Jeremías okuikakej Egipto
43
Ijkuak Jeremías otlan kimijlia on tlakamej nochi on tlajtlamach tlinon toTEKO, inDios yejuamej, okijlijka para ma kinmijli, 2 Azarías, on ikoneu Osaías, Johanán, ikoneu Carea, niman oksekimej tlakamej yejuan sanoyej nouejueyimatij okijlijkej Jeremías: "¡On tlinon tikijtoua xmelauak! ToTEKO Dios xejua omitsijlij xtechijli para maka ma tiakan ma tichantitij Egipto. 3 Manin yej Baruc, on ikoneu Nerías, yejua omitsijlij ijki xtechijli, para tejuamej ma tiuetsikan ipan inmauan on babilonios niman ma techmiktikan noso ma techuikakan ken esclavos ne Babilonia."4 Ijkon tej, Johanán, intlayekankauan on soldados niman nochimej on chanejkej xokinekkej onokajkej ipan iueyitlalpan Judá, niman xokitlakamatkej toTEKO. 5 Yej, Johanán niman intlayekankauan on soldados okinsentlalikej niman okinuikakej Egipto nochimej on yejuan yonokuepkaj Judá, on yejuan onosesemankaj ipan oksekimej países. 6 Intech on tojlamej nemiyaj tlakamej, siuamej, kokonej, iichpochuan on rey niman nochimej on tlakamej yejuan Nabuzaradán, intlayekankau on soldadostlajpixkej, okinkajkaj itech Gedalías para impampa ma tlacha. Jeremías niman Baruc no okinuikakej. 7 Ijkon tej, xokitlakamatkej on tlen otlanauatij toTEKO, niman oyajkej Egipto. Oajsikej hasta ne ipan on ueyikalpan Tafnes.
8 Ipan on ueyikalpan Tafnes, toTEKO oksejpa okinots Jeremías niman okijlij: 9 "Xkitki keski tetl uejueyimej niman, inmixpan nochimej on chanejkej Judá, xkintlalakti ipan tlajli niman xkintlalpachoj, nisiu ikiauatempan ipalacio on rey yejuan onkaj ipan in ueyikalpan. 10 Niman xkinmijli: 'ToTEKO yejuan nochi ueli kichiua, iDios Israel, kijtoua: Nejua nikchiuas para ma uajla notekitkau Nabucodonosor, on rey de Babilonia, niman nejua niktlalis itrono ipan in temej yejuan nikan yonikintlalaktij. 11 Yejua uajlas niman kixoxotonis in país de Egipto. On yejuan ye ijki onkaj mikiskej, yejuamej mikiskej; yejuan ye ijki onkaj kinuikaskej ken esclavos, yejuamej ken esclavos kinuikaskej; niman yejuan ye ijki onkaj mikiskej ipan nouisokilistli, yejuamej ipan nouisokilistli mikiskej. 12 On rey de Babilonia kintlatis intiopanuan on ídolos de Egipto, niman kintlatis on ídolos noso kinkuikas ken sen tlachteki. Yejua kichipauas in país de Egipto, ken ijkuak sen tlajpixki kitlajtlamalia itlaken ikan tekpinmej, niman yejua yas nion xakaj uelis kiteltis. 13 Kinxoxotonis on uejueyimej pilares de tetl yejuan kinmauistiliaj yejuan onokej Heliópolis, ne Egipto, niman kintlatis intiopanuan on ídolos de Egipto.' "