijchiua sen tepantli yejuan xkojtitikaj. Kemaj kixpetsoua ika tenextli para san tlaixkajkayajtikaj para nochimej kinemiliskej ika kojtitikaj. 11 Pero on tepantli de nenmotlakajkayaualis yejuan nemejuamej onenkixpetsojkej, nimantsin uetsis pampa nejua nikchiuas para sanoyej chikauak ma kiaui ipan niman ipan ma xini tejsiutli ken itlaj on temej, niman nikchiuas sanoyej chikauak ma ajaka. 12 Niman ijkuak on tepantli youets, oksekimej mechtlajtoltiskej: '¿Tlinon kuajli okichiu on tenextli yejuan ika onenkixpetsojkaj on tepantli?' 13 Yejua ika tej, nejua nemoTEKO Dios nikijtoua: Ikan notlauel nikchiuas sanoyej chikauak ma ajaka, niman nikchiuas sanoyej chikauak ma kiaui niman ma xini tesiutli ken itlaj on temej para nochi ma kixoxotoni on tepantli yejuan onenkixpetsojkej ikan tenextli. 14 On tepantli yejuan onenkixpetsojkej ikan istlakatilistli xoxotonis hasta icimentos. On nenmoistlakatilisuan xinis nenmopan kenon yetikej temej, niman ompa nenmikiskej. Niman ijki nenkimatiskej ika nejua ninemoTEKO. 15 Nejua ninotlauelkixtis ika on tepantli niman nemoka nemejuamej yejuan onenkixpetsojkej, niman nikijtos: 'Yopopoliu on tepantli, niman yopopolijkej on yejuan okixpetsojkaj on tepantli. 16 Yopopolijkej on tiotlajtojkej yejuan kijtouayaj kipiyayaj intlatlachalis ken ipan intemikpan maski xnejli, niman kinmijliayaj on chanejkej Jerusalén ika nochi kuajli onkaj maski xnejli.' ¡Nejua nemoTEKO Dios, ijki nikijtoua!
Temachistijli yejuan kijtoua ika on siuamej yejuan xmelauak siuatiotlajtojkej kiseliskej castigo
17 'Aman, tejua tlaltikpaktlakatl, xkiminnotsa on siuamej yejuan ichanejkauan Jerusalén, yejuan san yejuamej kinejnemiliaj para tenojnotsaj ikan notokatsin. 18 Xkinmijli ika nejua nemoTEKO Dios ijkin nikijtoua: '¡Sanoyej nentlajyouiskej nemejuamej siuamej yejuan sanoyej nenkinkajkayauaj on notlapejpeniluan ikan on cintas de naualyotl yejuan nenkinchijchiuaj para ika nochimej nomasalouaj! Niman no nenkinchijchiuaj velos de naualyotl para nochimej ika nokuatlapachouaj niman ijki nemejuamej nenkinyekanaj ipan iminnemilis. Pampa ijkon nenkinkajkayajtokej on notlapejpeniluan israelitas, ¿nenkinemiliaj nenmomanauiskej de on mikilistli? 19 Nemejuamej, san ika keski mapichtli cebada niman ika keski pantlatlajko, omechtlaxtlauilijkej pampa onenchijkej naualyotl}, niman xnennechtlakaitaj inmixpan nochimej on notlapejpeniluan israelitas. Nenkinmiktiaj yejuan xkinmelauaya mikiskej, niman nenkinkauiliaj ma nemikan yejuan uej kemaj kinmelauaya mikiskej. Ijki nenkinkajkayauaj on notlapejpeniluan, niman kineltokaj nenmotlakajkayaualis. 20 Yejua ika tej, nejua nemoTEKO Dios nikijtoua: Nejua sanoyej nennechkualaniaj pampa nenkinchijchiuaj on cintas de naualyotl yejuan ika nochimej nomasalouaj, yejuan ika nenkintlatlaliliaj on notlapejpeniluan ken totomej yeskiaj. Nejua nikinmanauis on notlapejpeniluan nemotech, niman nikinmakauas kenon totomej ijkuak kinmakauaj para ma patlanikan. 21 Nejua nemechkuilis on velos niman nikinmanauis on notlapejpeniluan de nemejuamej niman de on nemonaualyo yejuan ika yonenkinnaualuijkej. Xokaman oksejpa nenkinkajkayauaskej. Niman ijki nemejuamej nenkimatiskej ika nejua ninemoTEKO. 22 Nemejuamej ikan nenmotlakajkayaualis, yonenkintlamachilispolojkej on kuajkualtin tlakamej. Yonenkinchiuilijkej on tlen nejua xniknekiya impan ma nochiua. Niman on yejuan xkuajkualtin tlakamej, uej onenkinyolchikajkej para sanken ma kichiuakan on tlinon xkuajli, para nejua maka ma nikinmaka nemilistli. 23 Yejua ika, nemejuamej xok nenkiteijliskej on tlatlachalistin ken ipan temiktli yejuan xmelauak, niman xokaman nenkiteijliskej on tiotlajtoltin de on tlen xnejli nochiuas. Nejua nemechinkuilis on notlapejpeniluan yejuan nemomak nemij. Ijkuakon, nemejuamej nenkimatiskej ika nejua ninemoTEKO.' "