Jeremías impampa tlatlani on chanejkej itech toTEKO
42
Nochimej on intlayekankauan on soldados, Johanán, on ikoneu Carea; Azarías, on ikoneu Hosaías, niman nochimej on tlakamej, uejueyimej niman pipitikej, ononisiuikej 2 itech on tiotlajtojketl Jeremías niman okijlijkej:—Timitstlajtlaniliaj sen ueyi favor niman maka yej timonenekis: Xtlajtlanili moTEKO Dios topampa, tejuamej yejuan sa tikeskimej titokauaj. Tejuamej titojlamej katka, pero aman sa tikeskimej tinemij, ken ueli tikita. 3 Xtlajtlanili moTEKO Dios para ma techititi ipan katlejua ojtli tiaskej, niman tlinon kitocaroua tikchiuaskej.
4 Jeremías okinnankilij:
—Tla ijkon kuajli. Niktlajtlanis nenmopampa itech nenmoTEKO Dios, ken onennechijlijkej, niman nenmechijlis on tlen yejua nechijlis. Nejua xitlaj nemechiyanilis.
5 Kemaj ijkin okijlijkej Jeremías:
—Ma moTEKO Dios yejuan nochipa teyolkuitia melajki niman xkaman kijtoua on tlen xmelauak, ma ixpanti tla tejuamej xtikchiuaskej on tlen yejua technauatia. 6 Tla tikuelkakiskej noso xtikuelkakiskej ken yejua mitsnankilis, tiktlakamatiskej toTEKO Dios, akin timitstlajtlaniliaj xtlajtolti, para ijki tejuamej kuajli tinemiskej.
ToTEKO okinankilij Jeremías
7 Ipan majtlaktli tonajli, toTEKO okinots Jeremías, 8 niman kemaj Jeremías okitekuitlan Johanán, on ikoneu Carea, niman intlayekankauan on soldados yejuan iuan uajlayaj, niman nochimej on tlakamej, desde on más pitentsin hasta yejuan más ueyi, 9 niman okinmijlij: "ToTEKO, iDios Israel, akin onennechtlajtlanilijkej para itech nitlajtlanis on tlinon nenkinekiyaj nenkimatiskej, yejua kijtoua: 10 'Tla melauak nenkinekij nenmokauaskej ipan in tlajli, nejua sanoyej nemechtiochiuas. Xnemechpopolos, yej kuajli nennemiskej niman nejua xnemechkixtis. Tej, nejua ninajmana pampa onemechajtitlanilij on tlen xkuajli. 11 Maka xmakasikan on rey de Babilonia, yejuan sanoyej nenkimakasij. Maka xmakasikan, pampa nejua nenmouan ninemi para nemechmakixtis niman nemechmanauis itech ipoder. Nejua nemoTEKO ijki nikijtoua. 12 Pampa nemechiknelia, nikchiuas para yejua ma mechikneli niman oksepa ma mechkauili xmokuepakan ipan nenmotlal.'
13 'Pero tla xnenkinekij nenmokauaskej ipan in país de Juda, yej nenkinekij xnenkitlakamatiskej nenmoTEKO Dios, 14 niman nenkijtouaj: 'Tejuamej tiknekij tiaskej Egipto, kampa xtikitaskej nouisokilistli, xtikakiskej ijkuak kimpitsaskej on trompetas, niman no kampa xtimikiskej ikan mayantli,' 15 tla ijkon, kuajli xkakikan, nemejuamej yejuan sanken nennemij nikan Juda on tlinon mechijlia toTEKO. Yejua yejuan nochi ueli kichiua, iDios Israel mechijlia: 'Tla nenmejuamej sanken sanoyej nenkinekij nenmonchantiskej Egipto, 16 on nouisokilistli niman on mayantli yejuan sanoyej nenkimaksij hasta ompa no ajsis, niman ompa nenmikiskej. 17 Nochimej yejuan sa kinektokej yaskej onchantiskej Egipto, ompa mikiskej ika on nouisokilistli, on mayantli noso ika on kokolistli. Xakaj nomanauis; xakaj uelis cholos itech on tlajyouilistli yejuan nikomintitlanilis.'
18 'ToTEKO yejuan nochi ueli kichiua, iDios Israel, kijtoua: 'Ijkon ken sanoyej onikualan inmiuan on chanejkej Jerusalén, no ijki sanoyej nikualanis nenmouan, tla nenyauij Egipto. Nochi tlakatl mechtlauelitas, mechtontojmatis, mechchichiititas, niman mechitas ken tlauelijli, niman xok nenkitaskej yejua in tlajli.'
19 'Nenmejuamej yejuan sanken nennemij nikan Judá, toTEKO mechnauatia maka xuiyan Egipto. Tlami xmatikan, on tlen nejua nemechijlia aman. 20 Nemejuamej nentlakajkayauaj, pampa sano nemejuamej onennechtlajtlanilijkej ma niknotsa nenmoTEKO Dios, niman onennechijlijkej: 'Xtlajtlanili toTEKO Dios topampa, niman xtechmachisti nochi on tlinon mitsnauatis, niman tejuamej tikchiuaskej nochi tlen yejua technauatia.' 21 Aman yonemechijli on tlinon yejua onechijlij, pero nenmejuamej xnenkinekij nenkitlakamatiskej. 22 Yejua ika tej, kuajli xmatikan ika ipampa on nouisokilistli, on mayantli niman on kokolistli, nenmikiskej ipan on país kampa nenkinekij nenmonchantiskej."