ToTEKO kimaka promesas Baruc
45
Ijkuak Joacim, ikoneu Josías, kuikaya naui xipan ika tlamandarouaya ken rey ne Judá, niman chika Baruc, ikoneu Nerías, kijkuilouaya on tlinon kijliaya on tiotlajtojketl Jeremías ma kijkuilo, Jeremías okijlij Baruc: 2-3 "Tejua, Baruc, tikijtoua: '¡Sanoyej nitlajyouiya! ¡ToTEKO yej san nechajtitlanilia on tlajyouilistli niman on tlinon teajman! Nejua yonisiau ika nichoka niman xniueli niknextia on neseuijli.'Pero toTEKO ijkin kijtoua de tejua, 4 niman nechnauatia para ijkin ma nimitsijli: 'Nejua nikxoxotonia on tlinon nejua nikchijchiua, niman nikuiuitla on tlinon nejua niktôka. Niman no ijki nikchiuas iuan nochi in nación de Judá. a 5 ¿Tikneki titlajtlanis para tejua uejueyi tlajtlamach? Maka xtlajtlani, pampa nejua nikuajtitlanis sen ueyi castigo intech nochimej in tlakamej. Pero tejua uej timitskauilis tinemis san kanon kampa tejua tiknekis tias. Nejua moTEKO ijki nikijtoua.' "