ToTEKO kincastigaros on Judíos yejuan oyajkej Egipto
44
In yejua tlajtojli okiselij Jeremías para okinmijlij on judíos yejuan chantiyaj Egipto, ipan on uejueyikalpamej Migdol, Tafnes Menfis niman ipan on región yejuan nokaua kampaka sur: 2 "ToTEKO yejuan nochi ueli kichiua, iDios Israel, kijtoua: 'Nemejuamej yonenkitakej nochi on tlen xkuajli onikuajtitlan ipan Jerusaén niman ipan on oksekimej iueyikalpanuan Judá. Yejuamej hasta aman yokinxoxotonijkej, niman ompa xok yakaj chanti, 3 pampa yejuamej okichijkej on tlinon sanoyej xkuajli. Tej, onechkualanijkej ika okinmauistilijkej oksekimej dioses niman ika okinuentlalilijkej kopajli, dioses yejuan yejuamej nion nemejuamej niman nenmoachtojtajuan xokinmixmatkej. 4 Nejua miyekpa onikomintitlan notekitkauan tiotlajtojkej para ma mechijlikan maka xchiuakan on sanoyej xkuajli yejuan nejua xnikxikoua nikita. 5 Pero nemejuamej xonennechtlakamatkej niman xonennechchiuilijkej cuentaj. Xonenkajkajkej nenkichiuaj on tlin xkuajli, yej sanken onenkinuentlalilijkej kopajli oksekimej dioses. 6 Yejua ika, notemojtij tlauel sanoyej yokauan ken itlaj tlitl ipan iminuejueyikalpanuan Judá niman ipan iuejueyiojuiuan Jerusalén. Aman ompa tlaxojxotontok, niman xok yakaj chanti.7 " 'Ijkon tej, nejua, nemoTEKO, yejuan nochi ueli nikchiua, iminDios Israel, nemechtlajtoltia: ¿Tline tej nemejuamej nenkichiuaj para ma nemechajtitlanili on tlen sanoyej xkuajli? ¿Tline tej nenkichiuaj para ma mikikan nochimej on chanejkej Judá, tlakamej, siuamej, niman kokonej hasta on yejuan kemach tlakatij, niman ijki xok yakaj nokaua? 8 ¿Tline tej nennechkualaniaj ika on tlen nenkichiuaj niman nenkinuentlalilia kopajli oksekimej dioses nikan Egipto, kampa aman nennchantij? Ika on tlen nenkichiuaj, sano nemejuamej nenmixpolouaj, niman nochimej on naciones ipan in tlaltikpaktli mechitaskej ken tlauelijli niman pinaualistli. 9 ¿Ka yej yonenkelkajkej nochi on tlajtlamach tlinon xkuajli okichijkej nenmoachtojtajuan, niman on tlinon okichijkej on reyes de Judá niman insiuauan, niman no on tlen nemejuamej niman nenmosiuauan onenkichijkej ipan iuejueyitlalpan Judá niman ipan iuejueyiojuiuan Jerusalén? 10 Hasta aman nenmejuamej xnenkipatlaj ken nenmouikaj. Nion achijtsin xnenmomojtiaj ijkuak xnenechtlakamatij. Xnenkichiuaj on tlen onemechmachtij, nion xnenkitlakamatij on leyes yejuan onemechmakak nemejuamej niman nemoachtojtajuan.
11 ' 'Yejua ika, nejua nemoTEKO yejuan nochi ueli nikchiua, niiDios Israel, nikijtoua: Nejua yonikijtoj ipan noyojlo, ika nemechajtitlanilis on tlen sanoyej xkuajli niman nochi Judá nikxoxotonis. 12 On yejuan onokajkaj Judá niman sanoyej okinekej oyajkej Egipto, nikchiuas para ompa ma popoliuikan. Desde on yejuan más konetl hasta más ueuentsin, mikiskej ikan on nouisokilistli, noso ika on mayantli. Oksekimej kintlauelitaskej, inka uetskaskej, kinchichiititaskej, niman kintaskej ken tlauelijli. 13 Nejua nikinmakas incastigo on yejuan ochantitoj Egipto ijkon ken onikincastigaroj on chanejkej Jerusalén, ikan nouisokilistli, mayantli niman ika kokolistli. 14 Nion semej xueliskej choloskej noso nemiskej de on keskimej yejuan ochantitoj Egipto. Niman maski kinekiskej oksejpa nokuepaskej Judá para oksejpa ompa chantiskej, xok nokuepaskej, yej san keskimej yejuan uelis ompa onnomanauiskej.' "
15 Nochimej on judíos yejuan chantiyaj ipan on región sur de Egipto onochijkej sanoyej tojlamej. Ompa nemiyaj miyekej siuamej niman on tlakamej yejuan kimatstikatkaj ika insiuauan kinuentlaliliayaj kopajli oksekimej dioses. Yejuamej okijlijkej Jeremías:
16 —Tejuamej xtiktlakamatiskej itlajtoltsin toTEKO yejuan titechijlia. 17 Tejuamej, sanken tikchiuaskej on tlinon tejuamej yotiknemilijkej tikchiuaskej. Tejuamej sanken tikuentlaliliskej kopajli niman vinojuentli on diosa Reina Iluikakchanej, ken tejuamej tikuajchijtiuij hasta aman, niman no ijki ken okichijkej toachtojtajuan, on reyes niman on tlayekankej ipan inuejueyikalpanuan Judá niman ipan iuejueyiojuiuan Jerusalén. Ijkon tichiuaskej pampa achtoj tikpiyayaj miyek tlakuajli, niman kuajli tichantiyaj niman xitlaj nochiuaya topan tlen xkuajli. 18 Pero ijkuak tejuamej xok otikuentlalilijkej kopajli niman on vinojuentli on diosa Reina Iluikakchanej, nochi techpoloua, niman tochanejkauan mikij ikan mayantli noso mikij ipan nouisokilistli.
19 On siuamej no okijtojkej:
—Tejuamej tikchijchiuayaj memelatsitsimej kampa ixnestiaya on Reina Iluikakachanej, niman tikuentlaliliayaj kopajli niman vinojuentli. Pero nochi in inuan tikmatiyaj toueuentsitsiuan, niman yejuamej techkauiliayaj ma tikchiuakan. Yejua ika sanken ijki tikchiuaskej.
20 Kemaj Jeremías okinmijlij on tlakamej niman on siuamej yejuan ijkin okinankilijkej:
21 —¿Nenkinemiliaj ika toTEKO xkimatiya, noso yokelkau ika nemejuamej, nenmoachtojtajuan, nenmoreyes, nenmotlayekankauan niman nochimej on tlakamej, kinuentlaliliaj kopajli oksekimej dioses ipan inuejueyikalpanuan Judá niman ipan iuejueyiojuiuan Jerusalén? 22 Yejua ika, toTEKO xok kixikoua kitas on tlen sanoyej xkuajli nenkichiuaj, niman yejuan sanoyej kikualania. Yejua ika, aman nenmopaís yokixoxotonijkej niman ompa xok yakaj chanti. Aman on ueyikalpan kijtaj inisiuchanejkauan niman nochi tlaltikpaktli ken tlauelijli niman pinaualistli, niman nochimej kitaj ken itlaj yejuan sanoyej temojtij. 23 On tlinon sanoyej xkuajli nemopan yonochiu on pampa nemejuamej onenkinuentlalilijkej kopajli oksekimej dioses, niman ijki onentlajtlakojkej itech toTEKO, niman pampa xonenkitlakamatkej itlamachtiluan niman ileyes. Niman nion xonenkichijkej on tlinon yejua tlanauatia.
24 Jeremías no okinmijlij nochimej on tlakamej, niman más okinmelajkaijlij on siuamej:
—Xkakikan in tlajtojli yejuan toTEKO mechijlia nenmochimej, chanejkej de Judá yejuan aman nenchantij nikan Egipto. 25 ToTEKO yejuan nochi ueli kichiua, iDios Israel, kijtoua: “Nemejuamej siuamej nenkijtouaj niman nenkichiuaj on tlinon nenkijtouaj. Nemejuamej yonenmotlajtolmakakej ika sanken nenkiuentlaliskej kopajli niman on vinouentli itech on Reina Iluikakchanej, niman ika nenkichiuaskej ijkon ken yonenmotlajtolmakakej. ¡Tla ijkon, ijki xchiuakan! ¡Xchiuakan nochi ken yonenmotlajtolmakakej! 26 Pero kuajli xkakikan tlinon nejua, nenmoTEKO nemechijlia, nemejuamej yejuan nenchantiyaj Judá niman aman nenchantij Egipto. Nejua ninotlajtolmaka ikan noueyitokatsin ika xok yakaj tlakatl de Judá oksejpa kiteneuas notokatisn ipan nochi in tlajli de Egipto. Xok kijtoskej: 'Ninotlajtolmaka ika itokatsin Dios'. 27 Nejua ika ninokauas niktejtemos tlinon ika nemechtlajyouiltis, niman xpara nemechchiuilis tlen kauajli. Nenmochimej yejuan nenualeuaj Judá niman aman nennemij Egipto nochimej nenmikiskej, sekimej ikan nouisokilistli niman sekimej ikan mayantli. 28 San keskimej xmikiskej ipan nouisokilistli niman kisaskej de Egipto para nokuepaskej Judá. Niman ijkon, nochimej yejuan onokajkej Judá niman aman chantij Egipto, kitsakej katlejua tlajtojli onochiu, tla nejua notlajtol noso yejuamej intlajtol.
29 'Nejua nemoTEKO nikneki para nenkimatiskej ika melauak nemechtlajyouiltis niman nemechpopolos nikan Egipto ken onemechijlij. Ikan in señal nenueliskej nenkitaskej ika melauak nikchiuas. 30 Nejua niktemaktilis Hofra, rey de Egipto, para ma uetsi ipan imauan intlauelikniuan yejuan kinekij kimiktiskej, no ijki ken oniktemaktilij Sedequías, rey de Judá, ipan imauan Nabucodonosor, rey de Babilonia, yejuan kinekiya kimiktis."